Inyarubha ya okwamba ya
Yowana
Yeesu ni Musango gwa obhuwanga
1
1 Echibharaasisya inguru ya Omusango gwa obhuwanga,
gunu gubheeye‑wo chichaari okubha‑wo echiinu choonechoone.
a Eswe ꞉chaamutegeresiisye,
꞉chaamurore na ameeso geeswe abheene,
꞉chaamuringiiye na okumukuunʼya‑ko na amabhoko geeswe.
2 Oyo niwe obhuwanga,
꞉aabhonekeene kw‑iswe na eswe nichimurora.
Woori echibhabhwira na okubharaasisya echimari inguru ya obhuwanga bhwa akajaanende,
bhunu bhwariga bhuri ku‑Raata Nyamuwanga,
ˆnaabhuswerura kw‑iswe.b
3 Echibharaasisya emisango inguru ya Yeesu unu ꞉chaarorere na okumutegeresya,
korereki mubhe na obhumwi na eswe mu‑riikirisya.
Obhumwi obhwo,
chiri nabhwo na Raata Nyamuwanga na Omwana waaye Yeesu Kirisito.
4 Enibhakaamira inyarubha inu,
korereki bhoone chikonderwe aamwi.
Okwikara mu‑bhweru
5 Mbe,
omusango gunu ꞉choonguuwe ku‑Yeesu Kirisito,
nigwo echibharaasisya ati,
Nyamuwanga ari rwa obhweru,
echisuute choonechoone chitari mu‑nda yaaye sirisiiri.
6 Araabha echaayika ati chiri na obhumwi na Nyamuwanga,
keenu nichigenderera okwikara mu‑chisuute,
mbe echaayika orubheeyi.
Ka wone echibha chitakukora ja echimari.
7 Tari,
araabha chiikaaye mu‑bhweru rwa kutyo Nyamuwanga ari mu‑bhweru,
awo niwo echibha na obhumwi eswe abheene kwa abheene.
Ka wone amaanyinga ga Yeesu,
Omwana waaye,
agacheesya ebhibhiibhi bhyeswe bhyone.
8 Araabha echaayika ati eswe chitari na ebhibhiibhi,
echiijiga abheene,
wone echimari chitari‑mo mu‑myoyo jeeswe.
9 Tari,
araabha chikata ebhibhiibhi bhyeswe,
Nyamuwanga kaachifwira echigongo ebhibhiibhi bhyeswe na okucheesya obhujabhi bhwone,
kwa okubha omwene ni mwiyikanyibhwa ka wone ni murengeresi.
10 Araabha echaayika ati chichaari okukora ebhibhiibhi,
echibha nichikora Nyamuwanga okubha omubheeyi.
Omusango gwaye wone,
ogubha gutari‑mo mu‑myoyo jeeswe.