Okwikara rwa abhaana bha Nyamuwanga
3
1 Mbe,
mwiganirisye kutyo Raata Nyamuwanga acheendere muno,
okukingira okuchibhirikira ati chiri bhaana bhaaye!
Chimari,
nikwo kutyo chiri.
Nawe abhaanu bhanu bhatakugayuka Nyamuwanga bhatakumenya ati,
eswe chiri bhaana bhaaye,
kwa okubha bhatakumusombookerwa.
2 Abheendwa bhaani mu‑riikirisya,
echimenya ati ku‑mwanya gunu chiri bhaana bha Nyamuwanga,
nooro kutyo jichaari okumenyekana abhwerubhweru kutyo chirisusa.
Tari chimenyere ati,
omwanya gunu Kirisito arisubha rindi,
chirisusana nage,
kwa okubha chirimurora kutyo ari.
3 Kurwa ejo,
omuunu woonewoone unu ari na obhwiyikanyo obhwo,
keendwa asigane na ebhibhiibhi,
rwa kutyo Kirisito atakukora ebhibhiibhi.
4 Woori,
omuunu woonewoone unu kaagenderera okukora ebhibhiibhi,
kaanyamura ebhiraagiro bhya Nyamuwanga,
kwa okubha okukora ebhibhiibhi,
nikwo okunyamura ebhiraagiro.
5 Emwe mumenyere kisikisi ati isonga ya Kirisito okuuja ku‑chaaro kunu ni kugega ebhibhiibhi bhyeswe.
Ka wone,
mumenyere ati omwene atari na echibhiibhi choonechoone.
6 Kurwa ejo,
jiri abhweru ati,
omuunu woonewoone unu kaagenderera okubha na obhumwi nage,
atakugenderera okukora ebhibhiibhi.
Nawe,
omuunu woonewoone unu kaagenderera okukora ebhibhiibhi,
atakumenya ati Kirisito niga,
ka wone atakumusombookerwa.
7 Mbe,
abhaana bhaani mu‑riikirisya,
mwangarire korereki omuunu woonewoone aasiga okubhayabhya.
Omuunu woonewoone unu kaakora eja rirenga,
ni murengeresi,
rwa kutyo Kirisito ari murengeresi.
8 Nawe,
omuunu woonewoone unu kaagenderera okukora ebhibhiibhi,
ni muunu wa Syetaani.
Okubha Syetaani agendereeye okukora ebhibhiibhi okusookerera ku‑bhwambiro.
Niyo isonga Omwana wa Nyamuwanga ꞉eejire ku‑chaaro anu,
korereki anyamure bhuri murimu gwa Syetaani.
9 Omwana woonewoone wa Nyamuwanga,
atakugenderera okukora ebhibhiibhi,
kwa okubha ari na itungwa ya Nyamuwanga mu‑mwoyo gwaye.
Kurwa ejo,
atakutura okugenderera okukora ebhibhiibhi kwa okubha ni mwana wa Nyamuwanga.
10 Nawe,
omuunu woonewoone unu atakukora eja rirenga atari mwana wa Nyamuwanga,
nyabhuriko omuunu unu atakwenda oweejaabho atari mwana wa Nyamuwanga.
Obhwo nibhwo obhutaasyanya bhunu bhuri agati ya abhaana bha Nyamuwanga na abhaanu bha Syetaani.
Okwendana
11 Mbe,
okusookerera omwanya gunu ꞉mwaambire okwikirisya Yeesu Kirisito,
mwonguuwe omusango ati,
eswe abheekirisya,
echikenwa cheendane abheene kwa abheene.
12 Chisige okubha rwa omuunu urya kaatogwa Kayini unu aariga ari muunu wa Omubhiibhi urya,
ka wone ꞉eetire Abheeri,
omumura waabho.
a Ni kurwa ki ꞉aamwitire?
Isonga ya okumwita niyo yinu,
ebhikorwa bhya Kayini bhyariga bhiri bhibhiibhi,
nawe ebhya omumura waabho bhyariga bhiri bhya rirenga.
13 Kurwa ejo,
abheekirisya abheejaasu,
mwasiga okuruguura araabha abhaanu bhanu bhatakugayuka Nyamuwanga bhaakabhasoka.
14 Eswe chimenyere ati chaasookere mu‑managa ga orufu na woori chiri na obhuwanga bhwa akajaanende koone.
Echimenya kutyo,
kwa okubha woori echeenda abheejaasu.
Omuunu woonewoone unu atakwenda abheejaabho,
oyo chimari achaari mu‑managa ga orufu.b
15 Omuunu woonewoone unu kaasoka oweejaabho ni mwiti.
Emwe mumenyere ati omwiti woonewoone wa abhaanu atari na obhuwanga bhwa akajaanende koone mu‑mwoyo gwaye.
16 Mbe,
Kirisito ejire aachifwira ꞉aacheeresiisye kutyo eryenda rya echimari riri.
Eswe wone kutyokutyo,
echikenwa chiikirisye nooro okufwira abheejaasu.
17 Araabha omuunu ari na ebhiinu bhya okumusakira ku‑bhurame bhwa ku‑chaaro anu,
ka wone kaamenya ati oweejaabho ari na obhukene,
nawe atari na omwoyo gwa echigongo gwa okumusakira,
angu,
ni chimari eryenda rya Nyamuwanga riri mu‑mwoyo gwaye?
18 Abhaana bhaani mu‑riikirisya,
chisige okwayika mu‑kanwa era ati echeendana.
Tari cheendane kwa eryenda rya echimari kwa okusakirana abheene kwa abheene.
19 Araabha chikeendana kutyo,
niwo echimenya ati,
chiri bhaana bha echimari bha Nyamuwanga.
Ka wone,
emyoyo jeeswe ejifuungʼama imbere yaaye.
20 Nooro emyoyo jeeswe jikachiramura ati chikorere ebhibhiibhi,
echibha chifuungʼamire,
kwa okubha Nyamuwanga ni mukuru,
kaamenya bhuri chiinu okukira eswe.
21 Woori,
abheendwa bhaani mu‑riikirisya,
araabha emyoyo jeeswe jitakuchiramura,
chiri na ribhaasi imbere ya Nyamuwanga.
22 Ka wone,
bhuri chiinu chinu echisabhwa ku‑Nyamuwanga kaachiyaana,
kwa okubha echigayuka ebhiraagiro bhyaye na okukora jinu ejimukondera.
23 Echiraagiro chaaye nicho chinu ati,
chiikirisye risiina rya Omwana waaye Yeesu Kirisito,
ka wone cheendane rwa kutyo achiragiriiye.
24 Omuunu woonewoone unu kaagayuka ebhiraagiro bhya Nyamuwanga,
ari na obhumwi nage.
Omwene wone ari na obhumwi Nyamuwanga.
Echimenya ati Nyamuwanga ari na obhumwi na eswe kwa okubha achiyaaye Mwoyo Mweru.