Okumenya ameeyigisyo ga echimari na ga orubheeyi
4
1 Abheendwa bhaani mu‑riikirisya,
musige okwikirisya bhuri muunu unu kaayika ati,
ari na Mwoyo wa Nyamuwanga.
Tari mutatirisye kisikisi korereki mumenye chimari araabha omuunu oyo,
kaatangasibhwa na Mwoyo wa Nyamuwanga.
Mukore kutyo,
kwa okubha abharagi abhaafu bha orubheeyi bheebhukire mu‑chaaro munu.
2 Injira ya okumenya ati omuunu kaatangasibhwa na Mwoyo wa Nyamuwanga niyo inu,
omuunu woonewoone unu keekirisya na okutogora ati Yeesu Kirisito ꞉eejire ˆnaabha na omubhiri rwa omuunu,
oyo niwe kaatangasibhwa na Mwoyo wa Nyamuwanga.
3 Nawe omuunu woonewoone unu keekirisya ati Yeesu aariga atari na omubhiri,
atakutangasibhwa na Mwoyo wa Nyamuwanga.
Tari,
kaatangasibhwa na omwoyo wa omusoko wa Kirisito,
unu mwonguuwe ati kaaja.
Woori omwoyo oyo eejire mu‑chaaro munu.
4 Mbe,
emwe abhaana bhaani mu‑riikirisya,
mwabheeye abhaana bha Nyamuwanga,
ka wone muyigire abharagi abhabheeyi abho.
Mubhayigire kwa okubha,
Mwoyo wa Nyamuwanga unu ari mu‑myoyo jeemwe,
ari na obhuturo okukira mwoyo wa Syetaani unu kaatangasya abhaanu bhanu bhatakugayuka Nyamuwanga.
5 Abharagi bha orubheeyi abho ni bha ku‑chaaro kunu era,
kurwa ejo abhaayika emisango ja ku‑chaaro kunu.
Abhaanu bha ku‑chaaro bhanu bhatakugayuka Nyamuwanga,
abheekirisya ameeyigisyo geebhwe.
6 Nawe eswe chiri bhaana bha Nyamuwanga.
Omuunu woonewoone unu kaasombookerwa Nyamuwanga,
keekirisya ameeyigisyo geeswe.
Nawe unu atari mwana wa Nyamuwanga,
atakugeekirisya.
Kutyo nikwo echimenya obhutaasyanya bhwa abhaanu bhanu abhatangasibhwa na Mwoyo wa echimari,
na bhanu abhatangasibhwa na mwoyo wa orubheeyi.
Eryenda rya Nyamuwanga
7 Abheendwa bhaani mu‑riikirisya,
cheendane,
kwa okubha eryenda erisooka ku‑Nyamuwanga.
Omuunu woonewoone unu keenda abheejaabho,
ni mwana wa Nyamuwanga,
ka wone niwe kaasombookerwa Nyamuwanga.
8 Nawe omuunu woonewoone unu atakwenda abheejaabho,
atakusombookerwa Nyamuwanga,
kwa okubha Nyamuwanga ni ryenda.
9 Nyamuwanga omwene ꞉eeresiisye eryenda ryaye kw‑iswe,
kwa okutuma Omwana waaye umwi wenyere era mu‑chaaro,
korereki Omwana oyo achiyaane obhuwanga bhwa akajaanende koone.
10 Rinu niryo eryenda,
jitari ati,
eswe ꞉chaatangatire okwenda Nyamuwanga.
Tari omwene niwe ꞉aatangatire okucheenda eswe.
Nikwo okukora ꞉aatumire Omwana waaye,
abhe echoogo cha okusoosya‑wo ebhibhiibhi bhyeswe na okuchigwatanya na Nyamuwanga.
11 Abheendwa bhaani mu‑riikirisya,
araabha Nyamuwanga ꞉aachendere muno kutyo,
eswe wone echikenwa cheendane.
12 Atari‑wo omuunu woonewoone unu ararorere Nyamuwanga ameeso kwa ameeso.
Nawe araabha chikeendana,
Nyamuwanga ari na obhumwi na eswe.
Ka wone eryenda ryaye eryo,
niryo erikuumira mu‑myoyo jeeswe.
13 Eswe chiri na obhumwi na Nyamuwanga,
omwene wone ari na obhumwi na eswe.
Echimenya kutyo,
kwa okubha achiyaaye Mwoyo waaye.
14 Eswe chirorere Omwana wa Nyamuwanga kwa ameeso geeswe.
Woori,
echibhwira abhaanu abhandi echimari ati,
oyo niwe Raata Nyamuwanga ꞉aatumire mu‑chaaro okubha Omuchungusi wa abhaanu bhoone.
15 Omuunu woonewoone unu keekirisya na okutogora ati Yeesu ni Mwana wa Nyamuwanga,
Nyamuwanga ari na obhumwi nage,
omwene wone ari na obhumwi na Nyamuwanga.
16 Woori,
eswe echimenya na echiikirisya ati Nyamuwanga kaacheenda.
Nyamuwanga ni ryenda.
Omuunu woonewoone unu ari na eryenda,
niwe ari na obhumwi na Nyamuwanga,
Nyamuwanga wone ari na obhumwi nage.
17 Ku‑njira eyo,
eryenda ryaye erikuumira mu‑myoyo jeeswe,
korereki chibhe na ribhaasi orusiku rwa okuramurwa.
Okubha obhurame bhweswe mu‑chaaro munu,
bhuri rwa kutyo Yeesu ꞉eekaaye.
18 Omuunu unu ari na eryenda atari na obhuubha.
Eryenda rya echimari,
erisoosya‑wo obhuubha bhwone,
kwa okubha indamu niyo eyikora abhaanu bhabhe na obhuubha.
Omuunu woonewoone unu ari na obhuubha,
eryenda richaari okukuumira mu‑mwoyo gwaye.
19 Woori,
eswe echeenda Nyamuwanga na abheejaasu,
kwa okubha omwene niwe ꞉aatangatire okucheenda eswe.
20 Omuunu woonewoone unu kaayika ati keenda Nyamuwanga,
keenu ˆnaasoka oweejaabho,
ni mubheeyi.
Echimenya ati ni mubheeyi,
kwa okubha,
aakasoka oweejaabho unu kaarora bhuri rusiku,
atakutura okwenda Nyamuwanga unu achaariga okumurora kwa ameeso.
21 Mbe,
Nyamuwanga achiyaaye echiraagiro ati,
omuunu woonewoone unu keenda Nyamuwanga,
kaakenwa wone eende oweejaabho.a