Okuyiga ebhibhiibhi
5
1 Woori,
omuunu woonewoone unu keekirisya ati Yeesu ni Musorwa wa Nyamuwanga,
omuunu oyo niwe omwana wa Nyamuwanga.
Ka wone,
woonewoone unu keenda omwibhusi wa omwana,
keenda na abhaana bha omwibhusi oyo.
2 Echimenya echimari ati echeenda abhaana bha Nyamuwanga,
kwa okwenda Nyamuwanga na okugayuka ebhiraagiro bhyaye.
3 Okubha okwenda Nyamuwanga ni okugayuka ebhiraagiro bhyaye.
Ka wone okugayuka ebhiraagiro bhyaye kutari okukomeeye,
4 kwa okubha bhuri mwana wa Nyamuwanga ari na obhuturo bhwa okuyiga ebhibhiibhi.
Mbe,
echiyiga ebhibhiibhi kwa okwikirisya Yeesu.
5 Atari‑wo omuunu unu kaatura okuyiga ebhibhiibhi tari unu keekirisya era ati,
Yeesu ni Mwana wa Nyamuwanga.
Echimari inguru ya Yeesu Kirisito
6 Mbe,
Yeesu Kirisito ꞉aasweruuywe ati ni Mwana wa Nyamuwanga ku‑njira ya obhubhatiijo bhwaye mu‑manji na ku‑njira ya okwita amaanyinga gaaye ku‑musarabha.
Itari kwa okubhatiijwa mu‑manji era,
tari kwa okubhatiijwa mu‑manji na okwa okwita amaanyinga.
7 Ka wone,
Mwoyo Mweru niwe kaasoosya obhubhambaasi ati ejo ni ja echimari,
kwa okubha omwene niwe echimari.
8 Okubha bhari‑wo abhabhambaasi abhasatu bhanu abheekirisyanya [mu‑rwire,
Raata Nyamuwanga,
Omusango na Mwoyo Mweru.
Abhasatu bhanu ni bhumwi.
9 Ka wone,
bhari‑wo abhabhambaasi abhandi abhasatu bhanu abhaayika ku‑chaaro],
a Mwoyo Mweru,
amanji na amaanyinga.
Abhasatu bhanu abheekirisyanya ku‑musango ogwo.
Chikeekirisya obhubhambaasi bhwa abhaanu,
obhubhambaasi bhwa Nyamuwanga nibhwo bhwa echimari muno okukira bhwa abhaanu,
kwa okubha bhunu nibhwo obhubhambaasi bhunu Nyamuwanga asoosiisye inguru ya Omwana waaye.
10 Woori,
omuunu woonewoone unu keekirisya Omwana wa Nyamuwanga,
keekirisya ati obhubhambaasi obhwo ni bhwa echimari.
Nawe unu atakwikirisya Nyamuwanga,
kaakora Nyamuwanga okubha omubheeyi,
kwa okubha atakwikirisya obhubhambaasi bhunu Nyamuwanga asoosiisye inguru ya Omwana waaye.
11 Obhubhambaasi obhwo ni bhunu,
Nyamuwanga achiyaanire obhuwanga bhwa akajaanende koone.
Obhuwanga obhwo echibhubhona kwa okwikirisya Omwana waaye.
12 Omuunu woonewoone unu ari na obhumwi na Omwana wa Nyamuwanga,
ari na obhuwanga obhwo.
Nawe unu atari na obhumwi nage,
atari nabhwo.
Emisango ja obhuteero
13 Enibhakaamira inyarubha inu,
emwe bhanu omwikirisya risiina rya Omwana wa Nyamuwanga,
korereki mumenye ati muri na obhuwanga bhwa akajaanende koone.
14 Ribhaasi ryeswe imbere ya Nyamuwanga niryo rinu,
echimenya ati kaachitegeresya araabha chikamusabhwa echiinu choonechoone okuruubhana na okwenda kwaye.
15 Mbe,
eswe echimenya ati Nyamuwanga kaategeresya risabhwa ryeswe,
nikwo okukora,
echimenya wone ati,
kaachiyaana ebhiinu bhinu echimusabhwa.
16 Bhiri‑wo ebhibhiibhi bhinu bhitakutaaganya omuunu na Nyamuwanga akajaanende koone.
Araabha omuunu woonewoone kw‑imwe akarora oweejaabho unu kaakora ebhibhiibhi rwa ebhyo,
amusabhirwe ku‑Nyamuwanga,
Nyamuwanga omwene kaja okumuyaana obhuwanga.
Omusango gunu ni inguru ya bhanu abhakora ebhibhiibhi ebhyo.
Nawe bhiri‑wo ebhibhiibhi bhinu ebhitaaganya omuunu na Nyamuwanga akajaanende koone.
Anye nitakwayika ati asabhirwe omuunu oyo ku‑Nyamuwanga inguru ya ebhibhiibhi ebhyo.
17 Okukora echikorwa choonechoone chinu chiteeyire imbere ya Nyamuwanga,
nikwo okukora ebhibhiibhi.
Nawe aamwi na ejo,
bhiri‑wo ebhibhiibhi bhinu bhitakutaaganya omuunu na Nyamuwanga akajaanende koone.
18 Echimenya ati omwana woonewoone wa Nyamuwanga,
atakugenderera okukora ebhibhiibhi,
kwa okubha Omwana wa Nyamuwanga kaamurinda,
Omubhiibhi urya atakutura okumukuunʼya‑ko.
19 Eswe echimenya ati,
chiri bhaana bha Nyamuwanga.
Omubhiibhi urya atungire abhaanu abhandi bhoone bhanu bhatari na obhumwi na Nyamuwanga.
20 Ka wone,
echimenya ati Omwana wa Nyamuwanga eejire mu‑chaaro munu,
achiyaanire obhwenge,
korereki chisombookerwe Nyamuwanga wa echimari.
Chiri na obhumwi na Nyamuwanga wa echimari,
kwa okubha chiri na obhumwi na Omwana waaye Yeesu Kirisito.
Omwene niwe Nyamuwanga wa echimari,
unu ari bhuwanga bhwa akajaanende koone.
21 Abhaana bhaani mu‑riikirisya,
mwiyangarire mwasiga okuramya amasusano.b