Mugayukega Nyamuwanga
4
1 Riremo na inyombo bhinu bhiri mw‑imwe ebhisooka aaki? Angu, bhitakusooka mu‑kurigira kwemwe okubhiibhi kunu okukora riremo mu‑bhiwuga bhyemwe? 2 Omurigira okubhona echiinu echirebhe, chikabhabhura, nimuramura okwita. Kurwa ejo, omuyomba na okurwana, nawe mutakubhona echiinu chinu omukena, kwa okubha mutakusabhwa Nyamuwanga abhayaane! 3 Noorwo mukamusabhwa atakubhayaana, kwa okubha omumusabhwa mu‑bhwira obhubhiibhi, korereki mubhikorere emirimu mu‑kurigira kwemwe okubhiibhi.4 Emwe, muri abhaanu bhanu bhatari bheeyikanyibhwa ku‑Nyamuwanga! Mutakumenya ati okubha omusaani wa echaaro chinu ni okubha omusoko wa Nyamuwanga? Kurwa ejo, omuunu woonewoone aakeenda okubha omusaani wa echaaro, keekora okubha omusoko wa Nyamuwanga. 5 Mbe, musige okwitogera ati Ebhikaame Ebhyeru bhikaamirwe emisango ja kutyo era, ati, Mwoyo unu Nyamuwanga ꞉aateeye mu‑mutima jeeswe kaachiisigombera okukingira okuchifuyira muno. 6 Nawe Nyamuwanga kaachiyaana obhwitiriranya bhwafu, nikwo okukora jikaamirwe mu‑Bhikaame Ebhyeru ati,
“Nyamuwanga kaayaajana na abha echigundu,
tari bhanu abheekeeya, kaabhayaana obhwitiriranya.”a
7 Mbe, mugayukega Nyamuwanga. Nawe mubhe nimuyingirira Syetaani, niwo aribheeruka. 8 Mufogererega Nyamuwanga, niwo omwene wone aribhafogerera. Emwe abha ebhibhiibhi, musige ebhibhiibhi bhyemwe na mukore ja ekisi. Emwe abha emitima ebhiri, muruubhe Nyamuwanga kwa emyoyo jeemwe joone. 9 Musurumbare, murire na okukunga. Okuseka kwemwe kuyinduke kubhe okurira na okukonderwa kwemwe kubhe kusurumbara. 10 Mwikeeyega mu‑meeso ga Raatabhugenyi, omwene aribhakusya.
Musigega okuromana
11 Bhayiri bhaani, musigega okuromana, kwa okubha unu kaaroma oweejaabho, amwi okuramura oweejaabho, oyo niwe kaabha agayire ebhiraagiro bhya Nyamuwanga. Omwanya gunu owikora okubha omuramusi wa ebhiraagiro keenu awe utari omuramusi waabhyo, niwo owubha utakubhigayuka, waabha omuramusi wa okuramura ebhiraagiro. 12 Nyamuwanga omwene, niwe ateeye‑wo ebhiraagiro na niwe omuramusi waabhyo. Niwe kaatura okuchungura amwi okusingaarisya. Nawe, awe niga, okukingira okuramura oweejaanyu?
Musige okwikuuya inguru ya mutondo
13 Woori, muntegeresye kisi, emwe bhanu omwayika ati, “Reero amwi mutondo, echigenda mu‑musi omurebhe. Chiriikara eyo omuguuga gwone, chirikaana ebhiinu na okubhona omuriiro.” 14 Keenu mutakumenya jinu ejija okukorekana mutondo. Obhurame bhwemwe niki? Obhurame bhwemwe bhuri rwa orwika runu orubhonekana kasinjeeke era, nirwiya niruwaawo! 15 Omukenwa mwayikega ati, “Araabha Raatabhugenyi aakeenda, chiribha abhaanga nichikora gunu amwi gurya.” 16 Nawe woori emwe, omwikumangya na omwikuuya. Okwikumangya okwo, ni ku‑bhibhiibhi. 17 Mbe, omuunu woonewoone unu amenyere okukora gwa ekisi, nawe atakugukora, oyo kaakora echibhiibhi.