Mwiyingirire mu‑kwayika
3
1 Abhayiri bhaani mu‑riikirisya, mw‑imwe kusige okubha‑wo abheeyigisya bhaafu bha omusango gwa Nyamuwanga, kwa okubha mumenyere ati, eswe abheeyigisya, indamu yeeswe okusooka ku‑Nyamuwanga iribha nduru muno okukira abhaanu abhandi. 2 Ni chimari abhaanu bhoone echiyabhaga mu‑misango myafumyafu. Araabha omuunu woonewoone atakuyabha mu‑kwayika kwaye, omwene oyo ni omuunu unu akuumiiye, ka wone kaatura okuyingirira omubhiri gwaye gwone.3 Murore kutyo echituura ebhyuma ku‑minwa ja jifwaraasi okujisinyiirisya, korereki jichigayuke. Ku‑njira eyo, echichuusyachuusya emibhiri jaajo joone. 4 Rora na jingarabha wone, noorwo kutyo ni nene muno na ejikuurwa na omuyaga gwa amanaga, nawe ejiyindurwa na ingobhero inooto muno, okuja woonewoone enu omugofi keenda igende. 5 Nyabhuriko na orurimi wone ni chiwuga chitooto ku‑mubhiri, nawe orwikuuya amekuuyo manene muno. Rora wone omuriro omutooto kutyo ogorungusya risaka enene muno! 6 Orurimi ruri rwa omuriro, rwijuuye obhujabhi bhwone. Orurimi ni chimwi cha ebhiwuga mu‑mubhiri gweswe, nawe orujabhiyaasya omubhiri gwone, na okusingaarisya obhurame bhweswe bhwone mu‑muriro gwa akajaanende koone.a
7 Abhaanu abhatura okutunga jityanyi ja bhuri mbaga, jinyonyi, ebhibhumbwa bhyone bhinu ebhiribhatira jinda, na ebhibhumbwa bhyone bhya mu‑nyanja. 8 Nawe atari‑wo omuunu unu kaatura okutunga orurimi. Orurimi ni echiinu echibhiibhi chinu chitakutungwa, rwijuuye obhusungu bhunu obhwita.
9 Ku‑njira ya orurimi echikuuya Raata, oyo niwe Raatabhugenyi weeswe, nyabhuriko, ku‑njira ya orurimi orwoorwo echiiyiima abhaanu bhanu Nyamuwanga abhumbire mu‑rususo rwaye. 10 Mu‑munwa ogwoogwo ogumwi, nimwo ejisooka emisango ja okukuuya na eja okwiyiima. Abhayiri bhaani mu‑riikirisya, ejo jiteeyire jibhe kutyo. 11 Gutari‑wo omumiro gwa amanji gunu ogusoosya amanji ga omuunyu na amanji amanunuriiye! 12 Abhayiri bhaani mu‑riikirisya ritiini eritura kutiki okutwasya emijeyituuni? Amwi riiti rya rijabhiibhu eritura kutiki okutwasya jitiini? Nyabhuriko, omumiro gwa amanji ga omuunyu gutakutura okusoosya amanji amanunuriiye.
Obhwengeeso bhwa echimari obhusooka ku‑Nyamuwanga
13 Niga mw‑imwe unu ari na obhwengeeso na okusombookerwa? Mbe, eeresye obhwengeeso bhwaye na okusombookerwa kwaye mu‑kukora ebhikorwa bhya ekisi, mu‑bhworooro bhunu obhusooka mu‑bhwengeeso.
14 Nawe mukabha na orwiso, obhururu na orwango mu‑mitima jeemwe, musige okwikuuya ati muri na obhwengeeso, noorwo musige okwayika orubheeyi inguru ya echimari. 15 Obhwengeeso bhwa imbaga eyo, bhutakusooka ku‑Nyamuwanga, tari ni bhwengeeso bhunyachaaro, bhunyamuunu na obhusooka ku‑Syetaani.b 16 Okubha anu ruri orwango na orwiso, awo niwo iri injogere na obhubhiibhi bhwa bhuri mbaga.
17 Nawe obhwengeeso bhunu obhusooka ku‑Nyamuwanga, cha okwamba ni obhweru, ka wone ni murembe na ni bhworooro, ni bhwangu okutegeresya abhaanu abhandi, bhwijuuye echigongo na ebhikorwa bhya ekisi, bhutakusoroora abhaanu noorwo bhutari na obhwirimaanya. 18 Abhaanu bha omurembe bhanu abhareeta omurembe, nibho bharigesa obhurengeresi.