Musige okubha na isoroore
2
1 Abhayiri bhaani mu‑riikirisya, rwa kutyo mwikirisiisye Raatabhugenyi weeswe Yeesu Kirisito owa rikusyo, musige okubha na isoroore ku‑bhaanu. 2 Chaayike ati, omuunu unu afwaye emyenda ja ekisi na inarye ya inaaryo ku‑chaara, eengira mw‑ikofyanyo ryemwe. Neeya, omutaka unu afwaye amasembe, wone ˆneengira. 3 Nimwiya, nimukuma unu afwaye emyenda ja ekisi, nimumuyaana echibharo, nimumubhwira ati, “Awe inyanja anu, niwo wa ekisi.” Nawe omutaka urya, nimumubhwira ati, “Awe imereeguru arya,” amwi “Inyanja aasi anu.”4 Araabha nikwo kutyo, mutakurora ati, omubha mukorere isoroore agati yeemwe na okubha abharamusi abha obhwiganirisya obhubhiibhi?
5 Abhayiri bhaani abheendwa, muntegeresye kisi. Mutakumenya ati Nyamuwanga ꞉aawuuwe abhataka bha ku‑chaaro, bhabhe abhaniibhi mu‑riikirisya, bhanjure obhukama bhunu ꞉aaragire bhanu abhamwenda? 6 Nawe, emwe omugaya muno abhataka! Itari ati abhaniibhi abho, nibho abhabhegatiirisya na okubhakurura okubhasira mw‑iramuriro ku‑bharamusi? 7 Itari ati, nibho abho abhafuma risiina rya ekisi rya Yeesu Kirisito unu emwe muri abhaana bhaaye?
8 Mu‑Bhikaame Ebhyeru, echiraagiro cha obhukama bhwa Nyamuwanga chikaamirwe ati, “Wendega oweejaanyu rwa kutyo owiyenda omwene.”a Mukabha nimukora kutyo, omukora kisi. 9 Nawe, mukabha nimusoroora abhaanu, omukora ebhibhiibhi na ebhiraagiro ebhibhabhuura ati, mubhinyamuuye.
10 Omuunu woonewoone, akagayuka ebhiraagiro bhyone, nawe ˆnaanyamura echiraagiro chimwi, oyo kaabharwa ati, anyamuuwe bhyone. 11 Okubha unu ateeye‑wo echiraagiro chinu echaayika ati, “Waasiga okukora obhuromesi,”b niwe ateeye‑wo na chinu echaayika ati, “Waasiga okwita.”c Mbe, noorwo ukarema okukora obhuromesi, nawe nuwiita, owubharwa ati, ꞉waanyamuuwe echiraagiro.
12 Kutyo mwayikega na okukora nimuruubhaga echiraagiro chinu echibhareetera obhwitaage. Mwichukega ati, Nyamuwanga aribharamurira echiraagiro echo. 13 Nyamuwanga ataribha na echigongo ku‑unu atari na echigongo ku‑bhandi. Nawe Nyamuwanga arifwira echigongo abha echigongo orusuku runu ariramura.
Eriikirisya ryemwe riruubhane na ebhikorwa bhya ekisi
14 Abhayiri bhaani mu‑riikirisya, omuunu kaabhona omuriiro ki, akaayika ati, ari na eriikirisya keenu atari na ebhikorwa bhya ekisi? Ni chimari ati eriikirisya ryaye eryo ritakutura okumuchungura. 15 Araabha omumura waanyu amwi omuyara waanyu mu‑riikirisya atari na emyenda noorwo ebhiryo, 16 na owumwi weemwe ˆnaamubhwira ati, “Genda na omurembe, ubhire omuriro na okwiguta,” keenu atamuyaaye emyenda amwi ebhiryo, emisango ejo jiri na omuriiro ki? 17 Nikwo kutyo wone, mukabha na eriikirisya, nawe mutari na ebhikorwa bhya ekisi, eriikirisya ryemwe, rifuuwe.
18 Woori omuunu owundi akaayika ati, “Awe, wuri na eriikirisya na anye niri na ebhikorwa bhya ekisi.” Niwo nirimubhwira ati, “Nyeeresya eriikirisya ryawo, rinu ritari na ebhikorwa bhya ekisi. Anye wone nikweresye eriikirisya ryani ku‑njira ya ebhikorwa bhyani bhya ekisi.”
19 Angu, awe owikirisya ati ari‑wo Nyamuwanga umwi era? Owukora kisi okwikirisya kutyo. Amasambwad wone ageekirisya kutyo na okuyarara kwa obhuubha!
20 Awe uri mumuumu! Uchaakena okumenya ati, eriikirisya rinu ritari na ebhikorwa bhya ekisi, ritari na omuriiro? 21 Woori chiringire saaja weeswe Bhurayimu. Omwene ꞉aasoosiisye omwana waaye Isaaka rwa echoogo ku‑chigabhiro. Niwo Nyamuwanga ˆnaamubhara ati, ni omurengeresi imbere yaaye okuruubhana na ebhikorwa bhyaye. 22 Utakurora ati, eriikirisya rya Bhurayimu, ryariga niriruubhana aamwi na ebhikorwa bhyaye. Eriikirisya ryaye ryakumisiibhwe mu‑bhikorwa bhyaye.
23 Ejo ꞉jaakorekeene na okukaamwa mu‑Bhikaame Ebhyeru ati, “Bhurayimu ꞉eekirisiisye Nyamuwanga, kurwa ejo Nyamuwanga ˆnaamubhara okubha omuunu omurengeresi imbere yaaye.”e Omwene ˆnaatogwa omusaani wa Nyamuwanga.
24 Mbe, omurora ati Nyamuwanga kaabhara ati omuunu ni bhurengeresi inguru ya ebhikorwa bhyaye bhya ekisi, nawe itari inguru ya eriikirisya ryenyere era.
25 Noorwo Raabhu, omugasi urya eegusyaga okwibhonera ribhona, omwene wone ꞉aabharirwe ati ni omurengeresi imbere ya Nyamuwanga, inguru ya ebhikorwa bhya ekisi bhinu ꞉aakorere. ꞉Aakumire abhatatirisya bharya bha Yisirayeeri na okubhayitingʼanʼya ku‑njira eyindi.f
26 Nyabhuriko, araabha omuunu ari na eriikirisya, nawe atari na ebhikorwa bhya ekisi, eriikirisya ryaye eryo rifuuwe. Omuunu oyo, kaasusana rwa omubhiri gunu gukabha gutari‑mo omwoyo, gutari na obhuwanga.