Inyarubha ya
Yakobho
1
1 Inyarubha inu niikaamire anye Yakobho, omukosi wa Nyamuwanga na wa Raatabhugenyi Yeesu Kirisito. Enikaamira emwe jingʼanda ekumi na ebhiri,a jinu jinyarambukire na okuja okwikara mu‑bhyaro bhyafubhyafu. Enibhakeesya!Mukonderwega omwanya gunu omuregeejibhwa
2 Abhayiri bhaani mu‑riikirisya, mukonderwaga muno omwanya gunu omuregeejibhwa amaregeejo ga bhuri mbaga, 3 kwa okubha, mumenyere ati araabha eriikirisya ryemwe eriregeejibhwa, obhwigumiirisya bhwemwe obhwiyongesya. 4 Omukenwa mugenderere okwigumiirisya okukingira ku‑bhuteero, korereki mubhe mukuumiiye chimwi, mutagerukiiywe wuri echiinu choonechoone.
5 Nawe araabha ari‑wo omuunu mw‑imwe unu akeeyeeywe obhwengeeso, kaakenwa asabhwe Nyamuwanga, omwene arimuyaana. Okubha Nyamuwanga kaayaana abhaanu bhoone, ku‑bhwafu, noorwo atakugonya wuri. 6 Nawe omwanya gunu kaasabhwa Nyamuwanga, kaakenwa asabhwe mu‑riikirisya, asige okwitimaata, kwa okubha omuunu unu keetimaata, ari rwa rikonjo rya mu‑nyanja rinu erigegwa na omuyaga nigurisira eyi na eyi. 7-8 Omuunu rwa oyo, ari na emitima ebhiri, keetimaata mu‑njira jaaye joone. Omuunu wa itungwa eyo, asige okwiyikanya ati aribhona echiinu choonechoone okusooka ku‑Raatabhugenyi.
9 Omwikirisya omutaka unu atari na echibharo, kaakenwa akonderwe kwa okubha Nyamuwanga arimwinamusya. 10 Nawe omwikirisya omuniibhi akonderwe, kwa okubha Nyamuwanga arimworomosya, ariwaa‑wo rwa obhwaso. 11 Risuubha eriwuruka, omuumwi mwafu oguwotosya ebhiimesya, obhwaso bhwende‑ko nibhunogoka na obhureesi bhwabhyo obhuwaawo. Nikwo kutyo jiribha noorwo ku‑muniibhi. Aribhaga naakora emirimu jaaye na arifwira ku‑mirimu ejo.
12 Ari na ribhando omuunu unu keegumiirisya omwanya gunu kaaregeejibhwa, kwa okubha omwanya gunu ariyiga amaregeejo ago, Nyamuwanga arimuyaana orutengya rwa obhuwanga bhwa akajaanende runu ꞉aaragire okuyaana bhoone bhanu abhamwenda.
13 Omwanya gunu omuunu kaaregeejibhwa okukora ebhibhiibhi, asige okwayika ati, “Nyamuwanga niwe kaandegeeja,” kwa okubha Nyamuwanga atakuregeejibhwa okukora ebhibhiibhi, noorwo omwene atakuregeeja omuunu woonewoone okukora ebhibhiibhi. 14 Nawe bhuri muunu kaaregeejibhwa omwanya gunu kaakururwa na okukongibhwa na okurigira kwaye okubhiibhi. 15 Omwanya gunu okurigira okubhiibhi okukomeera, okureterera ebhibhiibhi. Ebhibhiibhi ebhyo bhikakomeera, ebhireterera orufu.b
16 Abhayiri bhaani abheendwa, mwasiga okujigwa. 17 Bhuri echiinu cha ekisi chinu echiyaanwa, echisooka mu‑rwire ku‑Nyamuwanga Omubhumbi wa risuubha, okwesi na jinjota. Omwene ni wa ekisi siku joone, atakuyindukayinduka rwa rirengesi rinu erichuukurukachuukuruka. 18 Rwa kutyo omwene ꞉eendere, ꞉aachikorere chibhe abhaana bhaaye, ku‑njira ya omusango gwaye gwa echimari. ꞉Aakorere kutyo, korereki chibhe rwa abhaana bha obhubhere ku‑bhiinu bhyone bhinu ꞉aabhumbire.
Mutegeresyega omusango gwa Nyamuwanga na okugugayuka
19 Abhayiri bhaani abheendwa, muntegeresye kisi. Bhuri muunu abhe omwangu wa okuungwa, nawe asige okubha omwangu wa okwayika noorwo okubhiyirwa, 20 okubha risungu rya echinyamuunu ritakukora obhurengeresi bhwa Nyamuwanga. 21 Kurwa ejo, musige ebhibhiibhi na ebhikorwa ebhibhiibhi bhyone. Mwikirisye kwa obhworooro omusango gunu Nyamuwanga ꞉aayambire mu‑myoyo jeemwe, kwa okubha ogwo, nigwo ogutura okubhachungura.
22 Musigega okwijiga abheene. Musige okubha abhaanu bhanu omutegeresya era omusango gwa Nyamuwanga, tari mukorega kutyo ogwayika. 23 Omuunu unu kaategeresya omusango gwa Nyamuwanga, nawe atakukora kutyo ogwenda akore, oyo kaasusana rwa omuunu unu keerora obhusu bhwaye mw‑irore. 24 Akamara okwirora, akasooka kw‑irore, awoawo kaarabhirwa kutyo kaasusa. 25 Nawe omuunu unu kaarora etegeresiisye echiraagiro chinu chikuumiiye na okureeta obhwitaage, ˆnaagenderera okukora ejo okurabhirwa wuri jinu ꞉oonguuwe na okujiruubhirira, oyo niwe aribhona amabhando mu‑kukora kutyo.
26 Araabha omuunu keerora ati kaaramya Nyamuwanga, nawe atakuyingirira orurimi rwaye okwayika emibhiibhi, keejiga omwene, okuramya Nyamuwanga kwaye kutari‑mo omuriiro. 27 Okuramya kunu okukondera Raata Nyamuwanga weeswe, kunu kutari‑ko esoro ni okusakira abhaana bhanu bhafwiriiywe abheebhusi bheebhwe na abhatumbagasi mu‑nyaako jeebhwe na okwiyangarira omwene, korereki asige okunyamurwa na ebhibhiibhi bhya echaaro chinu.