Okugonya abhaniibhi abharakoko
5
1 Woori emwe abhaniibhi, muntegeresye kisi! Mwamure obhuraka murire na okukunga, inguru ya ingʼanga inene inu iribheejira. 2 Obhuniibhi bhwemwe bhwabhorere na emyenda jeemwe jiriibhirwe na amayeenje. 3 Inaaryo na jipirya jeemwe, jaajirire obhutaretare. Obhutaretare obhwo nibhwo bhuribha obhubhambaasi kw‑imwe kutyo omukorera emirimu kubhiibhi obhuniibhi bhwemwe. Ka wone obhutaretare obhwo bhurisingaarisya emibhiri jeemwe rwa omuriro kutyo ogusingaarisya. Emwe mwibhiikiiye ebhiinu ku‑siku ja obhuteero.4 Mutegeresye kutyo abhakosi bheemwe abhabhajujuumira! Okubha ꞉bhaakorere emirimu mu‑masambu geemwe, nawe emwe ꞉mutabhariyire emiyeero jeebhwe. Abhagesi bhanu ꞉bhaakorere emirimu ja okugesa mu‑masambu geemwe, wone abhabhajujuumira na echiriro cheebhwe cheengiiye mu‑matwi ga Raatabhugenyi wa ebhise bhya abhasirikare bha mu‑rwire. 5 Mwikaaye na okukondererwa obhuniibhi bhwemwe obhwafu ku‑chaaro kunu na okuyama rwa ityanyi inu yeeyire ku‑rusuku rwa okwitwa. 6 ꞉Mwaramuuye na okwita abhaanu abharengeresi, bhanu bhaariga bhatakuyaajana na emwe.
Mwigumiirisyega okukingira anu Raatabhugenyi Yeesu arisubha
7 Kurwa ejo, abhayiri bhaani mu‑riikirisya, mwigumiirisyega okukingira anu Raatabhugenyi Yeesu arisubha. Murore kutyo omurimi kaarindirira amatwasyo ga omuriiro omunene, keegumiirisya na okurindirira okukingira anu agabhonera jingʼubha ja okwamba na ja obhuteero.
8 Nyabhuriko emwe wone, mwigumiirisyega na okurumatana mu‑mitima jeemwe, kwa okubha okusubha kwa Raatabhugenyi Yeesu kuri yeeyi. 9 Abhayiri bhaani mu‑riikirisya, musige okujujuumirana abheene kwa abheene korereki mutariramurwa. Mwangarire! Omuramusi wa ebhiraagiro ari yeeyi okusubha.
10 Abhayiri bhaani mu‑riikirisya, mwichuke abharagi bhanu bhaayikaga kw‑isiina rya Raatabhugenyi, bhabhe echijekekanyo cha obhwigumiirisya bhwemwe mu‑nyaako. 11 Rwa kutyo mumenyere, echibhatoga ati bhari na amabhando bhanu ꞉bheegumiirisiisye. ꞉Mwoonguuwe emisango jinu ꞉jaabhwene Ayubhu na kutyo ꞉eegumiirisiisye. Ka wone mumenyere emisango ja ekisi jinu Raatabhugenyi ꞉aamukoreeye ku‑bhuteero.a Okubha Raatabhugenyi eejuuywe obhufura bhwafu na echigongo.
12 Abhayiri bhaani mu‑riikirisya, okukira joone, mwasiga okurayira ku‑rwire, ku‑chaaro, noorwo ku‑chiinu choonechoone chirya. Mwayikega ati ni chimari jikabha jiri chimari na mwayikega ati ni wuri jikabha jiri wuri.b Araabha mukakora kutyo, mutariramurwa.
Musabhwega Nyamuwanga muri na eriikirisya
13 Angu ari‑wo omuunu mw‑imwe unu kaanyaaka? Kaakenwa asabhwe Nyamuwanga. Angu, ari‑wo omuunu woonewoone unu kaakondererwa? Oyo embega jinyimbo ja okumukumuuya.
14 Angu ari‑wo omurwaye mw‑imwe? Oyo kaakenwa abhirikire abhakaruka bha rikanisa, bhaaje bhamusabhirwe na okumubhambaga amafuta kw‑isiina rya Raatabhugenyi Yeesu. 15 Bhakamusabhirwa bhari na eriikirisya, omurwaye oyo ariwora. Raatabhugenyi arimwinamusya na araabha aariga akorere ebhibhiibhi, arifwirwa echigongo ebhibhiibhi ebhyo. 16 Kurwa ejo, bhuri umwi weemwe abhe ˆnaata ebhibhiibhi bhyaye ku‑weejaabho na okusabhirana ku‑Nyamuwanga korereki muwosibhwe amarwara geemwe. Risabhwa rya omuunu omurengeresi riri na obhuturo na erikora emirimu.
17 Omuragi Yeeriya, aariga ari muunu rwa eswe. ꞉Aasabhirwe muno ingʼubha isige okugwa na niisiga okugwa ku‑chaaro cha Yisirayeeri miguuga esatu na ameesi gataanu na kumwi. 18 Niwo ˆnaasabhwa Nyamuwanga rindi ati ingʼubha igwe, niigwa okusooka mu‑rutumba okukingira mbayisya ebhiryo.
19 Abhayiri bhaani mu‑riikirisya, owumwi weemwe akayabha na okubha kura na echimari na omwikirisya oweejaabho ˆnaamusubhya rindi ku‑njira ya echimari, 20 mumenye ati, unu kaasubhya owa ebhibhiibhi okusooka mu‑bhibhiibhi bhyaye, kaabha awoniisye omwoyo gwa omuunu oyo okusooka mu‑rufu na okufwirwa echigongo ebhibhiibhi bhyaye ebhyafu.