Abhayebhuraniya 12

Okuruubha echijekekanyo cha Yeesu

1 Mbe, kwa okubha chiri na echise echinene echo cha abhabhambaasi bhanu bhachisingiiye, chisoosye‑wo joone jinu ejichiyingirira na okusiga ebhibhiibhi bhinu bhichumiriiye‑ko. Ka wone chiikomeesye okukora jinu Nyamuwanga ateeye imbere yeeswe, rwa omuunu unu kaabhirima muno mu‑bhwigumiirisya. 2 Chiroreererega Yeesu, okubha omwene niwe ꞉aambisiisye eriikirisya ryeswe, ka wone niwe aririkuumisya. Omwene ꞉eegumiirisiisye ku‑songa ya rikonderwa rinu ryariga niriija. Ka wone ꞉ateeganirisiisye wuri jiswaro ja okufwa ku‑musarabha. Woori eenyanjire orubhaara rwa ebhuryo rwa echitebhe cha ingʼoma cha Nyamuwanga.

3 Mwiganirisye kutyo Yeesu ꞉eegumiirisiisye kutyo abhakosi bha ebhibhiibhi bhaariga nibhamuyingirira, kutyo mwasiga okufwa omutima na okuyigwa okwikirisya Nyamuwanga. 4 Omwikomeesya okuyiga ebhibhiibhi, nawe muchaari okurwana na ebhibhiibhi okukingira okwitwa. 5 Angu, murabhiiywe emisango ja okusimbiisya omwoyo jinu Nyamuwanga ꞉aabhabhwiriiye emwe bhanu muri bhaana bhaaye? Nyamuwanga ꞉aayikire ati,

“Omwana waani, waasiga okugaya jinu Raatabhugenyi waawo kaakukengya.

Siga okufwa omutima omwanya gunu kaakugonya.

6 Okubha Raatabhugenyi kaakengya bhuri muunu unu Raatabhugenyi keenda.

Ka wone kaayaana ebhitiibha bhuri muunu unu Raatabhugenyi keekirisya abhe omwana waaye.”

7 Mbe, mwigumiirisye omwanya gunu Nyamuwanga kaabhayaana ebhitiibha. Kaakora kutyo kwa okubha emwe muri bhaana bhaaye. Atari‑wo omwana noorwo umwi unu atakuyaanwa ebhitiibha na esemwene. 8 Nyamuwanga kaayaana ebhitiibha abhaana bhaaye bhoone. Kurwa ejo, araabha Nyamuwanga atakubhayaana ebhitiibha, mumenye ati muri rwa bhaana bha mu‑masanga, mutari bhaana bhaaye. 9 Aamwi na ejo, bharaata bha ku‑chaaro bhanu ꞉bhaachibhuuye, bhaariga nibhachiyaana ebhitiibha, eswe chaariga nichibhayaana echibharo. Araabha nikwo kutyo, mbe woori, chiteenderwe okugayuka muno Raata weeswe unu ari mu‑rwire, korereki chibhe na obhuwanga? 10 Bharaata ꞉bhaachiyaaye ebhitiibha emiguuga mitooto, rwa kutyo abheene bhaaroraga ati ni kisi. Nawe Nyamuwanga kaachiyaana ebhitiibha inguru yeeswe abheene, korereki chibhe aamwi nage mu‑bhweru bhwaye. 11 Atari‑wo omuunu unu kaakonderwa omwanya gunu kaayaanwa ebhitiibha, tari kaasurumbara. Nawe, abhaanu bhanu bheeyigiiye okubha na jitungwa ja ekisi ku‑njira ya ebhitiibha, bheekaaye na omurembe na abhakora emisango ja obhurengeresi.

12 Kurwa ejo, mukomeesye amabhoko geemwe ganu gareremaaye na jingʼokora jeemwe jinu jinaganire. 13 Muribhatega ku‑njira jinu jiimire, korereki echiinu chinu chifuuwe amaguru chaasiga okuwutaara, tari chiwosibhwe.

Obhukengya ku‑bheekirisya

14 Mbe, mwikomeesyega okwikara kwa omurembe na abhaanu bhoone. Ka wone mwikomeesyega okubha abheeru mu‑bhurame bhwemwe, kwa okubha atari‑wo omuunu unu kaatura okurora Raatabhugenyi akabha atari mweru. 15 Mwiyangarirega, korereki omuunu woonewoone aasiga okugerukirwa obhwitiriranya bhwa Nyamuwanga. Ka wone, aasiga okwibhuka omuunu agati yeemwe unu ari rwa riiti riruru. Omuunu rwa oyo kaja okubhanyaasya, na okujabhiyasya abhaanu bhaafu. 16 Mwiyangarirega, korereki agati yeemwe aasiga okubha‑wo omuunu omuromesi amwi omuunu unu atakuyaana echibharo Nyamuwanga rwa kutyo Esawu aariga atakumuyaana. Omwene Esawu ꞉aagusiisye rirenga rya omwibhurwa wa obhubhere inguru ya riribhire rimwi era. 17 Mumenyere ati mmara, Esawu ejire eenda okwanjura amabhando, ˆnaaremwa. ꞉Ataabhwene omwanya gwa okuta ebhibhiibhi bhyaye, noorwo kutyo ꞉aaguyenjere na okurira amasiga mogomogo.

18 Emwe ꞉mutaakingire ku‑chiima rwa chirya cha Sinaayi chinu chaariga nichitura okukuunibhwa‑ko, chinu chaariga nichaaka omuriro, gunu gwariga guri na echisuute chaafu muno na echiiwure. 19 Ka wone ꞉mutaakingire anu Abhayisirayeeri ꞉bhoonguuwe rinyawegoona na obhuraka obhunene bhwa Nyamuwanga nibhusimura. Abhayisirayeeri bhejire bhoongwa obhuraka obhwo, nibhoobhaya muno, nibhasabhwa Nyamuwanga ati asige okuroma nabho rindi. 20 ꞉Bhaayikire kutyo, okubha ꞉bhataaturire okwigumiirisya echiraagiro chinu Nyamuwanga ꞉aaragiriiye ati, “Noorwo araabha ni tyanyi niyo irikuunʼya ku‑chiima chinu, eyeene wone yeenderwe ibhumwe na amabhuyi okukingira okufwa.” 21 Joone jinu ꞉jaakorekeene ku‑chiima cha Sinaayi ꞉jaakangisye muno abhaanu, okukingira Muusa ˆnaayika ati, “Eniyarara muno ku‑songa ya obhuyayu.”

22 Nawe emwe mwakingire ku‑chiima echindi, echiima cha Sayuuni, nigwo omusi gwa Yerusareemu irya ya mu‑rwire. Omusi ogwo, ni musi gwa Nyamuwanga omuwanga. Mu‑musi ogwo nimwo ꞉bheekumanyiisye kwa rikonderwa bhamaraayika ebhiwumbi na ebhiwumbi. 23 Emwe mwakingire mw‑ikofyanyo rinene rya abheebhurwa bha obhubhere bha Nyamuwanga, bhanu amasiina geebhwe gakaamirwe mu‑rwire. Mwakingire imbere ya Nyamuwanga, unu ari muramusi wa abhaanu bhoone na imbere ya abhaanu abharengeresi bhanu ꞉bhaafuuwe na bhanu woori bhakuumisibhwe. 24 Emwe mwakingire ku‑Yeesu, unu kaagwatanya abhaanu na Nyamuwanga mu‑ndagano inyaaya. Ka wone mwakingire ku‑sagama yaaye inu ꞉yeetikire ku‑musarabha inguru ya okusoosya‑wo ebhibhiibhi bhyeswe. Isagama eyo itakutonga okusubhya orusiima rwa isagama ya Abheeri.

25 Kurwa ejo, mutegeresyega unu kaayika na emwe. Abhayisirayeeri ꞉bhateerukire ebhitiibha omwanya gunu ꞉bhaaremere okutegeresya Muusa bhunu ꞉aabhakengiisye. Mbe woori, eswe echitura kutiki okwiruka ebhitiibha araabha echirema okutegeresya Nyamuwanga omwanya gunu kaachikengya okusooka mu‑rwire? 26 Omwanya gurya Nyamuwanga aaromaga ari ku‑chiima cha Sinaayi, echaaro ꞉chaatikimire. Nawe woori aragire ati, “Niritikimya echaaro rindi. Chitari chaaro era chinu niritikimya, tari na orwire wone.” 27 Omusango ogwo “rindi” ogweresya abhwerubhweru ati, ebhiinu bhyone bhinu ꞉bhyabhumbirwe, bhirisingisibhwa na okusoosibhwa‑wo, korereki bhisigare ebhiinu bhinu bhitakutura okusingisibhwa. 28 Kurwa ejo, chisiimega Nyamuwanga, okubha eekirisya chibhega nichisangira obhukama bhwaye bhunu bhutakutikima. Chiramyega Nyamuwanga ku‑njira inu eyimukondisya na mu‑bhwikeeya na echibharo, 29 okubha Nyamuwanga weeswe, ari rwa omuriro omururu kabhukabhu gunu ogusingaarisya chimwi.