Inyarubha ya Pawuro ku‑
Firemooni
Obhutangati
Inyarubha inu ꞉yaakaamirwe na Pawuro, itumwa ya Yeesu Kirisito. ꞉Aakaamiiye omuunu unu aariga ˆnaatogwa Firemooni. Eyeresya ati Firemooni aariga ekaaye mu‑musi gwa Korosaayi (Abhakorosaayi 4:9). Aariga ari omuniibhi, ka wone aariga ari na abhagaya. Aariga ari omwikirisya na mu‑nju yaaye nimwo bhaariga nibheekumanyisya abheekirisya. Pawuro na Firemooni bhaariga bhaamenyene kisi.
Pawuro ꞉aakaamire inyarubha inu omwanya gunu aariga ari mw‑ibhoyero mu‑musi gwa Ruumi, omwaka gwa makumi gataanu na rimwi na ebhiri (62) kutya, Kirisito eebhuuywe. ꞉Aakaamire inyarubha inu inguru ya omugaya umwi wa Firemooni, unu aariga ˆnaatogwa Oneesimo. Eyeresya ati omugaya oyo, ꞉aatorokere okusooka ku‑Firemooni. ˆNaagenda Ruumi, eyo ˆnaabhugana na Pawuro. Niwo, Pawuro ˆnaamuraasisya Emisango ja Ekisi ja Yeesu Kirisito. Oneesimo ˆneekirisya Yeesu, ˆnaachunguka.
Ku‑mwanya ogwo, omugaya woonewoone unu aariga ˆneeruka okusooka ku‑mwami waaye, neeya ˆnaagwatwa, aakabhumirwe. Woori Pawuro aariga ˆnaasubhya Oneesimo ku‑Firemooni, omwami waaye. Niwo Pawuro ˆnaayaana Oneesimo inyarubha asirire Firemooni. Ku‑nyarubha eyo, Pawuro ꞉aasabhirwe Firemooni aramire Oneesimo rwa oweejaabho, ka wone rwa omuyiri waaye mu‑Kirisito.