Okukora ja ekisi
3
1 Ubhe nuwichukya abhaanu bhabhe na echibharo ku‑bhatungi na ku‑bhatangasya bhoone na okubhagayuka. Ni bhusibhusi wone, bhabhega bhatengeejere okukora bhuri echikorwa cha ekisi. 2 Bhatongere bhasige okufuma omuunu woonewoone, bhasigega okuyomba, bhabhe na jitungwa ja ekisi na bhabhe bhoorooro muno ku‑bhaanu bhoone.3 Okubha eswe wone, kara awo chaariga chiri bhataamutaamu, bhanyatagayuka na chijigirwe. Chaariga chitungirwe na okurigira na jitungwa jimbiibhi ja bhuri mbaga. Nyabhuriko chaariga chiikaaye mu‑bhujabhi na orwiso, nichibhiiyisya na chisokeene eswe abheene kwa abheene. 4 Nawe Nyamuwanga Omuchungusi weeswe, ꞉eeresiisye bhwa ekisi na eryenda ryaye ku‑bhaanu na okuchichungura. 5 ꞉Ataachichunguuye kwa okubha ebhikorwa bhyeswe ni bhya obhurengeresi, tari ku‑chigongo chaaye era. ꞉Aachoosiisye obhujabhi bhweswe, ˆnaachiibhura bhuyaaya na Mwoyo Mweru ˆnaachikora okubha abhayaaya. 6 Nyamuwanga ꞉aachiitururiiye Mwoyo Mweru oyo kwa obhwafu, ku‑njira ya Yeesu Kirisito Omuchungusi weeswe. 7 ꞉Aakorere kutyo na okuchibhara ati chiri abharengeresi kwa obhwitiriranya bhwaye, korereki chibhe na obhwiyikanyo ati chiryanjura obhuwanga bhwa akajaanende.
8 Inyaayika eyo ni ya echimari. Woori enikusabhwa awe ukomeeresye muno inguru ya emisango ejo ku‑bhaanu, korereki abhaanu bhanu abheekirisya Nyamuwanga, bhakabhuke na okukomeera okukora ebhikorwa bhya ekisi. Emisango ejo nijo ja ekisi, ka wone ejireeta omuriiro ku‑bhaanu bhoone. 9 Nawe, wiikenge jimamba ja obhutaamutaamu, emiroobho ja amasiina ga bhasaaja, inyombo na riremo inguru ya ebhiraagiro bhya Muusa. Mu‑misango ejo joone gutari‑mo omuriiro gwonegwone. 10 Omuunu woonewoone unu kaakora abhaanu bhaawukane, nuumugonye orwa okwamba na orwa kabhiri. Ukamara okukora kutyo, araabha atakukuungwa, sigana nage chimwi. 11 Okubha woori, owumenya ati omuunu rwa oyo ni munyamuke ka omukosi wa ebhibhiibhi. Ebhikorwa bhyaye ebhibhiibhi ebhimuramura ati omwene ni muunu owa ebhibhiibhi.
Emisango ja okuragana
12 Anye niramuuye okuja okwikara mu‑musi gwa Nikapoori erya, omwanya gwa imbewo. Nawe enija okutuma Aritema amwi Tukiiko kw‑awe. Owumwi weebhwe akakukinga‑ko eyo, wiikomeesye okunyiija‑ko bhwangu, korereki chibhugane. 13 Ikomeesya okusakira Jeena, omumenyi urya wa ebhiraagiro aamwi na Apooro. Ubhayaane ebhiinu bhyone bhya okubhasakira mu‑rugendo rwebhwe, bhaasiga okukeeyerwa echiinu choonechoone. 14 Abheejaasu bhoone, bheeyigire okwikomeesye okukora ebhikorwa bhya ekisi, korereki bhabhe na obhuturo bhwa okusakira abhaanu bha obhukene bhwa bhusibhusi. Bhaakakora kutyo obhurame bhwebhwe bhutaribhurwa amatwasyo.
15 Abhaanu bhoone bhanu bhari aamwi na anye enu, abhakukeesya. Woori awe wone, nuukeesye abheendwa bheeswe mu‑riikirisya.
Obhwitiriranya bhwa Nyamuwanga bhubhe aamwi na emwe bhoone.