Ameeyigisyo ga echimari
2
1 Nawe awe Tiito, mu‑meeyigisyo gaawo, wiyigisye abhaanu ameeyigisyo ga echimari era. 2 Iyigisya abhakaruka, bhabhe abheeyingirisi, bhabhe bha echibharo, bhabhe na obhwengeeso, bhabhe bharumateene chimwichimwi mu‑riikirisya, mu‑ryenda na mu‑bhwigumiirisya.3 Kutyokutyo abhakwekuru wone, ubheeyigisye bhabhe na jitungwa jinu ejikusya Nyamuwanga. Bhasige okubha abharomi bha abhaanu, bhasige okubha abhakorwa, tari abhakenwa bheeyigisye ameeyigisyo ga ekisi. 4 Ku‑njira eyo, abhaja okwiyigisya abhagasi abhatooto, okwenda abharume bheebhwe na abhaana bheebhwe. 5 Ka wone, abhagasi abhatooto, bheeyingirire, bhabhe bheetongeeye, bhakorega kisi emirimu mu‑misi jeebhwe, bhagayuke abharume bheebhwe. Bhakomeeresye bhakore kutyo, korereki omusango gwa Nyamuwanga gusige okwifumirisibhwa.
6 Nyabhuriko abhasigaji, ubhasimbiisye korereki bheeyingirirega. 7 Awe wone, ku‑misango ejo joone, ubhe echijekekanyo cha okwiyikanyibhwa cha ebhikorwa bhya ekisi. Mu‑meeyigisyo gaawo, weeresye echimari na echibharo. 8 Ameeyigisyo gaawo gabhe ga echimari ganu abhaanu bhatakubhona‑mo echikayo choonechoone. Noorwo omuunu unu kaabha atakwimire‑ko eesware, kwa okubha, atari na omusango gwonegwone omubhiibhi gwa okwayika inguru yeeswe.
9 Nyabhuriko abhagaya, ubheeyigisye okugayuka na okukondisya abhaami bheebhwe ku‑bhuri omusango. Bheeyigisye wone bhasige okubhambasyanya nabho. 10 Noorwo bhasige okubheebhira, tari bheeresye obhwiyikanyibhwa bhwone, korereki ku‑misango joone bhareete jikuma ja ekisi ku‑meeyigisyo ga Nyamuwanga Omuchungusi weeswe.
11 Okubha obhwitiriranya bhwa Nyamuwanga bhunu obhureeta obhuchungusi ku‑bhaanu bhoone bhwasweruuywe. 12 Obhwitiriranya obhwo, obhuchiiyigisya okurema ebhibhiibhi na obhurigire bhwa echaaro, korereki chirame obhurame bhwa okwiyingirira, bhwa obhurengeresi na obhwa okuramya Nyamuwanga ku‑chaaro cha woori chinu. 13 Eswe, echirindirira chiiyikanyisye inguru ya orusuku rwa okuruguusya runu Yeesu Kirisito arisubha ari mw‑ikusyo ryaye. Omwene niwe Nyamuwanga omukuru na Omuchungusi weeswe. 14 Omwene ꞉aasoosiisye obhurame bhwaye inguru yeeswe, korereki acheerure okusooka mu‑bhibhiibhi bhyone. ꞉Aacheesiisye, korereki chibhe abhaanu bhaaye omwene, bhanu echiigomba okukora ebhikorwa bhya ekisi.
15 Mbe, iyigisya abhaanu emisango ejo, bhasimbiisye na okubhagonya ku‑bhuturo bhwone. Ka wone, omuunu woonewoone asige okukugaya.