Amanaga ga eriikirisya rya abhaanu bha kara
11
1 Mbe, eriikirisya ni kubha na echimari cha emisango jinu echiiyikanya. Ka wone ni kwikirisya kata ati emisango jinu chitakurora woori ni ja chimari. 2 Ku‑njira ya eriikirisya, bhasaaja weeswe ꞉bhaakondisiisye Nyamuwanga muno. 3 Ku‑njira ya eriikirisya, chimenyere ati Nyamuwanga ꞉aabhumbire echaaro choone okutura ku‑musango gwaye. ꞉Aabhumbire ebhiinu bhinu ebhibhonekana okusooka ku‑bhiinu bhinu bhitakubhonekana.4 Eriikirisya niryo ꞉ryakorere Abheeri ˆnaasoosisya Nyamuwanga echoogo cha ekisi okukira chinu Kayini ꞉aasoosiisye.a Ku‑riikirisya eryo Nyamuwanga ꞉aabharire Abheeri okubha omuunu omurengeresi, na ˆnaaramira echoogo chaaye. Noorwo kutyo Abheeri ꞉aafuuwe, nawe eriikirisya ryaye erigenderera okubha echijekekanyo cha ekisi kw‑iswe noorwo reero inu.
5 Eriikirisya niryo ꞉ryakorere Enooke ˆnaagegwa okusooka ku‑chaaro anu atafuuwe wuri. ꞉Ataabhonekeene rindi kwa okubha Nyamuwanga ꞉aamugegere okugenda mu‑rwire. Noorwo Ebhikaame Ebhyeru ebhisoosya obhubhambaasi ati, omwanya gunu aariga achaari kugegwa, aakondisyaga Nyamuwanga.b 6 Atari‑wo omuunu unu kaatura okukondisya Nyamuwanga araabha atakumwikirisya. Bhuri muunu unu keenda okufogera ku‑Nyamuwanga, eenderwe okwikirisya ati Nyamuwanga ari‑wo, ka wone niwe kaayaana echiyaanwa bhanu abheenda okumusombookerwa.
7 Eriikirisya niryo ꞉ryakorere Nuuwu ˆnaagayuka Nyamuwanga, omwanya gunu Nyamuwanga ꞉aamukengiisye inguru ya emisango jinu jaariga jichaari okukorekana. ꞉Aakonjere echiinu rwa ingarabha inene, korereki achungure abhaanu bhaaye.c Ku‑njira ya eriikirisya eryo, ˆneekindika okusooka ku‑bhaanu bha ku‑chaaro bhanu ꞉bhateekirisiisye Nyamuwanga, korereki bharamurwe. Ka wone, ku‑njira ya eriikirisya eryoeryo, Nyamuwanga ˆnaabhara Nuuwu okubha omurengeresi imbere yaaye.
8 Eriikirisya niryo ꞉ryakorere Bhurayimu ˆnaagayuka Nyamuwanga, omwanya gunu ꞉aabhwiriiywe ati asooke mu‑chaaro chaaye, agende mu‑chaaro chinu Nyamuwanga ꞉aaragire okumuyaana. Bhurayimu ꞉aasookere mu‑chaaro chaaye, noorwo kutyo ꞉ataamenyere ati aariga ˆnaagenda ki.d 9 Eriikirisya niryo ꞉ryakorere Bhurayimu ˆneekara rwa omugenyi mu‑chaaro chinu ꞉aaragirwe na Nyamuwanga. Aariga eekaaye eyo mu‑bhiwuuna. Isaaka na Yakobho wone ꞉bheekaaye mu‑bhiwuuna. Abheene bhaariga nibhasangira aamwi omurago guryagurya gwa echaaro chinu Bhurayimu ꞉aaramiiye. 10 Bhurayimu ꞉aakorere kutyo, kwa okubha aariga ˆneeyikanya okwikara mu‑musi gwa ekisi gwa akajaanende koone, omusi gunu Nyamuwanga omwene ꞉aagwiraabhire na okuguumbaka.
11 Eriikirisya niryo ꞉ryakorere Saara ˆnaabhona obhuturo bhwa okujira inda na okwibhura omwana, noorwo kutyo aariga akokoowe,e kwa okubha aariga ˆneekirisya ati Nyamuwanga kaakuumisya omurago gwaye. 12 Kurwa ejo, okusooka ku‑muunu umwi, niwe Bhurayimu, unu aariga ari mukaruka muno,f ꞉bheebhuuywe abhaanu bhaafu, rwa jinjota ja mu‑rutumba, ka wone rwa omusenyi gwa ku‑nyanja gunyatabharwa.g
13 Abhaanu abho bhoone, ꞉bhaagendereeye okubha na eriikirisya okukingira okumaama nyombe. ꞉Bhaamaamire nyombe bhachaari okubhona wuri jinu Nyamuwanga aariga abharagire, nawe bhaariga nibhajirora kura na okujikondererwa. Nibheekirisya ati abheene bhaariga bhari bhagenyi na abhayitingʼani ku‑chaaro kunu. 14 Abhaanu bhanu abhaayika emisango rwa ejo, abheeresya abhwerubhweru ati abhayenja echaaro chinu bharibha abheenengo omwo. 15 Araabha bhakabheeye nibheeganirisya inguru ya echaaro cheebhwe anu ꞉bhaasookere, mbe bhakabheeye na omwanya gwa okusubha eyo. 16 Nawe abhaanu abho bhaariga nibheesigomba echaaro cha ekisi muno, nikwo okwayika ati echaaro cha mu‑rwire. Niyo isonga Nyamuwanga atakurora jiswaro okubhirikirwa ati Nyamuwanga weebhwe, okubha abheeraabhiiye omusi.
17 Eriikirisya niryo ꞉ryakorere Bhurayimu ˆneekirisya okusoosya Isaaka omwana waaye abhe echoogo ku‑Nyamuwanga. ꞉Eekirisiisye okukora kutyo omwanya gunu Nyamuwanga ꞉aamuregeejere. Bhurayimu niwe ꞉aaramiiye emirago okusooka ku‑Nyamuwanga, nawe ꞉eekirisiisye okusoosya omwana waaye eenyere abhe echoogo,h 18 noorwo kutyo Nyamuwanga aariga abhwiriiye Bhurayimu ati, “Okutura ku‑Isaaka uribhona orwibhuro runu ruritogwa ati ni rwawo.”i 19 Bhurayimu ꞉eekirisiisye ati Nyamuwanga ari na obhuturo noorwo bhwa okusuurura Isaaka okusooka mu‑bhafuuwe. Bhurayimu ꞉aabhwene rindi Isaaka unu aariga ari wuti afuuwe, ˆnaasuururwa.
20 Eriikirisya niryo ꞉ryakorere Isaaka ˆnaasabhirwa abhaana bhaaye amabhando, nikwo okwayika ati Yakobho na Esawu inguru ya emisango jinu jirikorekana omwanya gunu oguuja.j
21 Eriikirisya niryo ꞉ryakorere Yakobho, omwanya gunu ꞉aarebhereeye okufwa, ˆnaayaana abhaana bhabhiri bha Jejefuk amabhando na okuramya Nyamuwanga keenu eeyekekerega ku‑simbo yaaye ya okwitimbirisisya‑ko.
22 Eriikirisya niryo ꞉ryakorere Jejefu, omwanya gunu ꞉aarebhereeye okufwa, ˆnaayika emisango inguru ya kutyo Abhayisirayeeri bharisooka mu‑chaaro cha Miisiri. Ka wone ˆnaabharagirira ati bharigega amawa gaaye na okugenda okugasiika mu‑chaaro cha Kanaani.l
23 Eriikirisya niryo ꞉ryakorere abheebhusi bha Muusa nibhamubhisa meesi gasatu okusookerera omwanya gunu ꞉eebhuuywe. ꞉Bhaakorere kutyo kwa okubha ꞉bhaarorere ati Muusa ꞉eebhuuywe ari mwana omureesi muno, noorwo ꞉bhatoobhayire okunyamura riragirirom rya Faraawo omukama wa mu‑chaaro cha Miisiri. 24 Eriikirisya niryo ꞉ryakorere Muusa, omwanya gunu ꞉aabheeye omuunu omukuru, ˆnaarema okubhirikirwa omwana wa omuyaasya wa Faraawo. 25 ꞉Eetoorere okunyaaka aamwi na abhaanu bha Nyamuwanga, okukira okukondererwa mu‑bhibhiibhi akatungu kafuyi era. 26 ꞉Aarorere ati okufumwa inguru ya Kirisito ni bhuniibhi bhwafu muno okukira okubhona obhuniibhi bhwone bhwa ku‑chaaro cha Miisiri. ꞉Aarorere kutyo kwa okubha aariga ˆneeyikanya echiyaanwa chinu Nyamuwanga arimuyaana omwanya gunu oguuja.
27 Eriikirisya niryo ꞉ryakorere Muusa ˆnaasooka mu‑chaaro cha Miisiri, okuubhaya wuri risungu rya omukama. ꞉Eegumiirisiisye kwa okubha aariga ari wuti kaarora Nyamuwanga unu atakubhonekana. 28 Eriikirisya niryo ꞉ryakorere Muusa ˆnaaragirira Abhayisirayeeri bheechukega ichikukuru ya Okwambuka. ˆNaabhabhwira bhabhambage orwamba ku‑bhijingiti bhya emiryango, korereki maraayika unu kaasingaarisya abheebhurwa bhoone bha obhubhere aakatura, asige okwita abhaana bheebhwe bha obhubhere.n 29 Eriikirisya niryo ꞉ryakorere Abhayisirayeeri nibhaambuka inyanja ya Syamu kwa amaguru rwa kutyo abhaanu abharibhata ku‑chaaro echuumu. Nawe Abhamiisiri bhejire bhaaregeeja okukora kutyo, nibhafundikirwa na amanji, nibhasingaarika bhoone.o
30 Eriikirisya niryo ꞉ryakorere Abhayisirayeeri nibheeyinda omusi gwa Yeeriko omwanya gwa siku etaanu na ebhiri, na jindugu jaagwo nijigwa.p
31 Eriikirisya niryo ꞉ryakorere Raabhu, omugasi unu eegusyaga okwibhonera ribhona, ꞉ataasingaarisiibhwe aamwi na abhaanu bhanu bhaariga bhatakugayuka Nyamuwanga. ꞉Aawonere kwa okubha ꞉aakumire abhatatirisya Abhayisirayeeri iika ewaaye kwa omurembe.q
32 Mbe, woori naayike ki okukira ejo? Nitari na omwanya gwa okutonda inguru ya eriikirisya rya Gidiyooni, Bharaaki, Saamusooni, Jeefuta, Dawudi, Samweri na abharagi. 33 Okuruubhana na eriikirisya ryebhwe, abhaanu abho ꞉bhaarwanire riremo na abhakama bha ebhyaro ebhindi, nibhayiga. ꞉Bhaakorere emisango ja obhurengeresi na okuramira jinu Nyamuwanga ꞉aaragire. Bhaariga bhari na obhuturo bhwa okubhumbatanya eminwa ja jiitare. 34 ꞉Bhaasimiisye emiriro emiruru kabhukabhu. ꞉Bhaawonere okwitwa kwa imbanda. Bhaariga bhari bhajorobhoke, nawe Nyamuwanga ꞉aabhayaaye amanaga ga okuyiga riremo na okubhirimya abhasirikare bha ebhyaro ebhindi.
35 Eriikirisya niryo ꞉ryakorere abhagasi abharebhe nibharamira rindi abhayiri bheebhwe bhanu bhaariga bhaafuuwe, nawe nibhasuuruka. Abhandi bhawutaasiibhwe muno na okwitwa. ꞉Bhateekirisiisye okusuruumurwa, kwa okubha bhaariga nibheeyikanya ati Nyamuwanga aakabhasuuruuye, korereki bhabhone obhurame bhwa ekisi muno. 36 Abhandi ꞉bhaakoomooywe na okubhumwa na jijaridi. Abhandi ꞉bhaabhoyerwe na amaseega na okweswa mw‑ibhoyero. 37 Ka wone abhandi ꞉bhaabhumirwe kwa amabhuyi okukingira okufwa, abhandi nibhabhuturwa kwa emisumeeno,r na abhandi ꞉bheetirwe kwa imbanda. Abhandi bheeyindayindaga bhafwaye jinjayi ja jinaama na eja jimbusi. Ni bhaanu bhataka bhanu ꞉bhaanyaasiibhwe na okukorerwa amabhiibhi maafu. 38 Abhaanu abho ꞉bhaayengereyengere mw‑ibhara na mu‑bhiima, bheekaraga mu‑senga na mu‑moobho. Echaaro chaariga chiteeyire okubha na abhaanu abho.
39 Abhaanu abho bhoone ꞉bhaakondisiisye Nyamuwanga ku‑songa ya eriikirisya ryebhwe. Nawe atari‑wo noorwo umwi unu ꞉aaramiiye jinu Nyamuwanga aariga aragire. 40 Nyamuwanga ꞉aakorere kutyo, kwa okubha aariga achiiraabhiiye emisango ja ekisi muno, korereki chiramire jinu ꞉aachiragire eswe aamwi na abheene.