Abhayebhuraniya 10

1 Mbe, ebhiraagiro bhya Muusa ni chijekekanyo era cha emisango ja ekisi jinu ejiija, nawe ebhyene bhitari emisango ejo ejeene. Kurwa ejo ebhyogo bhinu abhaanu abhasoosya bhuri muguuga okuruubhana na ebhiraagiro ebhyo, bhitakutura wuri noorwo na akatyari okwesya abhaanu bhanu abharamya Nyamuwanga. 2 Araabha ebhyogo ebhyo bhyakabheeye bhibheesiisye chimari ebhibhiibhi bhyebhwe, bhataakagendereeye okwiyungwa mu‑mitima jeebhwe ati ni bhakosi bha ebhibhiibhi. Ka wone bhakabheeye bhaasigire okusoosya ebhyogo bhyebhwe, kwa okubha Nyamuwanga akabheeye aabheesiisye rumwi era. 3 Nawe ebhyogo ebhyo, nikwo okwayika ati, bhinu abhasoosya bhuri muguuga, ebhibheechukyaga ebhibhiibhi bhyebhwe, 4 kwa okubha orwamba rwa jindume na orwa jimbusi rutakutura okusoosya‑wo ebhibhiibhi bhya abhaanu. 5 Kurwa ejo omwanya gunu Kirisito ꞉eejire ku‑chaaro chinu, ꞉aabhwiriiye Nyamuwanga ati,

“Awe ꞉uteendere echiyaanwa noorwo echoogo,

tari wiiraabhire omubhiri gwani okubha echoogo.

6 Awe ꞉utaakondereeywe na ebhyogo bhya okwochiibhwa na okurungusibhwa,

noorwo na ebhyogo inguru ya ebhibhiibhi.

7 Niwo ninaayika ati,

‘Awe Nyamuwanga waani! Anye niri anu,

korereki nikorega okwenda kwawo,

rwa kutyo jikaamirwe mu‑Bhikaame Ebhyeru inguru yaani.’”

8 Nyabharinyabhari Kirisito ꞉aayikire ati, “Awe ꞉uteendere ebhiyaanwa, ebhyogo, ebhyogo bhya okwochiibhwa na okurungusibhwa na ebhyogo inguru ya ebhibhiibhi, ka wone ꞉utaabhikondereeywe.” ꞉Aayikire ejo noorwo kutyo ebhyogo ebhyo bhyone bhyariga nibhisoosibhwa okuruubhana na ebhiraagiro bhya Muusa. 9 Neeya ˆnaayika ati, “Awe Nyamuwanga waani! Anye niri anu, korereki nikorega okwenda kwawo.” Kurwa ejo Nyamuwanga ꞉aasoosiisye‑wo ebhyogo bhya okwamba ebhyo, na inguru yaaye ˆnaatuura‑wo echoogo cha Kirisito. 10 Woori, kwa okubha Yeesu aariga ˆnaakora okwenda kwa Nyamuwanga, Nyamuwanga kaacheesya ebhibhiibhi bhyeswe ku‑njira ya Yeesu Kirisito okwisoosya rumwi okubha echoogo.

11 Okuruubhana na indagano ya kara, bhuri rusuku abhagabhisi abhakorera emirimu Nyamuwanga na okusoosya kwiya kaafu ebhyogo bhiryabhirya, bhinu bhitakutura wuri noorwo na akatyari okusoosya‑wo ebhibhiibhi. 12 Nawe Kirisito ꞉eesoosiisye rumwi okubha echoogo, korereki achisoosye‑ko ebhibhiibhi bhyeswe. Omwene niwe echoogo chinu chiiyire kajaanende koone. Niwo ˆneenyanja orubhaara rwa ebhuryo rwa Nyamuwanga. 13 Eyo kaarindirira okukingira omwanya gunu Nyamuwanga arituura abhasoko bhaaye emwaro ya amaguru gaaye. 14 Mbe, kwa okubha Kirisito ꞉eesoosiisye okubha echoogo rumwi era, ꞉aakuumisiisye bhanu bhakorerwe okubha abhaanu bhaaye akajaanende koone.

15 Wone Mwoyo Mweru kaachisoosisya obhubhambaasi ati emisango ejo ni ja chimari, ˆnaayikaga ati,

16 “Raatabhugenyi kaayika ati,

‘Inu niyo indagano inyaaya

inu nirikora na abhaanu bhaani ku‑siku jinu ejiija.

Enija okutuura ebhiraagiro bhyani mu‑myoyo jeebhwe,

niribhikaama mu‑bhwiganirisya bhwebhwe.’”

17 Neeya Mwoyo Mweru ˆnaayika ati, “Nitariichuka rindi ebhibhiibhi bhyebhwe noorwo ebhikorwa bhyebhwe ebhijabhi.” 18 Mbe, Nyamuwanga aafwira echigongo abhaanu ebhibhiibhi. Kutyo, bhutari‑wo obhukene bhwa okusoosya ebhyogo bhya okusoosya‑wo ebhibhiibhi rindi.

Obhwitaage bhwa okugenda imbere ya Nyamuwanga

19 Abhayiri bhaani mu‑riikirisya, ku‑songa ya isagama ya Yeesu, chiri na obhwitaage bhwa okwingira Ayeeru a Ayeeru okuubhaya wuri. 20 Ku‑njira ya orufu rwaye, omwene ꞉aachiiguriiye injira inyaaya inu eyichitangasya okuja ku‑bhuwanga, korereki chiture okufogera imbere ya Nyamuwanga. Chiri wuti echiyitingʼana mw‑ipajiya na okwingira Ayeeru a Ayeeru. 21 Eswe chiri na Omugabhisi Omukuru unu keemereegururu inju ya Nyamuwanga. 22 Kurwa ejo chifogere imbere ya Nyamuwanga chiri na emyoyo emyeru na eriikirisya rya echimari, okubha Nyamuwanga eesiisye emitima jeeswe emijabhi ku‑njira ya isagama ya Yeesu, na oosiisye emibhiri jeeswe na amanji ameeru. 23 Chiikomeesye muno okugwatirira jinu echiikirisya na okwiyikanya, okubha Nyamuwanga unu ꞉aaragire, ni mwiyikanyibhwa. 24 Ka wone cheenderwe chisimbiisyanye eswe abheene kwa abheene, korereki cheendane na okukoreraniraga eja ekisi. 25 Chaasiga okusiga okubhugana aamwi, rwa kutyo abhaanu abhandi bhaasigire okubhugana. Tari chigenderere okusimbiisyanya noorwo okukira awo, okubha chimenyere ati orusuku rwa okusubha kwa Raatabhugenyi ruri yeeyi.

26 Araabha echigenderera okukora ebhibhiibhi kwa okukararira keenu chaamarire okumenya echimari cha Nyamuwanga, mbe chitari‑wo echoogo echindi chinu echitura okuchisoosisya‑wo echibhiibhi. 27 Mbe woori, gunu gusigaaye, ni kurindirira kwa obhuyayu indamu ya Nyamuwanga na omuriro omururu gunu gurisingaarisya abhaanu bhoone bhanu abharema Nyamuwanga. 28 Omuunu woonewoone unu aaremaga okuruubha ebhiraagiro bhya Muusa, aariga ˆneetwa okufwirwa echigongo wuri, araabha abhabhambaasi bhabhiri amwi bhasatu bhaasoosya obhubhambaasi ati chimari aakora kutyo. 29 Mbe woori mwiganirisye! Ebhitiibha bhiribha kutiki ku‑muunu unu kaagaya Omwana wa Nyamuwanga na okurora isagama ya indagano inu ꞉yaamwesiisye noorwo ebhibhiibhi bhyaye ati chitari chiinu cha obhugajuro? Angu, ebhitiibha bhiribha kutiki ku‑muunu oyo, nikwo okwayika ati, unu keeyimirisya Mwoyo Mweru wa obhwitiriranya? 30 Chimenyere ati Nyamuwanga ꞉aayikire ati, “Okusubhya orusiima ni murimu gwani, anye naanye nirisubhya orusiima.” Ka wone ꞉aayikire ati, “Raatabhugenyi ariramura abhaanu bhaaye.” 31 Ni musango gwa okuubhaya muno omuunu okugwa mu‑mabhoko ga Nyamuwanga omuwanga.

32 Nawe mwichuke jisiku jinu ꞉mwaambire okwikirisya Kirisito. Noorwo kutyo ꞉mwabhwene ebhinyaasyo bhyafu, nawe mwariga nimwigumiirisya ebhinyaasyo ebhyo. 33 Omwanya ogundi mwariga nimufumwa na okunyaasibhwa imbere ya abhaanu bhaafu. Omwanya ogundi mwariga nimusakira bhanu bhaariga nibhabhona ebhinyaasyo rwa emwe. 34 Mwariga nimufwira echigongo abheejaanyu bhanu ꞉bhaabhoyerwe mu‑mabhoyero. Ka wone omwanya gunu ꞉mwateesibhwe ebhiinu bhyemwe, ꞉mwegumiirisiisye kwa rikonderwa, kwa okubha emwe ꞉mwamenyere ati muri na ebhiinu bhya ekisi muno bhinu bhitariwaa‑wo wuri.

35 Kurwa ejo, mugenderere okubha na ribhaasi eryo, kwa okubha ku‑njira eyo muriramira echiyaanwa echinene muno okusooka ku‑Nyamuwanga. 36 Mwenderwe mwigumiirisyega, korereki mubhe nimukora jinu Nyamuwanga keenda. Ku‑njira eyo, muriramira jinu Nyamuwanga ꞉aaragire okubhayaana. 37 Jikaamirwe mu‑Bhikaame Ebhyeru ati,

“Kasigaaye‑wo katungu kafuyi muno,

oyo unu kaaja, arikinga, ka wone atarikoora wuri.

38 Omuunu unu aribha na obhuwanga, ni unu Nyamuwanga kaabhara ati ni murengeresi ku‑njira ya eriikirisya ryaye.

Nawe araabha kaasiga okunduubha anye, nitarimukondererwa wuri noorwo na akatyari.”

39 Mbe, eswe chitari rwa abhaanu bhanu abhasiga okuruubha Nyamuwanga, nibhasingaarika. Tari chiri aamwi na bhanu abhamwikirisya, nibhachunguka.