Abhayebhuraniya 9

Obhutinge bhwa indagano ya okwamba

1 Mbe, indagano ya okwamba irya, yaariga iri na ebhiraagiro bhinu abhaanu bhaariga nibhabhigayuka omwanya gunu bhaaramyaga Nyamuwanga. Ka wone indagano eyo yaariga iri na ebhiraagiro ku‑rubhaara rwa ayeeru wa okuramya Nyamuwanga ku‑chaaro kunu. 2 Riyeema rya okuramirisya‑mo Nyamuwanga, ꞉ryombakirwe riri na ebhisago bhibhiri. Mu‑chisago cha okwamba gwariga guri‑mo omutereko gwa okutuura‑ko jidara, na imeeja ya okutuura‑ko emikaate imbere ya Nyamuwanga. Echisago cha okwamba echo chaariga nichitogwa ati Ayeeru. 3 Mw‑iyeema eryo rwariga riri‑mo ripajiya rinu ryariga niryawukanya echisago cha okwamba na echa kabhiri. Echisago cha kabhiri chaariga nichitogwa ati Ayeeru a Ayeeru. 4 Mu‑chisago echo bhyariga bhiri‑mo na echigabhiro cha jinaaryo cha okwotera‑ko obhubhaani. Ka wone ryariga riri‑mo risandikwa rya indagano ya Nyamuwanga rinu ryariga rikaatirwe na inaaryo mbaara joone. Mw‑isandikwa omwo rwariga ruri‑mo orubhiga rwa inaaryo, runu rwariga ruri na emanu. Ka wone mw‑isandikwa omwoomwo yaariga iri‑mo isimbo ya Aruuni inu ꞉yaafuukire, na ebhibhaara bhibhiri bhya amabhuyi bhinu bhyariga bhikaamirwe‑ko ebhiraagiro ekumi bhya Indagano. 5 Inguru ya risandikwa eryo gaariga gari‑ko amasusano ga ebhibhumbwa bhibhiri bhinu bhyariga nibhitogwa ati makerubhi. Ebhibhumbwa ebhyo bhyariga nibhyeresya rikusyo rya Nyamuwanga. Ebhibhumbwa ebhyo bhyariga bhiri na amabhabha ganu gafundikiiye orubhaara runu ebhibhiibhi ebhifwirwa echigongo. Nawe woori chitakutura okujitonda joone kisikisi kutyo jiri.

6 Omwanya gunu ebhiinu ebhyo bhyone bhyariga nibhimara okwiraabhwa, abhagabhisi bhaariga nibheengira bhuri rusuku mu‑chisago cha okwamba chirya cha riyeema na okukorera Nyamuwanga emirimu ja obhugabhisi. 7 Nawe omugabhisi omukuru eenyere niwe aariga ˆneekirisibhwa okwingira mu‑chisago cha kabhiri chirya, wone eengiraga rumwi era ku‑muguuga. Ka wone omwanya gunu aariga ˆneengira, eendwaga okubha na orwamba rwa ityanyi. Orwamba orwo nirwo rwariga ruri choogo ku‑Nyamuwanga inguru ya okufwirwa echigongo ebhibhiibhi bhya omugabhisi na ebhibhiibhi bhya abhaanu abhandi bhinu bhaariga nibhakora okumenya wuri. 8 Okuruubhana na emisango ejo joone, Mwoyo Mweru kaacheeresya ati injira ya okwingira Ayeeru a Ayeeru yaariga ichaari okwigurwa ku‑bhaanu abhandi, omwanya gunu riyeema rya okwamba na obhutinge bhwaryo bhwariga bhuchaari‑wo.

9 Emisango joone jinu jaariga nijikorekana mw‑iyeema rirya ni chijekekanyo ku‑mwanya gunu gwa woori. Echijekekanyo echo echeeresya ati, echiyaanwa na echoogo bhinu ebhisoosibhwa ku‑Nyamuwanga, bhitakutura okwesya emitima ja abhaanu bhanu abharamya Nyamuwanga. 10 Okubha emisango ejo jaariga jiri ja echinyamubhiri, ja ebhiryo, ja ebhinywebhwa, na eja okwiyesya emibhiri era. Ejo joone jiriwaa‑wo omwanya gunu Nyamuwanga arituura‑wo obhutinge obhuyaaya.

Yeesu ni echoogo echikuumiiye

11 Kirisito ꞉eejire, korereki abhe Omugabhisi Omukuru wa obhutinge obhuyaaya bhunu bhwachireetera emisango ja ekisi. Omwene niwe kaakora emirimu mw‑iyeema erindi rinu riri rya ekisi muno, ka wone rikuumiiye okukira rya okwamba rirya. Riyeema eryo ꞉ritoombakirwe na omuunu, obhugajuro bhwago ni ati, riyeema eryo ritari rya ku‑chaaro kunu. 12 Omwene ꞉eengiiye rumwi era Ayeeru a Ayeeru. ꞉Ateengiiye eyo na orwamba rwa jimbusi amwi rwa ebhinyara, tari ꞉eengiiye eyo na isagama yaaye omwene, korereki acheerure akajaanende koone. 13 Okuruubhana na ebhiraagiro bhya Muusa, abhagabhisi bhaariga nibhamiijirira orwamba rwa jimbusi na orwa jindume na riifu rya echinyara ku‑bhaanu bhanu bhaariga bhari bhajabhi, korereki bheesibhwe emibhiri jeebhwe. 14 Nawe isagama ya Kirisito iri na amanaga muno okukira orwamba rwa jityanyi ejo! Omwene ꞉eesoosiisye ku‑Nyamuwanga ku‑bhuturo bhwa Mwoyo wa akajaanende koone, korereki abhe echoogo chinu chitari na esojorero ryoneryone. Isagama yaaye niyo eyicheesya emitima jeeswe inguru ya ebhikorwa bhinu ebhireeta orufu, korereki chikorere emirimu Nyamuwanga omuwanga.

15 Ku‑songa eyo, Kirisito niwe kaagwatanya abhaanu na Nyamuwanga mu‑ndagano inyaaya, korereki abhaanu bhanu Nyamuwanga aawuuwe, bhabhone obhuwanga bhwa kajaanende koone bhunu ꞉aaragire okubhayaana. Ejo ejitura okukorekana kutyo kwa okubha Kirisito ꞉aafuuwe korereki eerure abhaanu okusooka mu‑bhibhiibhi bhinu bhaariga nibhakora omwanya gwa indagano ya kara.

16 Araabha omuunu akaamire inguru ya obhwanjusi bhwa ebhiinu bhyaye, amakaamo ganu akaamire agakora emirimu era omwanya gunu omuunu oyo owubha aafuuwe. 17 Jinu akaamire jitakubha na amanaga noorwo na akatyari araabha achaaramire. Nawe aakafwa, ejibha na amanaga. 18 Nikwo okukora noorwo indagano ya kara irya yaariga iri na amanaga era ku‑songa ya orwamba rwa jityanyi runu ꞉rwetikire.

19 Muusa ejire aamara okuraasisya Abhayisirayeeri bhoone ebhiraagiro bhyone bhya Nyamuwanga rwa kutyo bhyariga bhiragiriiye, ꞉aagegere orwamba rwa ebhinyara na orwa jimbusi, ˆnaarusaasya na amanji. Niwo ˆnaamiijira orwamba orwo ku‑chitabho cha ebhiraagiro na ku‑bhaanu bhoone. ꞉Aakorere kutyo na amagaafu amatukurasi ganu ꞉gaabhoyerwe kw‑itabhi rya riiti rinu eritogwa ati yisopo. 20 Niwo ˆnaabhwira abhaanu bhoone ati, “Runu nirwo orwamba runu orweresya indagano ya Nyamuwanga inu ꞉aabharagiriiye ati muyigwatega.” 21 Nyabhuriko, Muusa ꞉aamijiriiye orwamba kw‑iyeema na ku‑bhiinu bhyone bhinu bhaariga nibhakorera emirimu omwanya gunu bhaariga nibharamya Nyamuwanga. 22 Okuruubhana na ebhiraagiro bhya Muusa, orwamba nirwo rwariga nirwesya wuti bhuri chiinu. Araabha orwamba ruteetikire, Nyamuwanga atakufwira echigongo abhaanu ebhibhiibhi bhyebhwe.

Okwisoosya ku‑Kirisito

23 Riyeema rya okuramirisya‑mo Nyamuwanga na ebhiinu bhyone bhinu abhagabhisi bhaariga nibhakorera emirimu okusoosya echoogo, bhyariga bhiri bhijekekanyo bhya ebhiinu bhinu bhiri mu‑rwire eyo. Riyeema na ebhiinu ebhyo bhyariga nibhyesibhwa ku‑njira ya orwamba rwa jityanyi, nawe ebhiinu bhya mu‑rwire bhyenderwe okwesibhwa kwa echoogo chinu chiri cha ekisi okukira orwamba orwo rwa jityanyi. 24 Kirisito ꞉ateengiiye Ayeeru a Ayeeru anu oombakirwe na omuunu. Orubhaara orwo ni chijekekanyo cha orubhaara rwa echimari runu ruri mu‑rwire. Tari omwene ꞉eengiiye mu‑rwire orwene. Eyo niyo kaachisabhirwa woori imbere ya Nyamuwanga. 25 Omugabhisi omukuru eengiraga Ayeeru a Ayeeru bhuri muguuga ari na orwamba rwa jityanyi. Nawe Kirisito ꞉ateengiiye mu‑rwire korereki eesoosye okubha echoogo kwiya kaafu. Tari ꞉eengiiye ˆneesoosya rumwi era. 26 Araabha jikabheeye jitari kutyo, mbe, akeenderwe okunyaaka kwiya kaafu okusookerera okubhumbwa kwa echaaro. Nawe woori mu‑siku ja obhuteero jinu, eejire na okwisoosya okubha echoogo rumwi era, korereki achisoosye‑ko ebhibhiibhi bhyeswe. 27 Bhuri muunu atereeywe‑wo okufwa rumwi era, akamara okufwa kaarindirira okuramurwa na Nyamuwanga. 28 Nyabhuriko Kirisito ꞉aasoosiibhwe okubha echoogo rumwi era, korereki asoosye‑wo ebhibhiibhi bhya abhaanu bhaafu. Kirisito ariija rwa kabhiri, nawe omwanya ogwo atariija okusoosya‑wo ebhibhiibhi. Tari ariija okuchungura abhaanu bhanu abhamurindirira mu‑bhwikomeesya.