Yeesu ni Mugabhisi Omukuru wa Indagano Inyaaya
8
1 Omusango omunene mu‑joone ejo nigwo gunu. Eswe chiri na Omugabhisi Omukuru wa imbaga eyo, unu eenyanjire mu‑rwire eyo, orubhaara rwa ebhuryo rwa echitebhe cha ingʼoma cha Nyamuwanga owa obhuturo bhwone. 2 Eyo kaakora emirimu ja Omugabhisi Omukuru ayeeru, mw‑iyeema rya echimari rinu ꞉ritoombakirwe na omuunu, tari Raatabhugenyi omwene niwe ꞉aaryumbakire.3 Bhuri mugabhisi omukuru kaakorwa okubha omugabhisi korereki asoosisye Nyamuwanga echiyaanwa na echoogo. Nyabhuriko Omugabhisi Omukuru weeswe oyo, eenderwe wone abhe na echiinu cha okusoosisya Nyamuwanga. 4 Araabha Yeesu akagendereeye okurama ku‑chaaro kunu, ꞉ataakabheeye omugabhisi wuri, kwa okubha ku‑chaaro kunu bhaamarire okubha‑ko abhagabhisi bhanu abhasoosya ebhiyaanwa okuruubhana na ebhiraagiro bhya Muusa. 5 Emisango jinu abhagabhisi abho abhakora ayeeru ni chijekekanyo era cha emisango ja echimari jinu jiri ayeeru mu‑rwire eyo. Niyo isonga omwanya gunu Muusa aariga ˆnaatengeeja okuumbaka riyeema rya okuramya Nyamuwanga, Nyamuwanga ꞉aamubhwiriiye ati, “Nuukore bhuri chiinu okuruubhana na echijekekanyo chinu ꞉naakweresiisye ku‑chiima chirya cha Sinaayi.”a 6 Nawe Nyamuwanga ayaaye Yeesu omurimu gwa obhugabhisi gunu guri gwa kisi muno okukira gurya gwa abhagabhisi bha okwamba bharya. Yeesu niwe kaagwatanya abhaanu na Nyamuwanga mu‑ndagano inu iri ya ekisi okukira ya okwamba irya. Ka wone indagano eyo, iri rwa echiinu chinu chuumbakirwe ku‑rufuka rwa ekisi, nikwo okwayika ati inguru ya omurago gwa kisi muno okukira omurago gwa indagano ya kara irya.
7 Araabha indagano ya okwamba yaakabheeye itari‑ko esoro, indagano ya kabhiri itaakakenerwe. 8 Nawe omwanya gunu Nyamuwanga ꞉aarorere ebhibhiibhi bhya abhaanu bhaaye, ꞉aayikire ati,
“Mutegeresye, omwanya oguuja,
gunu nirikora indagano inyaaya na abhaanu bha Yisirayeeri na abha Yuuda.
9 Indagano inyaaya eyo itaribha rwa irya ya kara inu ꞉naakorere na bhasaaja weebhwe,
omwanya gunu naabhatangasyaga kisi okusooka mu‑chaaro cha Miisiri.
Abheene bhaariga bhatari bheeyikanyibhwa mu‑kugwata indagano ya kara eyo.
Nikwo okukora ꞉nitaabheeganire wuri.
Nikwo kutyo anye Raatabhugenyi enaayika.
10 Inu niyo indagano inyaaya inu nirikora na Abhayisirayeeri ku‑siku jinu ejiija.
Enija okutuura ebhiraagiro bhyani mu‑bhwiganirisya bhwebhwe, niribhikaama mu‑myoyo jeebhwe.
Anye niribha Nyamuwanga weebhwe, abheene wone bharibhaga abhaanu bhaani.
11 Ataribha‑wo omuunu woonewoone unu aribhaga ˆneeyigisya oweejaabho,
amwi omuunu okubhwira omuyiri waaye ati, ‘Umenye Raatabhugenyi.’
Okubha bhoone, okwambira ku‑mutooto okukingira ku‑mukuru bharimmenya.
12 Okubha niribhafwira echigongo ebhibhiibhi bhyebhwe, noorwo nitariichuka rindi ebhibhiibhi bhyebhwe.”b
13 Omwanya gunu Nyamuwanga ꞉aayikire ati, indagano inyaaya inu, keeresya ati indagano ya okwamba yakokoowe. Mbe echiinu choonechoone chinu chakokoowe na okuseeseka, chiri yeeyi okuwaa‑wo.