Obhugabhisi bhwa Meerikijedeki
7
1 Meerikijedeki oyo aariga ari mukama wa omusi gwa Sareemu. Ka wone aariga ari mugabhisi wa Nyamuwanga unu ari Inguru ya Bhyone. Meerikijedeki ꞉aabhugeene na Bhurayimu omwanya gunu Bhurayimu aariga ˆnaasubha okusooka mw‑iremo. Bhurayimu aariga arwanire na abhakama bhana na okubhayiga. Niwo Meerikijedeki ˆnaamusabhirwa amabhando. 2 Omwene Bhurayimu ˆnaasoosya ribhaara rimwi kw‑ikumi rya ebhiinu bhinu ꞉aateesiisye mw‑iremo eyo na okuyaana Meerikijedeki.a Risiina rinu Meerikijedeki, obhugajuro bhwaryo ni ati, “omukama wa obhurengeresi,” ka wone kaatogwa “omukama wa Sareemu,” obhugajuro bhwaryo ni ati, “omukama wa omurembe.” 3 Ejibhonekana ati abheebhusi bha Meerikijedeki bhatakumenyekana, oruganda rwaye wone rutakumenyekana, okwibhurwa na okufwa kwaye bhitakumenyekana. Omwene niwe omugabhisi wa kajaanende koone rwa Omwana wa Nyamuwanga.4 Ringira kutyo Meerikijedeki aariga ari mukuru! Noorwo saaja weeswe Bhurayimu ꞉aamuyaaye ribhaara rimwi kw‑ikumi rya ebhiinu bhinu ꞉aateesiisye mw‑iremo. 5 Okuruubhana na ebhiraagiro bhya Muusa, abhaanu bhoone okusooka mu‑ruganda rwa Abharaawi bhanu bhari bhagabhisi, bheenderwe bharamire ribhaara rimwi kw‑ikumi okusooka ku‑bhiinu bhya Bhayisirayeeri bheejaabho. Bheenderwe bhabhiramire, noorwo kutyo bhoone ni rwibhuro rwa Bhurayimu.b 6 Noorwo kutyo Meerikijedeki ꞉ataasookere mu‑ruganda rwa Abharaawi, ꞉aaramiiye ribhaara rimwi kw‑ikumi okusooka ku‑Bhurayimu. Ka wone ꞉aayaaye amabhando Bhurayimu, unu Nyamuwanga ꞉aaragire okumuyaana amabhando. 7 Chitari‑wo echiitimaato choonechoone noorwo na akatyari, ati unu kaasoosya amabhando ni mukuru okukira unu kaayaanwa amabhando. 8 Ka wone abhagabhisi okusooka mu‑ruganda rwa Abharaawi bhanu abharamira ribhaara rimwi kw‑ikumi, ni bhaanu bhanu abhafwa, nawe Meerikijedeki unu ꞉aaramiiye ribhaara rimwi kw‑ikumi okusooka ku‑Bhurayimu, ꞉aayikirwe ati ni muwanga noorwo reero. 9 Kurwa ejo echitura okwayika ati, noorwo Raawi unu abhagabhisi okusooka mu‑ruganda rwaye abharamira ribhaara rimwi kw‑ikumi ku‑bhiinu bhya abhaanu, omwene wone ꞉aasoosiisye ribhaara rimwi kw‑ikumi okutura ku‑Bhurayimu saaja waaye. 10 Enaayika kutyo, kwa okubha omwanya gunu Meerikijedeki ꞉aabhugeene na Bhurayimu, Raawi aariga aamarire okubha mu‑bhibhunu bhya Bhurayimu.
Obhugabhisi bhwa Yeesu bhuri rwa obhwa Meerikijedeki
11 Abhayisirayeeri ꞉bhaayaaywe ebhiraagiro bhya Muusa bhinu bhyariga nibhiruubhana na obhugabhisi bhwa Abharaawi. Nawe obhukuumiiye bhutakutura okubhonekana ku‑njira ya obhugabhisi obhwo. Ku‑songa eyo, omugabhisi owundi ꞉eenderwe, unu aariga ari rwa Meerikijedeki, unu atakusooka mu‑ruganda rwa Abharaawi rwa Aruuni. 12 Ka wone araabha obhugabhisi bhukayinduka, ni bhusibhusi ebhiraagiro wone bhiyindurwe. 13 Omugabhisi unu kaayikwa anu ni Raatabhugenyi weeswe Yeesu unu aariga atari Muraawi. Ka wone atari‑wo omuunu woonewoone okusooka mu‑ruganda rwaye unu ꞉aakorere‑ko emirimu ja obhugabhisi. 14 Okubha jimenyekeene ati omwene ꞉aasookereeye mu‑ruganda rwa Yuuda, ka wone omwanya gunu Muusa ꞉aasimuuye inguru ya abhagabhisi, ꞉ataayikire inguru ya oruganda orwo.
15 Emisango jinu enaayika jiri abhweru muno, kwa okubha omugabhisi owundi eebhuka, unu ari rwa Meerikijedeki. 16 Omwene aariga atari mugabhisi kwa okubha ꞉aakuumisiisye echiraagiro chinu echiragirira ati abhagabhisi bhasooke mu‑ruganda rwa Abharaawi. Tari omwene ꞉aabheeye omugabhisi ku‑bhuturo bhwa obhuwanga bhwaye bhunu bhutari na obhuteero. 17 Jikaamirwe mu‑Bhikaame Ebhyeru ati,
“Awe naawe omugabhisi akajaanende koone,
rwa kutyo Meerikijedeki aariga ari.”c
18 Kurwa ejo, Nyamuwanga ꞉aasoosiisye‑wo riragiriro rirya rya ku‑bhwambiro kwa okubha ryariga ritari na amanaga, ka wone ryariga ritari na omurimu gwonegwone. 19 ꞉Aarisoosiisye‑wo, kwa okubha ebhiraagiro bhya Muusa bhyariga bhitari na obhuturo bhwa okukuumisya omusango gwonegwone. Nawe woori, Nyamuwanga achiyaaye obhwiyikanyo obhundi bhwa ekisi muno, bhunu obhuchikora chibhe ayeeyi nage.
20-21 Omwanya gunu Abharaawi bhaatuurwaga‑ko okubha abhagabhisi, Nyamuwanga ꞉ataarayiiye echiinu choonechoone inguru yeebhwe. Nawe omwanya gunu Yeesu ꞉aakorerwe okubha Omugabhisi, Nyamuwanga ꞉aarayiiye, rwa kutyo jikaamirwe mu‑Bhikaame Ebhyeru ati,
“Raatabhugenyi aarayira,
ka wone, atariyindura obhwiganirisya bhwaye wuri.
‘Awe naawe Omugabhisi akajaanende koone.’”d
22 Mbe, kwa okubha Nyamuwanga ꞉aarayiiye kutyo, Yeesu niwe omwangarisi wa indagano inyaayae inu iri ya kisi muno okukira irya ya omwanya gwa Muusa.
23 Omwanya gurya gwa indagano ya kara, abhagabhisi bhaariga bhari bhaafu. ꞉Bhataagendereeye okukora emirimu jeebhwe kwa okubha bhaariga nibhafwa. 24 Nawe Yeesu niwe Omugabhisi kajaanende koone, kwa okubha omwene ni muwanga kajaanende koone. 25 Ku‑songa eyo, omwene ari na obhuturo bhwa okuchungura chimwi abhaanu bhoone bhanu abhagenda ku‑Nyamuwanga okutura ku‑mwene. Okubha omwene ni muwanga akajaanende koone, korereki abhasabhirwe ku‑Nyamuwanga omwanya gwone.
26 Omugabhisi Omukuru wa imbaga eyo keendwa muno kw‑iswe, kwa okubha omwene ni Mweru, atari na esoro, noorwo ꞉ataakorere echibhiibhi choonechoone. Nyamuwanga ꞉aamukindikire okusooka ku‑bhakosi bha ebhibhiibhi, ˆnaamwinamusya okuja mu‑rwire. 27 Abhagabhisi abhakuru bhaariga nibheendwa okusoosya echoogo bhuri rusuku. Okwamba bhaasoosyaga inguru ya ebhibhiibhi bhyebhwe abheene, bhaakamara niwo nibhasoosya inguru ya ebhibhiibhi bhya abhaanu abhandi. Nawe Yeesu ꞉ataakorere rwa abhagabhisi abhakuru abho. Omwene ꞉eesoosiisye okubha echoogo rumwi era inguru ya ebhibhiibhi bhya abhaanu bhoone. 28 Okuruubhana na ebhiraagiro bhya Muusa, abhaanu bhaariga nibhakorwa okubha abhagabhisi abhakuru, noorwo kutyo bhaariga bhari bhakosi bha ebhibhiibhi. Nawe gwejire gwatura omwanya, Nyamuwanga ˆnaakora Omwana waaye kwa echirayiro okubha Omugabhisi, Omwana unu akuumiiye kajaanende koone.