6
1 Ku‑songa eyo, chisige okubheera era ku‑meeyigisyo ganu ꞉cheeyigisiibhwe ku‑bhwambiro inguru ya Kirisito, tari chigenderere okwiyigira okukingira chirumatane mu‑riikirisya. Chisige okuumbaka rindi orufuka rwa ameeyigisyo ga okuta inguru ya ebhikorwa ebhijabhi bhinu ebhireeta orufu, na ameeyigisyo inguru ya okwikirisya Nyamuwanga. 2 Chisigega okusubhiirira rindi okwiyigira ameeyigisyo ga obhubhatiijo, ga okutuurira‑ko abhaanu amabhoko, ga abhafuuwe okusuuruka na ga indamu ya kajaanende koone. 3 Tari, echija okugenderera okukura na okukomeera mu‑riikirisya, Nyamuwanga akeenda.4 Mbe, bhari‑wo abhaanu bhanu ꞉bhaayaaywe obhweru bhwa Emisango ja Ekisi, nibhabhona echiyaanwa cha mu‑rwire, ka wone nibhakorwa okubha na obhumwi na Mwoyo Mweru. 5 Ka wone bhaamarire okumenya obhwa ekisi bhwa omusango gwa Nyamuwanga na amanaga ga obhutungi bhwa Nyamuwanga ku‑mwanya gunu aritunga echaaro choone echiyaaya. 6 Nawe woori, bhasigire okwikirisya Nyamuwanga. Jitakuturikana wuri okusubhya abhaanu abho, korereki bhate rindi ebhibhiibhi bhyebhwe ku‑Nyamuwanga. Ku‑njira ya okurema Omwana wa Nyamuwanga, abhamubhamba ku‑musarabha rwa kabhiri na okumuswasya abhwerubhweru.
7 Iisi inu eyinywa amanji ga ingʼubha inu eyigwa kwiya kaafu, na okumesya ebhiimesya bhinu ebhireeta omuriiro ku‑murimi, iisi eyo eyibhona amabhando okusooka ku‑Nyamuwanga. 8 Nawe iisi inu eyimesya amawa na amagorogoro, itakusakira abharimi omusango gwonegwone, na iri yeeyi okwiyiimwa na Nyamuwanga. Obhuteero bhwayo ni okwochiibhwa mu‑muriro.
9 Abheendwa bhaani, noorwo kutyo naabhakaamira emisango emiruru, nawe nimenyere chimari ati omukora emisango ja ekisi jinu ejeeresya obhuchungusi bhwemwe. 10 Nyamuwanga ni murengeresi, atakutura okurabhirwa ebhikorwa bhya ekisi bhinu mukorere. Ka wone atakutura okurabhirwa eryenda rinu ꞉mweresiisye inguru yaaye ku‑njira ya okusakira abheekirisya abheejaanyu okusookerera ku‑bhwambiro okukingira woori. 11 Eniigomba muno ati bhuri umwi weemwe eeresyega okwikomeesya okwookwo okukingira ku‑bhuteero, korereki muramire joone jinu omwiyikanya. 12 Mwasiga okurengaara, tari mubhe rwa abhaanu bhanu ku‑njira ya okwikirisya na okwigumiirisya, bhaaramira jinu Nyamuwanga ꞉aaragire okubhayaana.
Omurago gwa Nyamuwanga ni gwa echimari
13 Mbe, omwanya gunu Nyamuwanga ꞉aaragire Bhurayimu omurago, Nyamuwanga ꞉aarayire kw‑isiina ryaye omwene, kwa okubha atari‑wo omuunu woonewoone omukuru wa okumukira omwene. 14 ꞉Aarayiiye ku‑Bhurayimu ati, “Ni bhusibhusi nirikuyaana amabhando na okufufya orwibhuro rwawo.”a 15 Kurwa ejo Bhurayimu ꞉aarindiriiye na okwigumiirisya, okukingira ˆnaabhona joone jinu Nyamuwanga ꞉aamuragire.
16 Araabha abhaanu abharayira, abharayira kw‑isiina rya omuunu unu ari mukuru okukira abheene. Ka wone okurayira okwo okweresya ati joone jinu abhaayika ni ja chimari. Okukora kutyo, okumara‑wo okubhambasyanya. 17 Nyabhuriko Nyamuwanga wone ꞉aarumatanyiisye omurago gwaye ku‑njira ya echirayiro. ꞉Aakorere kutyo, okweresya abhwerubhweru ku‑bhanu ꞉aaragire ati, atariyindura wuri obhukarariiye bhwaye. 18 Mbe, emisango jibhiri jinu nijo Nyamuwanga ꞉aakorere, okuraga na okurayira. Nyamuwanga atarijiyindura wuri noorwo na akatyari, kwa okubha omwene atari mubheeyi. ꞉Aakorere emisango ebhiri ejo, korereki achisimbiisye eswe bhanu chiirukiiye ku‑mwene, chibhe na obhwiyikanyo ku‑misango jinu ejiija.
19 Chiri na obhwiyikanyo obhwo mu‑myoyo jeeswe, obhwene bhuri rwa inanga inu eyigwatirira ingarabha yaasiga okuyeywa. Obhwiyikanyo obhwo ni Yeesu, unu ꞉eengiiye Ayeeru a Ayeeru mu‑rwire eyo okutura mw‑ipajiya.b 20 Yeesu ꞉aatangatire okwingira awo inguru yeeswe. ꞉Eengiiye ˆnaabha Omugabhisi Omukuru akajaanende koone rwa kutyo Meerikijedeki aariga ari.