5
1 Bhuri mugabhisi omukuru kaasorwa okusooka mu‑bhaanu abheejaabho, korereki eemereegururu emisango ja Nyamuwanga inguru ya abhaanu. Ka wone omwene kaasoosisya Nyamuwanga echiyaanwa na echoogoa inguru ya ebhibhiibhi bhya abhaanu.2 Omugabhisi omukuru kaatura okufwira echigongo ebhibhiibhi bhya abhaanu abhandi bhinu bhaariga nibhakora okumenya wuri, kwa okubha omwene wone ni mukosi wa ebhibhiibhi.3 Nikwo okukora keendwa okusoosya echoogo inguru ya ebhibhiibhi bhyaye omwene, rwa kutyo kaasoosya echoogo inguru ya ebhibhiibhi bhya abhaanu abhandi.b4 Atari‑wo omuunu unu kaatura okwiyaana omwene echibharo cha okubha omugabhisi omukuru, tari Nyamuwanga niwe kaamusora rwa kutyo ꞉aasorere Aruuni.c
5 Nyabhuriko, Kirisito wone ꞉ateeyenjeeye omwene echibharo cha okubha Omugabhisi Omukuru, tari Nyamuwanga niwe ꞉aamusorere na okumubhwira ati,
“Awe naawe Omwana waani,
reero eniraasya ati anye niri Somwana.”d
6 Ka wone ꞉aayikire orubhaara orurebhe mu‑Bhikaame Ebhyeru ati,
“Awe naawe omugabhisi akajaanende koone,
rwa kutyo Meerikijedekie aariga ari.”f
7 Omwanya gunu Yeesu aariga ari ku‑chaaro anu, ꞉aasabhirwe na okwirembeeresya muno Nyamuwanga, ka wone ꞉aamuuwe obhuraka ˆnaarira amasiga mogomogo ku‑Nyamuwanga unu ari na obhuturo bhwa okumuchungura okusooka mu‑rufu.g Inguru ya okwikeeya kwaye, Nyamuwanga ˆnaamuungwa. 8 Noorwo kutyo Yeesu aariga ari Mwana wa Nyamuwanga, ꞉eeyigiiye okugayuka Nyamuwanga ku‑njira ya okwigumiirisya ebhinyaasyo bhinu bhyamubhonaga. 9 Mbe, okuruubhana na emisango ejo, Nyamuwanga ꞉aamukorere abhe Omugabhisi Omukuru unu akuumiiye, ˆnaabha obhusimukwa bhwa obhuchungusi bhwa kajaanende ku‑bhaanu bhoone bhanu abhagayuka Yeesu. 10 Nyamuwanga ꞉aamuteeye‑wo okubha Omugabhisi Omukuru rwa kutyo Meerikijedeki aariga ari.
Obhukengya inguru ya okusiga eriikirisya
11 Chiri na emisango myafu ja okubhabhwira inguru ya Yeesu okubha Omugabhisi Omukuru, nawe ni bhikomeeye okubhabhwira kwa okubha mutari bhaangu bha okujisombookerwa. 12 Ku‑mwanya gunu emwe mwari mwenderwe okubha abheeyigisya ku‑bheejaanyu, nawe mucheenda omuunu wa okubheeyigisya ameeyigisyo ga ku‑bhwambiro ga omusango gwa Nyamuwanga! Mbe, muri rwa abhaana abharera bhanu abhanywa amata era, nawe bhatakutura okurya ebhiryo bhikomeeye. 13 Omuunu unu kaanywa amata era achaari mwana omurera, atakumenya okusoosya obhutaasyanya bhwa emisango ja ekisi na emibhiibhi. 14 Nawe abhaanu abhakuru, abho abharya ebhiryo bhikomeeye. Abhaanu abho bheeyigiiye okusoosya obhutaasyanya bhwa emisango ja ekisi na emibhiibhi.