Okwisya omwoyo kwa abhaanu bha Nyamuwanga
4
1 Mbe, omurago gwa Nyamuwanga gwa abhaanu okwingira orubhaara rwa okwisya omwoyo guchaari aryaarya. Kurwa ejo chiyangarirega, korereki aasiga okubha‑wo omuunu woonewoone agati yeemwe unu aritaamibhwa okwingira mu‑rubhaara orwo. 2 Eswe chiraasisiibhwe emisango ja ekisi ejo ja orubhaara rwa okwisya omwoyo rwa kutyo bhasaaja weeswe wone ꞉bhaaraasisiibhwe. Nawe emisango ejo ꞉jitaabhasakiiye gwonegwone, kwa okubha ꞉bhaajuunguuwe tari ꞉bhataajiikirisiisye.a 3 Ku‑songa eyo, Nyamuwanga ꞉aayikire ati,“꞉Naabhiyiiywe na okurayira, ninaayikaga ati,
‘Nitaribheekirisisya wuri noorwo na akatyari abhaanu abho okwingira orubhaara rwa okwisya omwoyo,
orubhaara runu nibheeraabhiiye.’”b
Nawe eswe bhanu echiikirisya Nyamuwanga, chiriingira orubhaara orwo rwa okwisya omwoyo. Nyamuwanga ꞉aayikire ati abhandi bharya bhatariingira, noorwo kutyo aariga aamarire okwiraabha orubhaara orwo rwa okwisya omwoyo okusookerera okubhumbwa kwa echaaro choone. 4 Enaayika kutyo, kwa okubha orubhaara orurebhe mu‑Bhikaame Ebhyeru jikaamirwe inguru ya orusuku rwa kataanu na kabhiri ati, “Ku‑rusuku rwa kataanu na kabhiri, Nyamuwanga ꞉eesiisye omwoyo, ˆnaasiga okukora emirimu jaaye joone.”c 5 Nawe mu‑Bhikaame Ebhyeru bhya inguru awo, Nyamuwanga ꞉aayikire ati,
“Nitaribheekirisisya wuri noorwo na akatyari abhaanu abho okwingira orubhaara rwa okwisya omwoyo,
orubhaara runu nibheeraabhiiye.”d
6 Noorwo kutyo bhasaaja weeswe nibho ꞉bhaabheeye bha okwamba okuungwa emisango ja ekisi inguru ya orubhaara rwa okwisya omwoyo, ꞉bhaataamiibhwe okwingira orubhaara orwo, kwa okubha bhaariga bhatakugayuka Nyamuwanga. Ku‑songa eyo, abhaanu abhandi bhariingira orubhaara rwa okwisya omwoyo. 7 Nyamuwanga ꞉aateeye‑wo orusuku orundi rwa okwingira orubhaara rwa okwisya omwoyo, runu ꞉aatogere ati, “reero inu.” Nyamuwanga ꞉aasimuuye inguru ya orusuku orwo miguuga myafu bhasaaja weeswe bhejire bhaataamibhwa okwingira orubhaara orwo. ꞉Aayikire okutura ku‑mukama Dawudi emisango jinu ꞉jaayikirwe inguru awo ati,
“Reero inu, mukoongwa obhuraka bhwa Nyamuwanga,
musigega okukora emyoyo jeemwe okubha emikomeeye.”e
8 Araabha Yooswaf aakakingiisye abhaanu orubhaara rwa okwisya omwoyo awo, Nyamuwanga ataakaayikire rindi inguru ya orusuku orundi rwa okwisya omwoyo.g 9 Kurwa ejo, guchaari‑wo omwanya gwa okwisya omwoyo rwa ogwa orusuku rurya rya Isabhaatoh ku‑bhaanu bha Nyamuwanga. 10 Omuunu woonewoone unu keengira orubhaara rwa okwisya omwoyo anu Nyamuwanga eeraabhire, keesya omwoyo okukora emirimu jaaye, rwa kutyo Nyamuwanga ꞉eesiisye omwoyo omwanya gunu ꞉aamarire emirimu ja okubhumba echaaro. 11 Kurwa ejo, chiikomeesye okwingira orubhaara rwa okwisya omwoyo. Chibhega nichikora kutyo korereki aasiga okubha‑wo omuunu woonewoone wa okutaamibhwa okwingira ku‑songa ya okurema okugayuka Nyamuwanga, rwa kutyo bhasaaja weeswe bhaariga nibhakora.
12 Omusango gwa Nyamuwanga ni muwanga ka wone guri na amanaga okukira imbanda yooneyoone eya amoogi gabhiri. Rwa kutyo imbanda eyitura okusoma omuunu nikinga ku‑mawa gaaye, nikwo kutyo wone omusango gwa Nyamuwanga ogutura okusoma omuunu, nigwingira muno mu‑mwoyo gwaye, niguswerura jinu keeganirisya na jinu keenda. 13 Chitari‑wo echibhumbwa choonechoone chinu chiiyibhisire imbere ya Nyamuwanga. Ebhiinu bhyone bhiri abhweru imbere yaaye, na ku‑mwene chiryendwa okweresya ebhikorwa bhyeswe bhyone.
Yeesu niwe Mugabhisi Omukuru
14 Mbe, chiri na Omugabhisi Omukuru unu ꞉aagendere na okwingira mu‑rwire, niwe Yeesu Omwana wa Nyamuwanga. Ku‑songa eyo, chigwatirire jinu echiikirisya. 15 Omugabhisi Omukuru oyo niwe kaamenya obhujorobhoke bhweswe, kwa okubha ꞉aaregeejerwe na Syetaani ku‑misango joone rwa eswe, nawe omwene ꞉ataakorere ebhibhiibhi. 16 Kurwa ejo chibhe na ribhaasi mu‑kufogera ku‑chitebhe cha ingʼoma cha Nyamuwanga, korereki achiyaane echigongo na obhwitiriranya bhwa okuchisakira omwanya gwa obhukene bhweswe.