Yeesu ni mukuru okukira Muusa
3
1 Mbe, abhayiri bhaani mu‑riikirisya, emwe bhanu Nyamuwanga abhirikiiye aamwi na eswe okubha abhaanu bhaaye, mwiganirisye inguru ya Yeesu. Omwene oyo niwe Itumwa ya Nyamuwanga ka wone niwe Omugabhisi Omukuru wa emisango jinu echiikirisya. 2 Yeesu aariga ari mwiyikanyibhwa okukora joone jinu Nyamuwanga ꞉aamusorere akore, rwa kutyo Muusa wone aariga ari mutangasya omwiyikanyibhwa wa abhaanu bhoone bha inju ya Nyamuwanga, nikwo okwayika ati Abhayisirayeeri.a 3 Omuumbaki kaayaanwa echibharo okukira inju inu oombakire. Nyabhuriko Yeesu wone keendwa okuyaanwa echibharo muno okukira Muusa. 4 Okubha bhuri inju eyumbakwa na omuumbaki omurebhe, nawe Nyamuwanga niwe Omuumbaki Omukuru wa ebhiinu bhyone.5 Muusa aariga ari mukosi omwiyikanyibhwa ku‑bhaanu bhoone bha mu‑nju ya Nyamuwanga. Omurimu gwaye gwariga guri chijekekanyo cha emisango jinu Nyamuwanga akasweruriiye abhaanu mu‑siku ja imbere eyo. 6 Nawe Kirisito ni mwiyikanyibhwa rwa Omwana unu keemereegururu abhaanu bha mu‑nju ya Nyamuwanga. Abhaanu abho niiswe araabha chikagenderera okukingira ku‑bhuteero chiri na ribhaasi na okwikuuyisya jinu echiiyikanya.
Obhukengya inguru ya okurema okwikirisya
7 Kurwa ejo, cheenderwe chitegeresye jinu Mwoyo Mweru kaayika mu‑Bhikaame Ebhyeru ati,
“Reero inu, mukoongwa obhuraka bhwa Nyamuwanga,
8 musigega okukora emyoyo jeemwe okubha emikomeeye,
rwa kutyo bhasaaja weemwe bhaariga nibharema okutangasibhwa na anye,
omwanya gunu bhandegeejaga mw‑ibhara.
9 Mw‑ibhara erya niwo bhasaaja weemwe bhandegeejaga,
noorwo kutyo ꞉naabhakoreeye ebhibharikisyo bhyafu omwanya gwa miguuga makumi gana.
10 Ku‑songa eyo ꞉naabhiyiriiywe abhaanu abho, ninaayikaga ati,
‘Siku joone abhaanu bhanu bhatari bheeyikanyibhwa,
ni bhaanu bhanu bhatakwenda okuruubha jinjira jaani.’
11 Kurwa ejo ꞉naabhiyiiywe na okurayira, ninaayikaga ati,
‘Nitaribheekirisisya wuri noorwo na akatyari abhaanu abho okwingira orubhaara rwa okwisya omwoyo,
orubhaara runu nibheeraabhiiye.’”b
12 Emwe abhayiri bhaani mu‑riikirisya, mwiyangarirega, korereki aasiga okubha‑wo omuunu woonewoone mw‑imwe unu ari na omutima omubhiibhi, gwa okurema okwikirisya, ka wone unu kaarema okuruubha Nyamuwanga omuwanga. 13 Nawe mukomeesyanyega emwe abheene kwa abheene bhuri rusuku runu echitoga ati “reero inu,” korereki aasiga okubha‑wo mw‑imwe omuunu woonewoone owa omwoyo omukomeeye ku‑songa ya okujigwa na ebhibhiibhi. 14 Okubha chiri na obhumwi na Kirisito araabha chikagenderera okwiyikanya Nyamuwanga okukingira ku‑bhuteero, rwa kutyo chamwiyikanyaga ku‑bhwambiro. 15 Mwichuke jinu jikaamirwe mu‑Bhikaame Ebhyeru ati,
“Reero inu, mukoongwa obhuraka bhwa Nyamuwanga,
musigega okukora emyoyo jeemwe okubha emikomeeye,
rwa kutyo bhasaaja weemwe bhaariga nibharema okutangasibhwa na anye.”c
16 Ni bhaanu ki bhanu ꞉bhoonguuwe obhuraka bhwa Nyamuwanga, nawe nibharema okutangasibhwa nage? Bhatari bhoone bhanu bhaariga nibhatangasibhwaga na Muusa okusooka mu‑chaaro cha Miisiri? 17 Ka wone, ni bhaanu ki bhanu Nyamuwanga ꞉aabhiyiriiywe miguuga makumi gana? Bhatari bhanu ꞉bhaakorere ebhibhiibhi, nibhafwa mw‑ibhara? 18 Ka wone, ni bhaanu ki bhanu Nyamuwanga ꞉aarayire ati ataribheekirisisya wuri noorwo na akatyari okwingira orubhaara rwa okwisya omwoyo, orubhaara runu abheeraabhiiye? Bhatari bhanu ꞉bhaaremere okumugayuka? 19 Kurwa ejo chimenyere ati, abhaanu abho ꞉bhaataamiibhwe okwingira orubhaara rwa okwisya omwoyo, kwa okubha ꞉bhaaremere okwikirisya Nyamuwanga.