Abhayebhuraniya 2

Obhuchungusi obhukuru bhwa Nyamuwanga

1 Kurwa ejo, cheenderwe chiyangarire ku‑misango jinu choonguuwe, korereki chaasiga okujisiga. 2 Chimenyere ati ebhiraagiro bhya Nyamuwanga bhinu bhasaaja weeswe ꞉bhaaramiiye okutura ku‑bhamaraayika bhyariga bhiri na obhuturo. Nikwo okukora, abhaanu bhoone bhanu bhaariga bhatakujiruubha noorwo okujigayuka, Nyamuwanga ꞉aabhayaaye ebhitiibha bhinu bhyariga bhibheeyire. 3 Araabha ꞉jaakorekeene kutyo ku‑bheene, angu, eswe chiritura kutiki okuwona okuyaanwa ebhitiibha, chikabha chitakwigana obhuchungusi obhunene rwa bhunu chibhwene? Raatabhugenyi Yeesu niwe ꞉aambire okuraasya obhuchungusi obhwo, na abhaanu bhanu bhaariga nibhamutegeresya wone nibhachibhwira ati, omusango gwa obhuchungusi ogwo ni gwa echimari. 4 Nyamuwanga wone aariga ˆnaasoosya obhubhambaasi inguru ya obhuchungusi obhwo, ku‑njira ya okukora ebhibharikisyo, ebhiruguusyo na ebhikorwa bhya amanaga bhya mbaga nyafunyafu. Ka wone ꞉aagabhiiye abhaanu ebhiyaanwa bhya Mwoyo Mweru okuruubhana na okwenda kwaye.

Okwikeeya kwa Yeesu

5 Chimenyere ati Nyamuwanga ꞉ataayaaye bhamaraayika obhuturo bhwa okutunga ku‑chaaro echiyaaya, chinu echaayika emisango jaacho. Nawe omuunu umwi asoosiisye obhubhambaasi bhunu mu‑Bhikaame Ebhyeru ati,

6 “Nyamuwanga awe, omuunu ni chiinu ki noorwo umwiganirisye?

Omwana wa omuunu niga noorwo umwigane?

7 ꞉Waakorere omuunu okubha omutooto okukira bhamaraayika

ku‑mwanya mufuyi era.

Nawe woori umuyaaye rikusyo na echibharo,

8 na okutuura ebhiinu bhyone emwaro ya obhutungi bhwaye.”

Kurwa ejo Nyamuwanga ꞉aateeye‑wo omuunu korereki abhe ˆnaatunga ebhiinu bhyone. Obhugajuro bhwaye ni ati, chaariga chitari‑wo echiinu choonechoone chinu ꞉ataateeye mu‑bhutungi bhwa omuunu. Nawe woori chitakurora omuunu ˆnaatunga ebhiinu ebhyo bhyone. 9 Nawe echirora Yeesu, unu Nyamuwanga ꞉aakorere okubha omutooto okukira bhamaraayika ku‑mwanya mufuyi era. Nyamuwanga ꞉aakorere kutyo, korereki okuruubhana na echigongo chaaye, Yeesu afwe inguru ya okuchungura abhaanu bhoone. Woori Nyamuwanga amuyaaye rikusyo na echibharo, ku‑songa ya okunyaaka na okufwa kwaye.

10 Nyamuwanga niwe ꞉aabhumbire ebhiinu bhyone na okubhikora bhibhe kutyo bhiri. ꞉Jaamukondeeye areete abheekirisya bhaafu mw‑ikusyo ryaye, kurwa ejo ꞉aakuumisiisye Yeesu ku‑njira ya okunyaasibhwa, korereki abhe obhusimukwa bhwa obhuchungusi.

11 Yeesu aamwi na abhaanu bhanu keesya ebhibhiibhi bhyebhwe, Esemwene ni umwi. Nikwo okukora Yeesu atakwiswara okubhabhirikira ati abhayiri bhaaye. 12 Yeesu ꞉aabhwiriiye Nyamuwanga ati,

“Enija okusimura ebhikorwa bhyawo ebhikuru ku‑bhayiri bhaani,

enija okwimba jinyimbo ja okukukusya agatigati ya eriikofyanyo ryebhwe.”

13 Ka wone ꞉aayikire ati,

“Niribhaga niniiyikanya Nyamuwanga.”

Ka wone ꞉aayikire ati,

“Anye niri anu aamwi na abhaana bhanu Nyamuwanga anaaye.”

14 Mbe, kwa okubha abhaana bhari na emibhiri na isagama, Yeesu wone ꞉eejire ari na omubhiri na isagama rwa abheene. ꞉Aakorere kutyo, korereki ku‑njira ya orufu rwaye, ayige amanaga ga Syetaani, unu ari na obhuturo bhwa orufu. 15 Ka wone Yeesu ꞉aafuuwe, korereki ayaane obhwitaage abhaanu bhanu bhaariga bhari rwa bhagaya obhurame bhwebhwe bhwone, ku‑songa ya okuubhaya orufu. 16 Kurwa ejo, jiri abhweru ati Yeesu ꞉ateejire okusakira bhamaraayika, tari ꞉eejire okusakira abhaanu bha orwibhuro rwa Bhurayimu. 17 Ku‑songa eyo, ꞉aakenerwe aaje ari rwa kutyo abhayiri bhaaye bhari mu‑joone, korereki abhe Omugabhisi Omukuru unu ari owa echigongo na omwiyikanyibhwa ku‑mirimu jaaye imbere ya Nyamuwanga. Omugabhisi oyo niwe ꞉aakorere echoogo korereki Nyamuwanga afwire echigongo abhaanu ebhibhiibhi bhyebhwe. 18 Okubha Yeesu ꞉aaregeejerwe na okunyaaka, kurwa ejo kaatura okusakira bhanu abharegeejibhwa.