Inyarubha
ku‑Bhayebhuraniya
Nyamuwanga kaayika okutura ku‑Mwana waaye
1
1 Kara awo, Nyamuwanga ꞉aayikire na bhasaaja weeswe kaafu na ku‑njira nyafu, okutura ku‑bharagi. 2 Nawe mu‑siku jinu ja obhuteero, Nyamuwanga aayika na eswe okutura ku‑Mwana waaye.a Nyamuwanga ꞉aamuteeye‑wo abhe omwanjusi wa ebhiinu bhyone, ka wone okutura ku‑mwene oyo, Nyamuwanga ꞉aabhumbire echaaro choone. 3 Omwene oyo niwe orungʼarabhyo rwa rikusyo rya Nyamuwanga. Ka wone niwe orususo rwa echimari rwa kutyo Nyamuwanga ari. Omwene niwe kaakora ebhiinu bhyone bhigwatane aamwi ku‑musango gwaye ogwa amanaga. ꞉Eesiisye abhaanu ebhibhiibhi bhyebhwe, ˆnaagenda mu‑rwire, ˆneenyanja orubhaara rwa ebhuryo rwa Nyamuwanga owa obhuturo bhwone.Yeesu ni mukuru okukira bhamaraayika
4 Nyamuwanga ꞉aakorere Omwana waaye abhe omukuru okukira bhamaraayika rwa kutyo ꞉aamuyaaye risiina rikuru okukira rya bhamaraayika.b 5 Okubha atari‑wo maraayika unu Nyamuwanga ꞉aabhwiriiye emisango rwa jinu ꞉aabhwiriiye Yeesu ati,
“Awe naawe Omwana waani,
reero eniraasya ati anye niri Somwana.”c
Ka wone Nyamuwanga ꞉ataayikire inguru ya maraayika woonewoone ati,
“Anye niribha Esemwene,
na omwene aribha Omwana waani.”d
6 Ka wone, omwanya gunu Nyamuwanga ꞉aatumire Omwana waaye wenyere ku‑chaaro anu, ꞉aayikire ati,
“Bhamaraayika bhoone bha Nyamuwanga bharamye Omwana oyo.”e
7 Inguru ya maraayika ꞉aayikire ati,
“Anye enikora bhamaraayika bhaani okubha rwa emiyaga,f
na abhakosi bhaani okubha rwa jimbeesi ja omuriro.”g
8 Nawe inguru ya Omwana waaye ꞉aayikire ati,
“Awe Nyamuwanga uritunga akajaanende na akajaanende,
na obhutungi bhwawo bhuribha bhwa obhurengeresi.
9 Awe weendere ja ekisi,
na owubhiyirirwa emijabhi.
Kurwa ejo Nyamuwanga, Nyamuwanga waawo,
aakubhambaga amafuta ga rikonderwa,h
korereki akukore ubhe omukuru
okukira abheejaanyu bhoone.”i
10 Ka wone Nyamuwanga ꞉aabhwiriiye Omwana waaye ati,
“Raatabhugenyi awe naawe ꞉waabhumbire echaaro ku‑bhwambiro awo,
ka naawe ꞉waabhumbire orutumba kwa mabhoko gaawo.
11 Ebhiinu ebhyo bhyone bhiriwaa‑wo,
bhirikokora rwa emyenda,
nawe awe urigenderera okubha‑wo.
12 Awe urifunyafunya ebhiinu ebhyo rwa omwingiro,
bhiriyindurwa rwa omwenda omukokoro.
Nawe awe utariyinduka wuri, noorwo emiguuga jaawo jitariwaa‑wo.”j
13 Nyamuwanga ꞉ataabhwiriiye maraayika woonewoone ati,
“Inyanja orubhaara rwani rwa ebhuryo,
okukingira omwanya gunu enija okutuura abhasoko bhaawo
emwaro ya amaguru gaawo.”k
14 Mbe woori, bhamaraayika ni chiinu ki? Ni myoyo jinu ejikorera emirimu Nyamuwanga, omwene kaajituma jigende okukorera emirimu abhaanu bhanu bharichungurwa.