Kutyo Nyamuwanga kaakondisibhwa
13
1 Mugenderere okwendana abheene kwa abheene rwa abhayiri mu‑riikirisya. 2 Ka wone mugenderere okukuma abhagenyi mu‑nju jeemwe, okubha ku‑njira eyo, abhaanu abhandi ꞉bhaakumire bhamaraayika wa Nyamuwanga okumenya wuri ati ni bhamaraayika. 3 Mwichuke abhaanu bhanu bhabhoyerwe mw‑ibhoyero, mubhega wuti mubhoyerwe aamwi nabho. Mwichuke abhaanu bhanu abhanyaasibhwa, mubhega wuti omunyaasibhwa aamwi nabho.4 Obhutwarwa bhwenderwe bhuyaanwe echibharo na abhaanu bhoone. Omurume na omugasi bheekengega obhuromesi, kwa okubha Nyamuwanga ariramura abhasengani na abharomesi. 5 Mwasiga okubha na jitungwa ja okwenda jipirya, tari mwiywega na ebhiinu bhinu muri nabhyo, okubha Nyamuwanga omwene ꞉aayikire ati, “Nitarikusiga noorwo nitari kurabhirwa wuri.”a 6 Nikwo okukora echitura okwayika kwa ribhaasi ati,
“Raatabhugenyi niwe kaansakira,
nitaryubhaya wuri.
Omuunu arinkorera ki?”b
7 Mwichuke abhatangasya bheemwe bhanu bhaariga nibhabheeyigisya omusango gwa Nyamuwanga. Mwiganirisye inguru ya jitungwa jeebhwe kutyo bhaariga bheekaaye, murorerega eriikirisya ryebhwe. 8 Yeesu Kirisito atakuyinduka. Omwene ni wuryawurya, rigoro, reero, na kajaanende koone. 9 Musigega okugegwagegwa na ameeyigisyo maafumaafu amagenyi, kwa okubha obhwitiriranya bhwa Nyamuwanga nibhwo obhurumatanya emyoyo jeemwe, noorwo bhitari ebhiraagiro inguru ya ebhiryo. Ebhiraagiro ebhyo bhitakusakira gwonegwone ku‑bhaanu bhanu abhabhiruubha.
10 Eswe chiri na Yeesu rwa echoogo cheeswe. Abhaanu bhanu abhagenderera okusoosya echoogo mw‑iyeema rya Abhayawudi bhatakuja okutura okubhona omuriiro gwa echoogo ya Yeesu. 11 Okuruubhana na ebhiraagiro bhya Muusa, omugabhisi omukuru kaagega orwamba rwa ebhitunganwa na okugenda narwo Ayeeru a Ayeeru, korereki arusoosye rwa echoogo inguru ya okusoosya‑wo ebhibhiibhi. Nawe jifwano ja ebhitunganwa ebhyo ebhigegwa na okwochwa ku‑mwira gwa riwuna rya Abhayisirayeeri. 12 Niyo isonga Yeesu wone ꞉aanyaasiibhwe na okwitwa anja ya omusi gwa Yerusareemu, korereki eesye abhaanu ebhibhiibhi bhyebhwe ku‑njira ya isagama yaaye. 13 Kurwa ejo eswe wone chimujee‑ko ku‑mwira gwa omusi eyo na okwigumiirisya jiswaro rwa kutyo omwene wone ꞉aajigumiirisiisye. 14 Chikore kutyo okubha ku‑chaaro kunu chitari na omusi gunu gurirama akajaanende koone, tari echirindirira okwingira mu‑musi gwa mu‑rwire gunu oguuja.
15 Mbe, chigenderere okukusya Nyamuwanga okutura ku‑Yeesu okusiga wuri, kwa okubha emisango jeeswe ja okukusya risiina ryaye jiri rwa echoogo chinu echimusoosisya. 16 Mugenderere okusakira abheejaanyu na okusangira aamwi nabho ebhiinu bhinu muri nabhyo, okubha okukora kutyo, nicho echoogo chinu echikondisya Nyamuwanga.
17 Mugayukega abhatangasya bheemwe na okuruubha jinu abhabharagirira, kwa okubha abheene nibho abhabhanyaakirira okuyigwa wuri. Abheene bharyendwa okweresya emirimu jeebhwe imbere ya Nyamuwanga. Kurwa ejo mubhagayukega, korereki bhakore emirimu jeebhwe nibhakondererwaga. Nawe araabha mukarema okubhagayuka, abhaja okukora emirimu jeebhwe bhasurumbaaye, na emirimu jeebhwe ejo jitaribha na omuriiro gwonegwone kw‑imwe. 18 Mugenderere okuchisabhirwa. Chimenyere chimari ati emitima jeeswe ni myeru, kwa okubha cheendere okukora jinu jiri ja obhurengeresi ku‑bhaanu bhoone. 19 Enibheerembeeresya muno munsabhirwega ku‑Nyamuwanga, korereki aansubhye kw‑imwe eyo bhwangu.
Emisango ja obhuteero
20 Nyamuwanga omwene, niwe kaachiyaana omurembe. ꞉Aasuuruuye Raatabhugenyi weeswe Yeesu, unu ari Mureefi Omukuru wa jinaama, kwa okubha ꞉eetire isagama yaaye inu eyeeresya chimari indagano ya kajaanende koone. 21 Nyamuwanga abhayaane amanaga ga okukora okwenda kwaye. Ka wone akore mu‑myoyo jeeswe jinu ejimukondisya ku‑njira ya Yeesu Kirisito. Omwene akusibhwe akajaanende koone. Jibhe kutyo.
22 Enibheerembeeresya emwe abhayiri bhaani mu‑riikirisya, muruubhega emisango ja okubhasimbiisya jinu naabhakaamira ku‑nyarubha inu. Naabhakaamira emisango emitooto era. 23 Eneenda mumenye ati omuyiri weeswe mu‑riikirisya Timoteewo eeguriiywe okusooka mw‑ibhoyero. Araabha akaaja anu bhwangu, niriija nage kw‑imwe eyo okubhagosorera.