2 Timoteewo 1

Inyarubha ya kabhiri ya Pawuro

ku‑Timoteewo

Obhukeesya bhwa Pawuro ku‑Timoteewo

1 Inyarubha inu, niikaamire anye Pawuro, itumwa ya Kirisito Yeesu mu‑kwenda kwa Nyamuwanga, korereki niraasye omusango gwa obhuwanga. Nyamuwanga ꞉aachiragire ati obhuwanga obhwo obhubhonekana kwa okwikirisya Kirisito Yeesu. 2 Enikukaamira awe Timoteewo, omwana waani omwendwa.

Obhwitiriranya, echigongo na omurembe okusooka ku‑Raata Nyamuwanga na ku‑Kirisito Yeesu Raatabhugenyi weeswe, bhibhe aamwi na awe.

Pawuro kaasiima Nyamuwanga na okukomeesya Timoteewo

3 Enisiima Nyamuwanga unu enikorera emirimu mu‑mutima omweru, rwa kutyo ꞉bhaamukoreeye bhasaaja waani. Omwanya gwone enikwichuka, mw‑isabhwa ryani mu‑ngeta na mu‑mwisi. 4 Eniichuka kutyo ꞉waaririre omwanya gunu ꞉chaarageene. Niri na obhwira muno okubhugana na awe rindi. Kurwa ejo, ukaaja okundora nirikonderwa muno. 5 Ka wone, eniichuka eriikirisya ryawo rya echimari. Eriikirisya eryo, aariga ari naryo kaka waanyu Royisi na nyakomwana Yewuniki. Woori, niri na obhwiyikanyo ati awe wone uri naryo. 6 Niyo isonga, enikwichukya ati komeera okukorera emirimu echiyaanwa chinu Nyamuwanga ꞉aakuyaaye omwanya gunu ꞉naakutereeye‑ko amabhoko. 7 Kora kutyo, okubha Nyamuwanga ꞉ataachikorere okubha abhoobha, tari ꞉aachiyaaye amanaga, eryenda na okwiyingirira.

8 Woori, waasiga okwiswara okwayika inguru ya Raatabhugenyi weeswe, amwi okwiswara kwa okubha niri mw‑ibhoyero ku‑songa yaaye. Nawe, igumiirisya mu‑bhinyaasyo aamwi na anye, inguru ya okubhwira abhaanu Emisango ja Ekisi, okwingana na amanaga ganu Nyamuwanga kaakuyaana. 9 Omwene ꞉aachichunguuye, ˆnaachibhirikira chibhe abhaana bhaaye abheeru. ꞉Ataakorere kutyo kwa okubha ati ebhikorwa bhyeswe ni bhya ekisi, tari ꞉aakorere kutyo mu‑kwenda kwaye na obhwitiriranya bhwaye. ꞉Aachiyaaye obhwitiriranya obhwo inguru ya Kirisito Yeesu, noorwo achaari okubhumba echaaro. 10 Nawe woori, Nyamuwanga eeresya obhwitiriranya bhwaye kw‑iswe, kwa okuuja kwa Omuchungusi weeswe Kirisito Yeesu. Omwene ꞉aayigire amanaga ga orufu na ꞉eeresiisye obhuwanga bhwa akajaanende ku‑njira ya Emisango ja Ekisi.

11 Anye nisorerwe korereki nibhe omuraasya, itumwa na omwiyigisya wa Emisango ja Ekisi ejo. 12 Anye eninyaaka inguru ya ejo. Nawe nitakwiswara, okubha enimumenya unu niikirisiisye. Ka wone enimenya ati, echimari chinu ꞉aanaaye, kaachibhiika kisi okukingira orusuku rwa okusubha kwaye. 13 Ugwate kisi ameeyigisyo ga echimari ganu ꞉naakwiyigisiisye. Wiyigisye ago, ubhe echijekekanyo cha eriikirisya na eryenda bhinu ebhibhonekana kwa okwikirisya Kirisito Yeesu. 14 Echimari chinu ꞉waayaaywe, uchaangarire ku‑managa ga Mwoyo Mweru unu ari mu‑myoyo jeeswe.

15 Timoteewo, awe owumenya ati, abhaanu bhoone bha mu‑mukoowa gwa Asiya ꞉bhaansigire. Mu‑abho ari‑mo Fuugero na Erimogeene. 16 Enisabhwa Raatabhugenyi afwire echigongo abhaanu bha iika wa Onesifooro, kwa okubha kwiya kaafu aariga ˆnaakondisya omwoyo gwani. Ka wone, ꞉ateeswarire okuuja okundora, bhunu naariga nibhoyerwe amaseega. 17 Bhunu ꞉eejire mu‑musi gwa Ruumi anu, ꞉eekomeesiisye okunyenja okukingira okumbona. 18 Awe wone owumenya kisi, emyafu jinu ꞉aankoreeye mu‑musi gwa Yefeeso eyo. Raatabhugenyi amufwire echigongo orusuku rwa indamu.