Okubha na obhwigumiirisya ku‑mirimu ja Nyamuwanga
2
1 Woori awe omwana waani, ubhe na amanaga mu‑bhwitiriranya bhunu echibhona kwa okwikirisya Kirisito Yeesu. 2 Awe ꞉woonguuwe ameeyigisyo ganu neeyigisyaga imbere ya abhabhambaasi bhaafu. Mbe, awe wone uyaane abhaanu abheeyikanyibhwa, bhanu abhatura okwiyigisya abhandi. 3 Igumiirisya aamwi na anye mu‑bhinyaasyo, rwa omusirikare wa ekisi wa Kirisito Yeesu. 4 Omusirikare woonewoone unu kaakora emirimu ja echisirikare, keeyingirira okukora emirimu ejindi jinu jitari ja echisirikare. Kaakora kutyo korereki akondisye omukuru waaye era. 5 Noorwo omubhirimi woonewoone atakutura okuyaanwa echiyaanwa cha obhuyigi, akabha ataruubhire amaragiriro ga obhwenywa bhwa okubhirima. 6 Ka wone, omurimi unu keekomeesya okurima, jiiyire abhe wa okwamba okunogora amatwasyo. 7 Timoteewo, iganirisya muno inguru ya emisango jinu enikubhwira. Raatabhugenyi kaja okukuyaana obhuturo bhwa okusombookerwa joone.8 Wiichuke Yeesu Kirisito wa mu‑ruganda rwa omukama Dawudi.a Nyamuwanga ꞉aamusuuruuye okusooka mu‑bhafuuwe. Ejo nijo Emisango ja Ekisi jinu eniraasya. 9 Emisango ejo, nijo ejikora anye eninyaaka na okubhoywa amaseega rwa omukosi wa ebhibhiibhi. Nawe omusango gwa Nyamuwanga gutakutura okuyingwa. 10 Kurwa ejo, eniigumiirisya joone inguru ya abhaanu bhanu Nyamuwanga asorere, korereki abheene wone bhabhone obhuchungusi ku‑njira ya okwikirisya Kirisito Yeesu na bhasangire rikusyo ryaye akajaanende.
11 Omusango gunu ni gwa echimari ati,
“Araabha chifuuwe aamwi na Kirisito,
wone echija okubha abhaanga aamwi nage.
12 Araabha echiigumiirisya,
chiritunga aamwi nage.
Araabha echimurema,
omwene wone arichirema.
13 Araabha eswe chitari abheeyikanyibhwa ku‑mwene,
omwene kaagenderera okubha omwiyikanyibhwa,
kwa okubha omwene atakutura okwirema.”
Amaragiriro ku‑mukosi wa ekisi wa Nyamuwanga
14 Wiichukye abheekirisya emisango ejo. Ubharagirire imbere ya Nyamuwanga, bhasige okubhambasyanya inguru ya emisango emitoototooto. Jimamba ejo jitari‑mo omuriiro, tari ejinyamura bhanu abhoongwa. 15 Ikomeesya okwiyigisya omusango gwa echimari, rwa kutyo Nyamuwanga keenda. Niwo owuja okubha omukosi wa emirimu unu atakwiswara inguru ya emirimu jaaye. Ejo nijo Nyamuwanga keekirisya.
16 Wiikenge na emisango emijabhi jinu jitari na obhugajuro bhwonebhwone na jinu jitakuyaana Nyamuwanga rikusyo. Okubha ejo ejisoosya abhaanu ku‑mwene nijibhasira kura muno. 17 Ameeyigisyo geebhwe agaswirana rwa echironda chinyabhagunire. Mu‑bheene abho bhari‑mo Imenaayo na Fireeto. 18 Abho bhabhurire muno, bhasigire echimari. Abhaayika ati obhusuuruko bhwa abhafuuwe bhurakorekeene. Kwa okwiyigisya kutyo abhayabhya eriikirisya rya abhaanu abhandi. 19 Nawe abhaanu bhanu bheemereeguuyu bharumateene, bhari rwa orufuka runu ruteeywe‑wo na Nyamuwanga. Orufuka orwo rurumateene ndi. Inguru yaarwo ruri‑ko orunabho runu rukaamirwe ati,
“Raatabhugenyi kaamenya abhaanu bhaaye,”b
ka wone,
“Omuunu woonewoone unu kaayika ati,
omwene ari rubhaara rwa Raatabhugenyi,
asige ebhibhiibhi.”
20 Mu‑nju inene bhiri‑mo ebhiinu bhya bhuri mbaga. Bhiri‑mo ebhiinu bhinu bhikonjerwe kwa inaaryo na jiyera, ebhindi kwa rimoga na amati. Ebhindi ebhikora emirimu ja echibharo na ebhindi emirimu jinu jitari ja echibharo. 21 Woori, omuunu aakeeyesya na okusigana na ameeyigisyo geebhwe, kaabha rwa echiinu cha okukorera emirimu ja echibharo chinu chaawuuywe, aribhaga eeyire ku‑Raatabhugenyi waaye. Omuunu oyo aribhaga emariiriiye okukora ebhikorwa bhya ekisi.
22 Wiiruke obhurigire bhwa echisigaji, uruubhega rirenga, eriikirisya, eryenda na omurembe. Ugwatirire ejo, aamwi na bhoone bhanu abhasabhwa Raatabhugenyi kwa omutima omweru. 23 Nawe wiikenge na jimamba ja echitaamutaamu, kwa okubha jitari‑mo omuriiro na owumenya ati ejo ejiibhura inyombo. 24 Ka wone, omukosi wa Raatabhugenyi ateeyire abhe omuunu wa inyombo. Nawe abhe omwigumiirisya, omworooro ku‑bhaanu bhoone na unu kaamenya okwiyigisya kisi. 25 Eenderwe abhe ˆnaatongeraga kwa obhworooro abhaanu bhanu abhabhambasyanya nage, ˆneeyikanyaga ati Nyamuwanga kaatura okukora bhate na okumenya echimari. 26 Niwo, obhwenge bhwebhwe bhubhasubhire, bhachunguke okusooka mu‑rutuura rwa Syetaani.c Omwene abhagwatire, korereki bhabhe nibhakora eryenda ryaye.