ꑳꀊꊆꃅꑍꇫꑟꇁꂯꄉꀐ
2
1 ꆍꊇꑭꉢꄉꉶꁱꄏ，ꉠꌃꎔꁧꂶꌠꇬꄉꃛꊸꐨꌗꋏ。
ꉹꁌꃅꄷꋌꈚꈁꀀꌠꃅꑑꃹꏾꌌꀕ，
ꑞꃅꆏ，ꑳꀊꊆꃅꑍꑟꇁꂯꄉꀐ，
ꋋꇅꃅꇫꑟꇁꂯꄉꀐ。
2 ꀊꋨꄮꇬꆹ，ꏃꃅꆈꋧꀕ，ꊽꄸꆹꌋꉩ，
ꃅꄂꆈꏸꀕ，ꆈꃅꆈꇗꀕ，
ꃅꄜꇁꂾꆈꋧꋪꌠꇁꁧꇂꇈꌺꉱꌠꌡ。
ꂽꇨꂽꄿꑠꁥꇫꅐꇁ，
ꀃꌋꀊꆨꅑꅷꇁꇬꑠꐥꀋꋻ，
ꊁꄙꋊꃪꋊꐛꇬꂯꋍꑠꇬꀋꐥꌠꉬ。
3 ꋀꂾꃆꄔꊿꑋꊾꅝꌠꐞ，
ꋀꊂꃆꄔꉐꆂꉙꀕꉘꃅꐞ；
ꋀꊇꇫꑟꀋꇁꌦꂾꆹ，
ꃄꅉꑱꄆꉻꈬꌡ，
ꋀꊇꇫꈴꁧꈭꐨꆏ，
ꃄꅉꇁꇈꈬꈥꅐꀜꅐꅉꐛꀐ，
ꑞꑌꋍꂾꂁꀋꄐ。
4 ꋀꐛꇴꐛꉻꃆꀞꌡ，
ꀥꇬꆹꌉꈿꃆꀞꌡ。
5 ꂾꃚꆏꌉꈿꍮꊪꁦꀑꁧꄩꂃꐺꌠꌡ，
ꉈꑴꋙꏜꃆꄔꐗꌠꌡ，
ꀋꇊꆏꈀꇨꀕꌠꂽꐮꎆꇬꉆꄉꌉꈿꂿꄷꑠꁥꌡ。
6 ꋀꊇꇫꑟꇁꇬꆏ，
ꉹꁌꈀꐥꌠꃅꋌꇷꃨꆰꏸꇯꏽ，
ꈁꑓꁋꌙꀕ。
7 ꋀꊇꌳꈄꀋꃀꌟꃅꀥ，
ꂽꑼꇓꉻꅂꆹꌠꌡ，
ꈀꄸꑌꂱꑱꈳꅉꈴ，
ꌼꇑꀠꇁꃅꀋꐛ；
8 ꋀꊇꐮꆽꀋꑐ，ꈀꄸꑌꂱꑱꈝꃀꈴ，
ꁾꇓꋀꅥꁖ，ꇬꇈꇬꄡꄐꌠꀋꐥ。
9 ꋀꑇꇓꈓꂶꌠꇬꊐ，
ꋀꐂꇓꉻꄩꐺ，
ꋀꅂꑳꈐꏭꃹꆹ，
ꏄꍿꌟꃅꌍꑓꇬꑆꆹ。
10 ꋀꈀꑟꅉꇬꆏ，ꃅꃴꃄꅉꃅꄉꇙꈧꐺ，
ꉘꁮꆧꁨꐯꇯꆈꋧꀕ，ꃅꃴꃅꏸꏷꌬꃅꀋꐛ。
11 ꑳꀊꊆꆹꋍꂽꁥꌠꂾꐊꄉꈌꋊꄉꅇꁵ，
ꋍꂽꑼꀉꒉꐯꀉꒉꁥꌠꆹꋍꁵꅇꍬꄉꃅ，ꈀꇨꀕꑠꁥꉬ。
ꑳꀊꊆꃅꑍꆹꇰꀋꃀꇈꊽꐬꆠꑓꆠ，
ꋍꑠꈀꄸꂷꇬꄽꄐꂯ？
ꉹꁌꏭꉪꁏꄺꀱꄷꇳꍝ
12 ꑳꀊꊆꑠꃅꉉ：
“ꀋꃅꋋꇅꑠꃅꐙꑴꇬ，
ꆍꊇꄡꇗꋚꈻ、ꑓꁴꅐ、ꐒꉩꏽꌌꉌꂵꀋꎪꀋꎙꃅꄉꀱꉈꑴ
ꉠꄹꇁ”ꄷ。
13 ꆍꊇꃢꈜꐞꄡꏅꃅ，
ꉌꆐꅑꀱꍠꀕꃅꄉ，
ꀱꉈꑴꑳꀊꊆ-ꆍꏃꃅꌋꄷꇁ，
ꑞꃅꆏ，ꋋꆹꉌꆓꑌ，ꊾꎭꃅꉈ，
ꈝꐮꃅꇨꇅꀋꃃ，ꉂꐪꈁꅼꀕꌠꑌ，
ꄷꀋꁧꋍꉪꐨꄺꀱꄉꉮꃤꀊꋨꈨꁳꇁꊿꌶꀋꎽ。
14 ꋌꋍꉪꐨꄺꀱꄉꉮꃤꄻꆍꌶꀋꎽꃅꌒꃤꄻꆍꁳꐛꅹ，
ꆍꊇꋚꂷꒉꂷꌋꆀꎧꏸꌌꑳꀊꊆ-ꆍꏃꃅꌋꏭꆦꑝꅍ
ꊌꇬꌬꀋꄿ，
ꋍꑠꈀꄸꂷꇫꅉꐚ？
15 ꆍꊇꑴꌠꑭꉢꄉꉶꁱꄏ，
ꋚꈻꃅꑍꄻꏃꃅꌋꃅꑍꃅꄉ，
ꄜꉺꄉꇤꏸꐯꇤꏸꃅꐯꏑ。
16 ꉹꁌꇳꍝꌊꋍꈜꄉ，
ꊨꏦꉌꂵꌋꆀꇭꀧꁳꁦꎴꅐꎻ；
ꀎꋏꀿꃀꈧꌠꇳꍝꌊꋍꈜꇁ，
ꀉꑳꌋꆀꀉꑳꀿꏂꌺꀉꆂꅝꈧꌠꏓꏡꋍꈚꎼꇁ；
ꑮꑟꄹꉇꌠꌐꃶꁳꀀꅉꄉꅐꇁꎻ，
ꑮꑟꄹꉇꌠꑮꃀꁳꉱꈐꄉꁖꇁꎻ。
17 ꑳꀊꊆꎁꃅꌤꃅꌠꆦꑝꊿꈧꌠꁳꈵꑸꌋꆀ
ꆦꑝꅉꈬꄔꄉꑳꉨꄉ，ꑠꃅꉉꎻ：
“ꑳꀊꊆꀋ！ ꆏꈀꎭꀕꃅꅽꉹꁌꎭꃅꉈ，
ꅽꁨꇐꄉꇐꁳꑊꏦꎲꄏꄡꎽ，
ꄻꌞꊿꋅꒊꅍꈩꅍꐛꄡꎽ。
ꑞꃅꌞꊿꁳꉹꁌꋍꏅꈬꄔꄉ
‘ꋀꏃꃅꌋꇿꇬꐥꀋ’ꃅꉉꎻꌠꉬ？”ꄷ。
ꏃꃅꌋꉈꑴꋬꂻꄻꑱꌝꆀꊿꁵ
18 ꑳꀊꊆꆹꉌꂵꁨꐞꄑꃅꋍꃄꅉꉈꇬ，
ꋍꉹꁌꎭꃅꉈ。
19 ꑳꀊꊆꋍꉹꁌꏭꈌꁧꄉꑠꃅꉉ：
“ꇬꉚꄉ！ ꉢꆿꍯ、ꎧꏀꌋꆀꒀꒉꄻꆍꇖꄉ，
ꆍꁳꋠꂊꅝꂊꎻ，
ꉢꀋꎪꃅꆍꁳꇁꌞꇵꏤꒉꅍꈩꅍꐛꀋꎽꀐ。
20 ꉢꒈꀑꏭꄉꇁꌠꂽꁥꌠꁳꆍꐞꈜꎴꃅꁧꎻ，
ꋀꉢꈹꃅꄷꀊꃶꊿꀋꋦꃮꀋꀆꅉꇬꎭ：
ꂴꐊꁥꌠꉢꈹꁭꅐꎾꃝꂶꌠꇬꊐ，
ꊁꐊꁥꌠꉢꈹꁮꐚꎾꃝꂶꌠꇬꊐ；
ꍹꐛꃴꐛꌠꃅꌗꄓꄉ，ꍹꅿꏢꅿꇧꁠꀐ。
ꑳꀊꊆꇯꍝꃅꌤꇰꀋꃀꐘꋌꃅꐛꀐ！
21 ꃄꅉꀋ！ ꏸꄡꏦ！ ꉌꇿꑓꇿꌶ！
ꑞꃅꆏ，ꑳꀊꊆꆹꌤꇰꀋꃀꐘꋌꃅꐛꀐ。
22 ꃄꅉꇬꑋꁮꉆꁮꀋ！ ꏸꄡꏦ，
ꑞꃅꆏ，ꇈꈬꇬꁬꅿꆰꅿꇁꀐ，
ꌩꁧꂷꅑꇁꀐ，
ꀋꃨꂷꅑꌩꁧꌋꆀꑌꃀꌧꊈꌩꁧꐯꇯꂷꅑꀮꇗꀕꀐ。
23 ꑭꉢꉹꁌꋍꏅꊈꀋ！ ꆍꊇꉌꇿꑓꇿꌶ！
ꆍꊇꑳꀊꊆ-ꆍꏃꃅꌋꐛꅹꃅꄉꉌꇿꌶ；
ꑞꃅꆏ，ꋌꀋꎪꀋꎙꃅꂷꉐꐛꄡꑟꄮꇬꂷꉐꐛꆍꇖ，
ꀋꉊꂴꏭꌟꃅꄉ，ꃅꍵꄮꐰꉐꐙꇁꎻ，
ꃅꑌꄮꐰꑌꉐꐙꇁꎻꀐ。
24 ꋙꋩꄸꉺꋚꀋꅓꀐ，
ꎧꋏꅉꇬꎧꏀꐛꀐ，
ꒀꍑꅉꇬꒀꒉꂋꇁꀐ。
25 ꉡꆹꂽꑼꀉꒉꑠꁥꉢꁆꌌꆍꈬꄔꒉꎻꀐ，
ꋀꊇꁯꍛꇥꑑ、ꍈꀮꀉꌙ、ꍈꀮꀊꃴ、ꁯꄸꆰꄸꈨꌡ，
ꂴꏭꈍꑋꈓꇬꋀꇣꋠꄉꈧꌠꆹ，
ꉢꄻꉈꑴꆍꁳꌐꌠꉬ。
26 ꆍꊇꆹꀋꎪꃅꋠꅍꅝꒉꀉꑌꃅꊌꄉ，ꋠꇎꅝꇎ；
ꆍꊇꑳꀊꊆ-ꆍꏃꃅꌋꏭꍖꀴ，
ꑞꃅꆏ，ꋌꆍꎁꃅꌤꂵꇖꀕꌠꃅꀐ。
ꉠꉹꁌꆹꐩꋊꐩꍂꃅꑊꏦꎲꄏꑠꊝꀋꇁꀐꌠꉬ。
27 ꑠꃅꄉ，ꆍꊇꆹꀋꎪꃅꉢꑱꌝꆀꈬꄔꐥꌠꆍꅉꐚ，
ꀉꁁꂷꀋꐥꃅ，ꉢꀉꄂꑳꀊꊆ-ꆍꏃꃅꌋꉬꌠꑌ
ꆍꅉꐚꌠꉬ。
ꉠꉹꁌꆹꐩꋊꐩꍂꃅꑊꏦꎲꄏꑠꊝꀋꇁꀐꌠꉬ。
28 ꊁꆏ，ꉡꆹꉠꒌꁳꇁꐧꇁꃰꊿꇭꀧꌵꎽ。
ꆍꌳꃈꅮꆹꌋꅇꂷꄜꇁ，
ꆍꀍꋏꀿꃀꆹꀄꂼꇣꋲꌠꂻꇁ，
ꆍꀊꉘꌠꆗꆹꐛꒌꇣꋲꌠꂿꇁ。
29 ꃅꑍꀊꋨꄮꇬꆏ，
ꉠꒌꉢꄻꉠꁏꐚꌋꆀꁏꃀꌵꇁꎻꌠꉬ。
30 ꉡꆹꉬꉎꉬꐮꄉꌤꆿꇣꋲꇤꑞꂵꇖꀕꌠꃅ，
ꌦꅪ、ꃆꄔ、ꃅꇴꑠꁳꇫꅐꇁꎻ。
31 ꉘꁮꐈꌌꆈꋧꀕꃅꐙ，ꆧꁨꐈꇁꌦꅪꌟꃅꅪ，
ꋍꑠꆹꑳꀊꊆꃅꑍꇰꀋꃀꇈꊽꐬꆠꑓꆠꄹꉇꇫꑟꇁꂾ
ꇯꆐꇫꅐꇁꌠꉬ。
32 ꀊꋨꄮꇬꆏ，ꑳꀊꊆꂓꄜꄉꇖꂟꈧꌠꆹꀋꎪꃅꈭꋏꊌ；
ꑞꃅꆏ，ꑳꀊꊆꉉꄉꌠꌟꃅ，
ꑭꉢꁧꇬꌋꆀꑳꇊꌒꇌꇓꈓꇬꊿꉮꃤꀋꌸꃅꆶꈭꅐ
ꇁꌠꐥꌠꉬ。
ꊿꈭꅐꇁꈧꌠꈬꄔꇬꆹꑳꀊꊆꇳꍝꄉꈧꌠꇫꐊ”ꄷ。