ꀊꃀꌦꄯꒉ
ꀊꃀꌦꐛꒌꇣꋲꌠꋌꊌꂿ
1
1 ꃶꑭꑸꒀꄊꃰꃅꄺꄮꇬ，ꒀꀊꏂꄰꌺꑳꇊꀧꀊꑱꌝꆀꃰꃅꄺꄮꇬ，ꀉꇨꃅꃄꇙꂾꑍꈓꄹꈎꌠ，ꄝꇰꑸꇓꈓꄉꇁꌠꆫꊿꀊꃀꌦꆹꑱꌝꆀꊿꃆꂮꐛꒌꇣꋲꂷꋌꊌꂿꇈ，ꋌꉉꊾꇰ。2 ꋌꑠꃅꉉ：
“ꑳꀊꊆꀋꎪꃅꑭꉢꄉꂆꏅꎼꇁ，
ꑳꇊꌒꇌꄉꈌꋊꄉꅇꉉꅐꇁ；
ꆫꊿꆫꁍꀉꃶꇤꊭꀕ，
ꏦꂱꁧꄩꈤꐙꏢꐙꌐ”ꄷ。
ꏃꃅꌋꇁꌊꑱꌝꆀꀊꈫꀊꇋꇩꏤꈧꌠꇇꇩꍈ
3 ꑳꀊꊆꑠꃅꉉ：
“ꄊꂷꌧꇱꊿꌕꃢꀋꄿꇖꃢꃅꄉꑽꃤꐆꇬꎷ，
ꋌꎸꅍꋙꋩꅍꌊꏸꆺꊿꅥꄁꀐ，
ꑠꅹ，ꉢꈍꃅꑌꄝꋌꀋꏆꃅꋋꇇꇩꍈꌠꉬ。
4 ꉢꃆꄔꁳꊰꉳꑪꃰꃅꑷꂿꐗꇁꎻ，
ꀝ.ꉳꄊꃰꃅꑷꂿꈫꈈꈧꌠꐗꇫꎭꌐ；
5 ꉢꀋꎪꃅꄊꂷꌧꇱꄇꂿꆹꏮꅍꏡꌠꐷꆸꐔꇫꎭ，
ꑸꊉꐦꀞꀀꌠꉹꁌꋍꏅꌋꆀꀨ.ꑱꄆꏲꌋꂠꌋꈧꌠ
ꐯꇯꈔꋏꇫꎭꌐ；
ꑸꇂꊿꆹꀋꎪꃅꌞꊿꇱꁮꌊꏣꇓꃅꄷꁧꌠꉬ”ꄷ。
ꋍꑠꆹꑳꀊꊆꉉꌠꉬ。
6 ꑳꀊꊆꑠꃅꉉ：
“ꏦꌒꌕꃢꀋꄿꇖꃢꃅꑽꃤꐆꇬꎷ，
ꊿꋌꁮꌊꇁꈧꌠꈀꐥꃅꋌꏮꑱꄏꊿꁵ，
ꑠꅹ，ꉢꈍꃅꑌꄝꋌꀋꏆꃅꋋꇇꇩꍈꌠꉬ。
7 ꉡꆹꃆꄔꁳꊰꏦꌒꇓꈓꐗꇁꎻ，
ꋍꁾꇓꈫꈈꈧꌠꃅꐗꇫꎭꌐ；
8 ꉡꆹꑸꏂꄳꇓꈓꉹꁌꋍꏅꌋꆀꑸꏃꏸꆺꇓꈓꏲꌋꂠꌋꈧꌠꐯꇯꈔꋏꇫꎭꌐ；
ꉢꀱꌊꑱꇱꇍꇓꈓꅥꌉꇁꇈ，
ꃏꆺꌧꊿꇫꋒꇈꈧꌠꀋꎪꃅꈔꑍꌐꌠꉬ”ꄷ。
ꋍꑠꆹꑳꀊꊆꉉꌠꉬ。
9 ꑳꀊꊆꑠꃅꉉ：
“ꄫꇊꌕꃢꀋꄿꇖꃢꃅꑽꃤꐆꇬꎷ，
ꉹꁌꈀꐥꃅꋌꏮꑱꄏꊿꁵ，
ꋍꃺꑌꌋꆀꏤꄉꌠꐯꐉꏤꐪꋌꇬꀋꍬ，
ꑠꅹ，ꉢꈍꃅꑌꄝꇬꀋꏆꃅꋋꇇꇩꍈꌠꉬ。
10 ꉡꆹꃆꄔꁳꊰꄫꇊꇓꈓꇓꉻꏭꌠꌸꇁꎻ，
ꋍꁾꇓꈫꈈꈧꌠꃅꐗꇫꎭꌐꌠꉬ”ꄷ。
11 ꑳꀊꊆꑠꃅꉉ：
“ꑱꄏꊿꌕꃢꀋꄿꇖꃢꃅꑽꃤꐆꇬꎷ，
ꋌꂗꍵꇇꁉꊭꌊꋍꃺꑌꈹꌉꐺ，
ꉌꂵꊾꎭꃅꉇꑭꍈꀋꑌ，
ꋌꇨꇅꃃꅩꌬꀕꌊꐺꇬꎷ，ꈍꄮꑌꃃꐰꇁꀋꉆ，
ꑠꅹ，ꉢꈍꃅꑌꄝꇬꀋꏆꃅꋋꇇꇩꍈꌠꉬ。
12 ꑠꃅꄉ，ꉡꆹꃆꄔꁳꊰꄝꂸꇓꈓꐗꇁꎻ，
ꀧꌦꇁꇓꈓꁾꇓꈫꈈꈧꌠꃅꐗꇫꎭꌐꌠꉬ”ꄷ。
13 ꑳꀊꊆꑠꃅꉉ：
“ꑸꂱꊿꌕꃢꀋꄿꇖꃢꃅꑽꃤꐆꇬꎷ，
ꏸꆺꃅꄷꌋꅪꃴꑌꌠꀃꃀꋀꀺꇫꎭ，
ꊨꏦꏲꄸꃄꁕꍔꆙ，
ꑠꅹ，ꉢꈍꃅꑌꄝꋀꀋꏆꃅꋀꇇꇩꍈꌠꉬ。
14 ꐯꌉꐮꆳꇳꉔꄮꇬ，ꏃꇔꉐꂷꈀꇨꀕꃅꁎꄮꇬꆏ，
ꉡꆹꃆꄔꁳꆿꀠꇓꈓꐗꇁꎻ，
ꋍꁾꇓꈫꈈꈧꌠꃅꐗꇫꎭꌐꌠꉬ。
15 ꋀꃰꃅꌋꆀꇛꌺꈧꌠꐯꇯꌞꊿꁮꌊꁧꌐꌠꉬ”ꄷ。
ꋍꑠꆹꑳꀊꊆꉉꌠꉬ。