ꀊꃀꌦꄯꒉ 2

1 ꑳꀊꊆꑠꃅꉉ：

“ꃀꑸꊿꌕꃢꀋꄿꇖꃢꃅꑽꃤꐆꇬꎷ，

ꑱꄏꃰꃅꃷꅍꈧꌠꋀꇱꐗꈑꆠꐛ，

ꑠꅹ，ꉢꈍꃅꑌꄝꇬꀋꏆꃅꋋꇇꇩꍈꌠꉬ。

2 ꉡꆹꃆꄔꁳꊰꃀꑸꐗꇁꎻ，

ꏦꇊꇓꈓꁾꇓꈫꈈꈧꌠꃅꐗꇫꎭꌐ；

ꃀꑸꆹꀋꎪꃅꏞꏈ、ꇳꉔ、ꉶꁱꄎꃚꈬꇬꄉꈔꑍꌠꉬ；

3 ꉡꆹꃀꑸꏲꌋꂶꌠꉢꈔꋏꇫꎭ，

ꏃꌋꂠꌋꈧꌠꈀꐥꃅꋋꌋꆀꐯꇯꌉꇫꎭꌐꌠꉬ”ꄷ。

ꋍꑠꆹꑳꀊꊆꉉꌠꉬ。

4 ꑳꀊꊆꑠꃅꉉ：

“ꒀꄊꌕꃢꀋꄿꇖꃢꃅꑽꃤꐆꇬꎷ，

ꋀꊇꑳꀊꊆꉙꅇꂘꅇꊪꀋꅲ，

ꑳꀊꊆꏥꀕꍬꀋꅲ；

ꋀꁍꁈꌦꌋꃶꀋꐚꑠꊂꈹꐺꄉ，ꋀꊇꈜꑽꁧꀐ，

ꑠꅹ，ꉢꈍꃅꑌꄝꋀꀋꏆꃅꋀꇇꇩꍈꌠꉬ。

5 ꉡꆹꃆꄔꁳꊰꒀꄊꐗꇁꎻ，

ꑳꇊꌒꇌꇓꈓꁾꇓꈫꈈꈧꌠꃅꐗꇫꎭꌐꌠꉬ”ꄷ。

ꏃꃅꌋꑱꌝꆀꊿꀞꇽꇁ

6 ꑳꀊꊆꑠꃅꉉ：

“ꑱꌝꆀꌕꃢꀋꄿꇖꃢꃅꑽꃤꐆꇬꎷ，

ꐎꂷꐛꅹꃅꑖꊿꋀꃷꇫꎭ，

ꑮꅮꋓꐛꅹꃅꌢꎭꌠꋀꃷꇫꎭ。

7 ꌢꎭꌟꁧꌠꀂꏾꌦꏭꌟꃅꋀꌌꃄꅉꄉꄔꈻ；

ꎭꇁꅧꌺꈝꃀꋀꋍꋀꇊꄉ。

ꀋꁧꀉꌺꐯꇯꌋꅪꋍꂷꍯꄉ，

ꉠꂓꌗꋀꌌꍍꋉꄸꄀꇧꁠꀐ。

8 ꋀꊇꆹꆦꑝꅉꈧꌠꏢꁮꇬꄉ，

ꌞꃢꈜꎆꄇꄉꈧꌠꋀꌌꀏꈈꀀ，

ꉈꑴꌞꊿꋀꎼꎧꀵꄉꎧꈧꌠꋀꌌꏃꃅꌋꑷꂿꇬꄉꅝ。

9 ꉡꆹꋀꂾꄉꑸꃀꆺꊿꉢꈔꋏꇫꎭꀐ；

ꋀꊇꌿꁧꎺꁧꌟꃅꇴꒉꉺꒉ，

ꌩꁧꀉꒉꌠꌟꃅꇷꄙꑴꇬ，

ꄚꄩꏯꂶꂷꉢꑣꇫꎭ，

ꀏꏯꐴꑭꑌꉢꍠꇫꎭꀐ。

10 ꆍꊇꉞꏹꃅꄷꄉꉢꏃꀍꉀꇁ，

ꉢꏃꇈꈬꅔꈋꇖꊰꈎꐥꄉ，

ꑸꃀꆺꊿꃄꅉꈧꌠꁳꇁꆍꁍꑗꄉꈁꐛꎻꀐ；

11 ꉢꆍꌺꇖꊂꋊꈬꄔꇬꄉꌋꅇꄜꊿꈨꉢꄖꄑꎼꇁ，

ꆍꀊꉘꌠꆗꈬꄔꇬꄉꇂꑮꇓꊿꈨꉢꌊꄻꎼꇁ，

ꑱꌝꆀꊿꀋ！ ꑠꃅꐙꌠꀋꉬꅀ？”ꄷ。

ꋍꑠꆹꑳꀊꊆꉉꌠꉬ。

12 ꄚꆍꊇꆏꄀꇗꇱꄉꎧꏸꆍꄻꇂꑮꇓꊿꄐ，

ꊡꀱꄉꌋꅇꄜꊿꏭ‘ꌋꅇꂷꄡꉉꀐ’ꄷ。

13 ꇬꉚꄉꅊꇈ！ ꉡꆹꆍꆼꍅꆹꍑꇁꌠꉬ，

ꀋꇊꆏꃅꈻꍯꋚꂷꐛꃅꊐꄉꑠꇷꇁꆍꄩꍑꌠꌡ。

14 ꀥꐳꈧꌠꑌꁾꅉꀋꊌ，

ꊋꒉꈧꌠꑌꊋꅐꀋꄐ，

ꌳꈄꈧꌠꑌꊨꏦꈭꋏꀋꄐ；

15 ꐳꉹꌌꈧꌠꑌꇬꉆꀋꄐ，

ꑭꐳꈧꌠꆶꈭꅐꀋꄐ，

ꃆꀞꋩꈧꌠꑌꊨꏦꈭꋏꀋꄐ。

16 ꀊꋨꄹꉈꑞꄮꇬꆏ，

ꌳꈄꀬꅑꈀꇨꀕꌠꂯꀋꎪꃅꅩꀧꍓꃅꄉꆶꁧꌠꉬ”ꄷ。

ꋍꑠꆹꑳꀊꊆꉉꌠꉬ。