3
1 ꑱꌝꆀꊿꀋ！ ꆍꊇꑳꀊꊆꆍꏭꊨꌠꅇꂷꈧꌠꅲꄡꑟ，ꋋꆹꉞꏹꃅꄷꄉꋌꏃꀍꉀꇁꌠꑱꌝꆀꄰꑭꊂꈀꐥꌠꏭꑠꃅꊨꀖ：2 “ꋧꃅꊿꋅꈀꐥꌠꈬꄔꇬ，ꉢꆍꀉꄂꌊꄻ；
ꑠꅹ，ꉢꀋꎪꃅꆍꈀꐆꌠꑽꃤꈧꌠꒉꄸꃅꆍꇇꇩꍈ
ꌠꉬ”ꄷ。
ꌋꅇꄜꊿꃅꎁ
3 ꀋꄸꄷꊿꑍꂷꂴꐯꉇꐯꏤꀋꄉꑲꆏ，
ꈍꃅꄉꐮꐊꁧꉆꂯ？
4 ꀋꄸꄷꆿꅪꂷꑋꁮꉆꁮꋌꈹꅞꌠꀋꉬꑲꆏ，
ꋌꌩꏪꇬꄉꂇꑴꅀ？
ꀋꄸꄷꆿꅪꀊꏀꂷꊌꅍꀋꐥꑲꆏ，
ꋌꃅꐬꇬꄉꏅꑴꅀ？
5 ꀋꄸꄷꋙꍈꄻꄔꑟꇬꄀꀋꄉꑲꆏ，
ꉌꊭꈍꃅꄉꐚꄔꑟꇬꂦꇁꂯ？
ꃱꀜꇬꉌꊭꇬꀋꂦꑲꆏ，
ꃱꀜꈍꃅꃄꅉꇬꄉꀜꇁꂯ？
6 ꇓꈓꇬꉶꁱꄏꑲꆏ，
ꉹꁌꈧꌠꈍꃅꏸꀋꏦꂯ？
ꉮꃤꇁꇓꈓꂷꇬꌸꇬ，
ꑳꀊꊆꄻꇬꌶꇁꎻꌠꀋꉬꅀ？
7 ꌋꑳꀊꊆꂴꇯꆐꋍꉪꐨꈧꌠ
ꋌꉉꋍꁏꐚꌋꅇꄜꊿꈧꌠꇰꀋꄉꑲꆏ，
ꋋꆹꌤꆿꑞꑌꀋꃅ。
8 ꆿꅪꏅꇬꈀꄸꂷꐬꀋꆠ？
ꌋꑳꀊꊆꅇꂷꉉꄉꑲꆏ，
ꈀꄸꂷꋍꅇꂷꀋꄜꀬ？
ꌒꂷꆀꑸꇓꈓꌐꂫ
9 ꆍꊇꑴꌠꑸꏂꄳꇓꈓꌋꆀꉞꏹꃅꄷꑷꂿꈫꈈꈧꌠꇬꄉ
ꑠꃅꄛꇰ：
“ꌒꂷꆀꑸꈭꇍꉘꁌꈧꌠꇬꄉꐯꏑꇁ，
ꀊꄶꄉꇓꈓꇬꊿꈍꃅꌼꇑꀠꇁ、ꐮꆼꍅꆹꅷ
ꇧꁠꌠꉜꇁ”ꄷ。
10 ꋀꊇꊋꒉꊋꁧꅸꄉꊿꇏꊿꑣ，
ꇑꌊꇁꈧꌠꋀꄻꊨꏦꑷꂿꇬꁧꄉ，
ꄚꌤꆿꎃꊒꌠꆏꃅꑲꀋꌧ”ꄷ。
ꋍꑠꆹꑳꀊꊆꉉꌠꉬ。
11 ꑠꅹ，ꌋꑳꀊꊆꑠꃅꉉ：
“ꁮꐚꀋꎪꃅꃅꄷꋌꈚꇊꄉꌉꇁꇈ，
ꆍꊋꊰꌗꊰꄉ，
ꆍꑷꂿꈫꈈꌠꋀꇑꅜꌠꉬ”ꄷ。
12 ꑳꀊꊆꉈꑴꑠꃅꉉ：“ꎆꆫꊿꈍꃅꆿꅪꈂꀸꇬꄉꎆꏸꑭꑍꁆꅀꅳꀧꍈꋌꇑꌊꇁꆏ，ꌒꂷꆀꑸꀀꌠꑱꌝꆀꊿꈭꋏꊌꐨꑌꑠꃅꐙ，ꀀꈤꎏꎐꍈꌋꆀꈈꇉꆼꈘꀛꍈꀉꄂꇫꋒꇈꌠꉬ”ꄷ。
13 ꌋꑳꀊꊆ-ꄙꀕꃪꀕꂽꑼꌊꁈꏃꃅꌋꄹꇬ：
“ꆍꊇꅇꂷꋋꇬꅲꄉ，ꌌꑸꇱꄰꏯꅇꈪꊐꄡꑟ。
14 ꑱꌝꆀꑽꃤꐆꄉꉢꋀꇇꇩꍈꇁꀊꋨꄹꉇꆏ，
ꉢꀨꄯꆀꆦꑝꅉꈧꌠꑌꐅꀘꇁ，
ꆦꑝꅉꎏꎐꈧꌠꀋꎪꃅꊿꐡꇫꎭꇈ，
ꊰꇁꃄꅉꇬꅞꌠꉬ。
15 ꉡꆹꀋꎪꃅꈺꄮꐰꀀꑳꌋꆀꊷꄮꐰꀀꑳꐯꇯꐆꇫꎭ，
ꆺꃮꎐꌊꁰꐂꄉꌠꑷꂿꈧꌠꑌꅥꐷꇫꎭ，
ꑷꂿꉼꏒꀕꈧꌠꆷꇫꎭꄉꐘꀋꈨꌐꎽꌠꉬ”ꄷ。
ꋍꑠꆹꑳꀊꊆꉉꌠꉬ。