ꒀꇓꄯꒉ 1

ꒀꇓꄯꒉ

ꍈꀮꉮꃤꈀꇨꀕꌠꇫꅐꇁ

1 ꑳꀊꊆꅇꂷꇁꌊꀺꄲꇓꄰꌺꒀꇓꄷꑟꄉ，ꇬꏭꑠꃅꉉ：

2 “ꀍꋏꌟꒉꊈꀋ！ ꆍꊇꅇꂷꋋꈨꅲꄡꑟ；

ꃅꄷꋌꈚꇬꈁꀀꌠꉹꁌꊈꀋ！ ꆍꊇꅳꀧꍔꄉꅲ。

ꆍꊇꐤꄮꇬ，ꅀꆍꁍꁈꐤꄮꇬꌤꆿꑠꃅꐙꌠꇫꅐꋺꑴꅀ？

3 ꆍꊇꑴꌠꌤꋋꏢꄜꆍꌺꋎꌠꇰ，

ꌺꋎꌠꁳꄜꇖꋎꌠꇰꎻ，

ꇖꋎꌠꁳꄜꋀꊂꋊꈧꌠꇰꎻ。

4 ꁯꍛꇥꑑꋠꋑꈧꌠꆏ，ꍈꀮꀉꌙꌠꇫꋠꇁ；

ꍈꀮꀉꌙꌠꋠꋑꈧꌠꆏ，ꍈꀮꀊꃴꌠꇫꋠꇁ；

ꍈꀮꀊꃴꌠꋠꋑꈧꌠꆏ，ꁯꄸꆰꄸꇫꋠꇁ。

5 ꎧꑱꈧꌠꀋ！ ꑱꁯꇁꌶ，ꑳꉨꌶ；

ꎧꇢꈧꌠꀋ！ ꎧꒉꐔꌠꐛꅹꃅꄉꈨꃅꉩꌶ，

ꑞꃅꆏ，ꎧꏸꈘꄉꅽꂱꀯꊭꅍꀋꊌꀐ。

6 ꇩꏤꈀꇨꀕꑠꂷꄓꌊꉠꃅꄷꅥꌉꇁ，

ꋀꂽꑼꃷꂿꑖꀋꉬ；

ꋀꎐꂷꆹꆿꅪꎐꂷꌡ，

ꆿꅪꀋꃀꑣꎐꌡ。

7 ꉪꑌꃀꌧꊈꁦꀕꈧꌠꋀꆸꐔꆼꐷꇫꎭ，

ꉪꀋꃨꂶꂷꌩꁧꈧꌠꋀꍀꋀꉈꐯꀋꉜ，

ꑅꇷꋀꐒꄉꋀꇵꇫꎭ，

ꌩꇇꈧꌠꐍꊏꀕꃅꇫꎍ。

8 ꑮꆜꌹꍈꋍꌐꃶꋌꇫꄹꐛꐮꂶꌠꌦꐛꅹꃅ，

ꃆꁁꃢꈜꈚꄉꐒꉩꏽ，

ꆍꊇꑌꋌꌟꃅꐒꉩꌶ。

9 ꑳꀊꊆꑷꂿꇬꋚꂷꒉꂷꆦꑝꅍꌋꆀꎧꏸꆦꑝꅍ

ꈧꌠꈘꀐ，

ꑳꀊꊆꎁꃅꌤꃅꌠꆦꑝꊿꈧꌠꐒꊀꏽ。

10 ꃄꅉꈥꅐꀜꅐ，ꁍꑗꐒꀵꊀꄜ；

ꑞꃅꆏ，ꋚꁧꈔꑍꌐ，ꎧꏀꃵꌣꀕ，ꒀꒉꑌꈘꀐ。

11 ꑘꃅꊖꑣꌠꀋ！ ꆍꊇꑊꏦꎲꄏꌶ；

ꑌꃀꌧꊈꊩꉘꌠꀋ！ ꆍꊇꐒꉩꌶ；

ꑞꃅꆏ，ꃄꅉꇬꌿꁧ、ꎭꁧꌋꆀꀉꁁꋚꁧꒉꁧꃅ

ꈔꑍꌐꀐ。

12 ꑌꃀꌧꊈꁦꀕꀊꃶꀐ，

ꀋꃨꂶꂷꌩꁧꈤꐙꀐ，

ꏃꆺꌩꁧ、ꒊꊰꌩꁧ、ꌧꅪꌩꁧꌋꆀꀉꁁꌩꁧꇓꁧꑞꑌ

ꀊꃶꌐꀐ；

ꉹꁌꋍꏅꉌꂵꇿꅍꄚꄉꑍꀐ。

13 ꆦꑝꊿꈧꌠꀋ！ ꃆꁁꃢꈜꈚꄉꉩꌶ；

ꆦꑝꅉꇬꄉꌤꃅꌠꀋ！ ꐒꉩꌶ；

ꉠꏃꃅꌋꎁꃅꌤꃅꌠꀋ！ ꆍꊇꁨꇁ！

ꈊꃀꃆꁁꈚꄉꀀ，

ꑞꃅꆏ，ꆍꏃꃅꌋꑷꂿꇬꋚꌗꒉꌗꌋꆀꎧꌗꈘꌐꀐ。

14 ꆍꊇꃅꑍꑠꑍꄻꏃꃅꌋꃅꑍꃅꄉꋚꈻ，

ꄜꉺꄉꇤꏸꐯꇤꏸꃅꐯꏑ，

ꅡꈭꌟꒉꌋꆀꉹꁌꃅꄷꋌꈚꈁꀀꌠꃅꇴꌊꇁꌐ，

ꈀꄸꑌꑳꀊꊆ-ꆍꏃꃅꌋꑷꂿꇬꄉ，

ꈧꊰꀕꃅꑳꀊꊆꏭꇖꂟꇁ。

15 ꀊꁪ！ ꆽꀠꇁꀐ！

ꑞꃅꆏ，ꑳꀊꊆꃅꑍꇫꑟꇁꂯꄉꀐ，

ꀋꇊꆏꈔꇁꑍꌠꀋꄐꅍꀋꀋꐥꂶꌠꄷꄉꅐꇁꌠꌡ。

16 ꋚꒉꆹꑓꀠꀕꃅꉪꂾꄉꐘꀋꈨꀐꌠꀋꉬꅀ？

ꉌꇿꑓꇿꐨꆹꉪꏃꃅꌋꑷꂿꇬꄉꑍꆘꅝꀐꌠꀋꉬꅀ?

17 ꋚꇕꆹꃄꅉꇬꄉꀊꃶꌦ，

ꋙꄉꑳꇬꈥꇤꀕ，ꊸꑳꑌꐡꈥꅐꀐ，

ꑞꃅꆏ，ꋚꁧꒉꁧꀊꃶꌦꌐꀐ。

18 ꎇꃀꈧꌠꏄꀆ，

ꇂꁮꈧꌠꃵꋩꌊꇫꏮꐺ，

ꑞꃅꆏ，ꆫꁍꇬꏜꀋꋦꀐ，

ꍶꑿꑌꎬꅧꇧꁠꀐ。

19 ꑳꀊꊆꀋ！ ꉢꅽꏯꇖꂟ，

ꑞꃅꆏ，ꇈꈬꆫꁍꇬꏜꈧꌠꃆꄔꇱꐗꇫꎭꌐ，

ꃄꅉꌩꁧꇓꁧꈧꌠꃄꐔꅑꉱꇤꌐ。

20 ꇈꈬꇬꑌꁮꉆꁮꈧꌠꏄꀆꌊꆏꄱꉆꇁ，

ꑞꃅꆏ，ꇉꅶꒈꌺꈧꌠꒉꌤꀊꃶꌐꀐ，

ꅔꈋꆫꁍꃅꄉꃆꄔꐗꇫꎭꌐꀐ。