ꉼꑭꀊꄯꒉ 14

ꏃꃅꌋꑱꌝꆀꊿꏭꀱꇁꄷꇳꍝ

1 ꑱꌝꆀꀋ！ ꆏꀱꉈꑴꑳꀊꊆ-ꅽꏃꃅꌋꄷꇁ，

ꆏꅽꊨꏦꑽꃤꐛꅹꃅꐚꇬꄚꀐ。

2 ꀱꑳꀊꊆꄷꇁꄡꑟ，

ꅇꂷꌊꋍꏭꑠꃅꉉ： “ꆏꈀꎭꀕꃅꉪꑽꃤꄸꃤꇔꇫꎭꌐ，

ꉪꄺꀱꌠꈼꅇꂟꅇꊪ，

ꑠꃅꑲꆏ，ꉪꊇꆹꍗꅇꀴꅇꌊꇌꉘꌺꎃꊐꄉꆦꑝꅍꃅꌞꆏꁳꌠꉬ。

3 ꑸꎽꉪꈭꋏꀋꄐ，

ꉪꊇꌉꈿꃆꀞꀋꋩꀐ；

ꉪꊇꌦꁱꌊꁱꉪꄻꄉꌠꈧꌠꏭ：

‘ꆍꊇꆹꉪꏃꃅꌋꉬ’ꃅꀋꉉꀐ；

ꅽꄹꀉꄂꌺꍸꇖꇜꎭꃅꉈꌠꊌ”ꄷ。

ꏃꃅꌋꑱꌝꆀꊿꉈꇬꑓꑣ

4 ꉢꀋꎪꃅꋀꆸꉈꆽꁁꌊꇗꅉꐞꁧꈧꌠꉃꄻ，

ꉂꏾꃅꄉꋀꉁꅉ，

ꑞꃅꆏ，ꉢꋀꂿꇬꇨꇅꃃꐰꀐ。

5 ꉢꑱꌝꆀꊝꇬꃅꃴꍑꒉꌡ，

ꋋꆹꀋꎪꃅꀙꉼꁬꃨꌟꃅꃨ，

ꆀꀠꇍꌿꁧꎺꁧꌟꃅꐴꅿꅼ。

6 ꋍꅄꌺꀉꑌꃅꇫꅿꇁ，

ꋍꋽꎔꐨꆹꏝꃴꀋꍰꌩꁧꌡ，

ꅿꉗꌒꐨꆹꆀꀠꇍꌿꁧꎺꁧꌡ。

7 ꋀꊇꀋꎪꃅꀱꉈꑴꋍꌐꒉꇂꃴꁿꇁꄉ，

ꇣꋦꉘꁇꁉ；

ꋀꊇꆹꑌꃀꌧꊈꌟꃅꐝꇤꇪꑳꀕ，

ꋍꂓꌗꆹꆀꀠꇍꎧꏸꌟꃅꂄꎔ。

8 ꑱꃔꆃꌋꆀꌩꁱꇓꁱꐮꑌꐯꑲꅍꑞꐥ？

ꉢꋍꇖꅇꂟꅇꅲ，ꋋꉈꇬꑓꑣꌠꉬ。

ꉡꆹꌩꁧꃴꇉꇈꁧꌡ，

ꅽꂶꂷꈧꌠꉠꄹꅐꇁꌐꌠꉬ。

ꄽꂫꅇ

9 ꊿꉪꑌꌧꋬꌠꆹ，ꌤꋍꑠꋌꐝꉅꅊꇈ，

ꊿꀑꁮꅺꐳꌠꆹ，ꋋꈨꈀꐥꃅꋌꅉꐚꌐꅊꇈ。

ꑞꃅꆏ，ꑳꀊꊆꈝꃀꆹꊒꆽꀕ，

ꑖꊿꈛꎼꋍꄩꈴ，

ꑽꊿꃪꐛꋍꄩꄚ。