ꄊꑱꆀꄯꒉ
ꄊꑱꆀꃰꃅꑷꂿꇬꄉꌤꃅ
1
1 ꒀꑸꏠꒀꄊꃰꃅꄻꌕꈎꐛꄹꈎꌠꆏ，ꀠꀘꇍꃰꃅꆀꀯꏧꆀꌒꇁꌊꑳꇊꌒꇌꑟꇈ，ꇓꈓꂶꌠꋌꇊꇤꏢꀕꃅꄉꀐ。 2 ꌊꆹꒀꄊꃰꃅꒀꑸꏠꌋꆀꏃꃅꌋꑷꂿꇬꊐꅍꊐꀏꈨꋌꏮꆀꀯꏧꆀꌒꇇꈐꇬꊐꄉ，ꊐꅍꊐꀏꈧꌠꆀꀯꏧꆀꌒꇱꎞꌊꏃꇂꃅꄷꋍꌦꌋꁱꑳꈐꏭꎆꋚꄉꑳꇬꊐꀐ。3 ꆀꀯꏧꆀꌒꃰꃅꆹꋍꊿꎶꇛꌺꑸꏂꀻꇂꏭ：“ꆏꑱꌝꆀꊿꈬꄔꄉ，ꃰꃅꊂꋊꈨꌋꆀꊿꐤꒉꑠꈨꌋꌊꇁ， 4 ꌠꆗꋋꈨꆹꌠꆗꆐꀋꅑ、ꌺꎔꌺꏦ、ꀑꁮꅺꐳ、ꌧꇐꌷꉔ、ꌤꉜꆿꉜꇮ、ꃰꃅꑷꂿꇬꄉꌤꃅꄎꑠꑲꆀꍑ。ꆏꑴꌠꏦꇍꄂꅇꂷꌋꆀꁱꂷꄻꋀꂘ”ꄷ。 5 ꃰꃅꆏꋍꑍꋑꀋꋒꋍꋚꂂꒉꎔꌋꆀꎧꏸꈧꌠꇬꄉ，ꋍꁧꁸꋀꍈꇬꎷ；ꃅꐎꌕꈎꊿꋋꈨꉙꂘꄉ，ꃅꑍꄮꈉꇎꈭꐨꆏ，ꋀꁳꃰꃅꂾꄉꌤꃅꎻꂿꄷ。 6 ꊿꋋꈨꈬꄔꆏꒀꄊꊿꄊꑱꆀ、ꉳꇂꆀꑸ、ꂰꎭꆀ、ꑸꌒꆀꑸꏤꇫꐊ。 7 ꊿꎶꇛꌺꂶꌠꆹꂓꀊꏀꑠꈨꋌꄻꋀꂓꄉ，ꄊꑱꆀꆏꋌꄻꀨꄝꎭꌒꂓꄉ，ꉳꇂꆀꑸꆏꋌꄻꎭꄓꇁꂓꄉ，ꂰꎭꆀꆏꋌꄻꂰꎮꂓꄉ，ꑸꌒꆀꑸꆏꋌꄻꑸꀨꆀꇰꂓꄉ。
8 ꄊꑱꆀꆹꉪꄉꏤꄉꃰꃅꋚꂂꒉꎔꌋꆀꎧꏸꑠꁳꋍꊨꏦꍍꆀꀋꎽ，ꄚꄉ，ꋌꊿꎶꇛꌺꂶꌠꏭꈌꁧꄉꋚꒉꑠꁳꋋꍍꆀꄡꎽꄷꇖꂟ。 9 ꑠꅹ，ꏃꃅꌋꆹꊿꎶꇛꌺꂶꌠꁳꄊꑱꆀꁌꒉ、ꄊꑱꆀꎭꃅꉈꎻ。 10 ꄚꊿꎶꇛꌺꂶꌠꆏꄊꑱꆀꏭ：“ꉢꉠꌌꁈꃰꃅꏦ，ꃰꃅꆹꋚꑞꄻꆍꍈꌠꋌꉉꄉꀐ，ꀋꄸꄷꆍꈁꑓꈌꈤꑓꏮꅍꌞꀉꁁꌠꆗꆍꌋꆀꋍꄜꈧꌠꀋꏣꌠꋌꊌꂿꑲꆏ，ꉠꀂꏾꆹꃰꃅꇱꇽꇫꎭꌠꉬ”ꄷ。
11 ꄊꑱꆀꆏꌟꒉꊿꎶꇛꌺꇱꁆꌌꄊꑱꆀ、ꉳꇂꆀꑸ、ꂰꎭꆀ、ꑸꌒꆀꑸꏤꏲꂠꇁꂶꌠꏭ： 12 “ꆏꉐꀖꉐꇁꄻꉪꍈ，ꀆꐒꀈꄹꀕꌠꇤꉪꄎꄉ，ꅽꁏꐚꋋꈨꌌꃅꑍꊰꑋꎖꉚ， 13 ꋍꈭꐨꆏ，ꆏꉪꈁꑓꌋꆀꌠꆗꃰꃅꋚꄻꋀꍈꄉꈧꌠꈁꑓꌌꐯꌟꉜꑲꆀ，ꆏꈀꂿꈧꌠꈴꄉꅽꁏꐚꊝ！”ꄷ。
14 ꌟꒉꂶꌠꆏꋀꇖꅇꋌꈌꁧꋀꁳꄉ，ꃅꑍꊰꑋꌌꋀꎖꉚ。 15 ꊰꑋꐛꈭꐨꆏ，ꋀꈁꑓꆹꌠꆗꀉꁁꃰꃅꋚꄻꋀꍈꄉꈧꌠꏭꀋꋌꃅꄉꐛꎔ，ꇭꀧꑌꀉꁁꈧꌠꏭꀋꋌꃅꈮꑆ。 16 ꄚꄉ，ꋀꏲꂠꌟꒉꂶꌠꆏꋚꂂꒉꎔꌋꆀꎧꏸꑠꄻꋀꀋꍈꀋꄐꃅ，ꉐꀖꉐꇁꀉꄂꄻꋀꍈꀐ。