ꉼꑭꀊꄯꒉ 1

ꉼꑭꀊꄯꒉ

ꌋꅇꄜꊿꉼꑭꀊꑮꃀꌋꆀꌳꃈꅮ

1 ꃶꑭꑸ、ꒀꄤ、ꑸꉳꌦ、ꑭꀕꏦꏤꒀꄊꃰꃅꄻ，ꒀꀊꏂꄰꌺꑳꇊꀧꀊꑱꌝꆀꃰꃅꄺꄮꇬ，ꑳꀊꊆꅇꂷꇁꌊꀙꆺꄰꌺꉼꑭꀊꄷꑟ。

2 ꑳꀊꊆꇬꂾꃢꌠꉼꑭꀊꏭꅇꉉꇁ。ꑳꀊꊆꇬꏭ：“ꆏꌋꅪꎲꃷꑠꂷꒃꌊꑮꃀꃅ，ꎼꃅꃏꑽꄉꒆꌠꌳꃈꅮꈧꌠꀨꎹ，ꑞꃅꆏ，ꃅꄷꋌꈚꇬꊿꈧꌠꑳꀊꊆꋀꇤꇫꎭꄉ，ꎼꃅꃏꑽꆈꒉꀕꀐ”ꄷ。

3 ꄚꄉ，ꉼꑭꀊꆹꄃꇁꑱꄰꀋꃋꇭꂱꂶꌠꋌꒃꌊꑮꃀꃅꀐ。ꇭꂱꃴꑌꇈ，ꉼꑭꀊꄷꄉꌹꍈꊌꀐ。 4 ꑳꀊꊆꆏꉼꑭꀊꏭ：“ꀉꑳꋋꍈꄻꑳꌦꆺꂓꄉ，ꑞꃅꆏ，ꉢꑷꉼꃰꃅꄰꇇꇩꍈꇁꂯꄉꀐ，ꋋꆹꑳꌦꆺꃅꄷꄉꊿꀉꑌꃅꋌꌉꇫꎭꀐ；ꉢꀋꎪꃅꑱꌝꆀꄰꁳꃰꃅꌅꈌꌬꅷꄚꇬꄉꌐꎻ。 5 ꀊꋨꄹꉇꆏ，ꉡꆹꀋꎪꃅꑳꌦꆺꐦꀞꇬꄉꑱꌝꆀꄰꉹꉢꆸꐔꇫꎭꌠꉬ”ꄷ。

6 ꊁꆏ，ꇭꂱꃴꑌꇈ，ꀋꃋꍈꒆꀐ。ꑳꀊꊆꆏꉼꑭꀊꏭ：“ꀉꑳꋋꍈꄻꇊ.ꇐꉳꂸꂓꄉ；ꉢꀋꎪꃅꑱꌝꆀꄰꎭꃅꀋꉈ，ꈍꃅꑌꑽꃤꄝꋀꀋꏆꀐ。 7 ꄚꉡꆹꒀꄊꄰꎭꃅꉈ，ꋀꁳꑳꀊꊆ-ꋀꏃꃅꌋꉘꇉꄉꈭꋏꊌꎻ；ꉢꋀꈭꋏꇬꐳꉹ、ꂗꍵꑱꃀ、ꌉꆳ、ꃆꀞ、ꃅꋩꂽꑠꉘꇉꌠꀋꉬ。

8 ꇊ.ꇐꉳꂸꍇꌠꀉꆂꀋꅝꈭꐨꆏ，ꇭꂱꆹꃴꑌꇈꌹꍈꒅꌦꀐ。 9 ꑳꀊꊆꆏ：“ꀉꑳꋋꍈꄻꇊ.ꀊꂰꂓꄉ，ꑞꃅꆏ，ꆍꊇꉠꉹꁌꀋꉬ，ꉡꑌꆍꏃꃅꌋꀋꉬ”ꄷ。

ꑱꌝꆀꊿꊁꇁꋍꑍꀱꉈꑴꌄꆣꇁ

10 ꄚꑠꃅꑴꇬ，ꑱꌝꆀꊿꃷꁨꆹꎿꋯꂤꏂꌟꃅꎕꅉꇬꀋꐛ、ꃷꂿꑖꀋꉬꇁꌠꉬ。ꀋꉊꂴꇿꇬꄉꋀꏭ：“ꆍꊇꉠꉹꁌꀋꉬ”ꄷꉉꆏ，ꊁꇁꋍꑍꑌꀊꄶꇬꄉꋀꏭ：“ꆍꊇꆹꐩꋊꐩꍂꇫꐥꌠꏃꃅꌋꌺꉬ”ꄷꉉꇁꌠꉬ。 11 ꀊꋨꄮꇬꆏ，ꒀꄊꊿꌋꆀꑱꌝꆀꊿꆹꀋꎪꃅꉈꑴꏓꇁꇩꏤꋍꂷꐛꌦꇈ，ꋀꊨꏦꎁꃅꄉꏃꌋꂠꌋꂷꋀꌊꄻꄉ，ꃅꄷꋌꈚꄉꀍꉀꇁ，ꑞꃅꆏ，ꑳꌦꆺꃅꑍꀊꋨꄹꉈꆹꇰꀋꃀꑠꑍꉬ。