2
1 ꀊꋨꄹꉇꆏ，ꆍꊇꆍꃺꑌꈧꌠꏭ‘ꀊꂰ’ꃅꄉꇴa，ꆍꅫꃀꈧꌠꏭ‘ꇐꉳꂸ’ꃅꄉꇴꌠꉬb。ꎲꀋꁨꄏꀋꁨꌠꑱꌝꆀ
2 ꆍꊇꏟꈯꀕꃅꆍꀉꂿꇫꑣꒉ！
ꑞꃅꆏ，ꋌꉠꑮꃀꀋꉬꀐ，
ꉡꑌꋍꌐꃶꀋꉬꀐ。
ꋍꏭꈁꑓꎲꀋꑌꃅꄡꐛꀐ，
ꉈꏠꀋꇮꃅꉦꃀꁉꌊꄡꐺꀐꄷ。
3 ꑠꀋꉬꑲꆏ，ꋍꃢꈜꉢꇔꇫꎭꌐꇈ，
ꋌꁳꒆꎼꇀꄮꇬꌟꃅꇭꀧꅩꀧꍓꎻ，
ꋌꁳꇈꈬꅔꈋꃄꅉꃵꌣꌢꅉꐥꌠꌟꃅꈌꃶꒉꌤꌦꎻꌠꉬ。
4 ꉢꈍꃅꑌꋍꌳꃈꅮꎭꃅꀋꉈ，
ꑞꃅꆏ，ꋀꊇꆹꎲꃷꃆꅿꌳꃈꅮꉬ。
5 ꋀꀉꂿꆹꎲꃷꃆꅿꂷꉬ，
ꋀꋌꒆꎼꇁꂶꌠꆹꌤꊽꉈꏠꌠꃅ；
ꋋꆹ：“ꉡꆹꍯꊿꉢꇫꉂꈧꌠꐊꁧ，
ꉠꎭꃪ、ꀆꐒ、ꑾꎭ、ꃆꁁ、ꒀꒉꌋꆀꎧꏸꐯꇯ
ꋀꄻꉢꁳꌐꌠꉬ”ꄷꉉꋺ。
6 ꑠꅹ，ꇬꉚꄉꅊꇈ！ ꉡꆹꍲꋐꌌꋍꈳꅉꇬꈷ，
ꊖꁋꅥꌊꋍꈝꃀꇬꇊꄉ，
ꋌꁳꈴꁧꅉꀋꊌꎻ；
7 ꋋꆹꍯꊿꋌꇫꉂꈧꌠꊂꈹꁧ，ꄚꇫꊂꂪꀋꄐ，
ꋀꎷꇬ，ꋌꇬꎷꊊꀋꄐ。
ꄚꄉ，ꋌꑠꃅꉉ：“ꉢꀱꉈꑴꁧꀐ，ꀱꉠꌐꃶꂴꇬꂾꂶꌠ
ꄷꁧꂯ，
ꑞꃅꆏ，ꉢꀋꉊꂴꆹꀃꑍꋋꄮꏭꀋꋌꃅꐥꌒ”ꄷ。
8 ꋋꆹꆿꍯ、ꎧꏸ、ꒀꒉꀊꏀꌠꑠꉢꄻꋌꁳꌠꋌꇬꀋꌧ，
ꉈꑴꐎꏂꑠꑌꉢꄻꋌꁳꌠꉬ，
ꄚꋀꊇꆹꋍꑠꋀꌌꀠꆀꌦꌋꆦꑝ。
9 ꑠꅹ，ꋚꒇꒈꋩꄮꐰꆏ，ꉠꆿꍯꉢꎴꌊꉈꑴꇁ，
ꎧꋏꎧꄻꄮꇬꆏ，ꎧꏸꀊꏀꉢꀱꌊꉈꑴꇁ；
ꑾꎭꌋꆀꃆꁁꉢꄻꋀꇭꀧꇬꇢꄉꈧꌠꑌ，
ꉢꇑꌊꉈꑴꇁꌠꉬ。
10 ꀃꑍꋋꄮꆏ，ꉡꆹꊿꋌꍯꇫꐊꁧꈧꌠꂾꄉꇭꀧꅩꀧꍓꄉꎲꄏꑊꏦꎻ；
ꊾꂷꉠꇇꈐꄉꋋꈭꋏꇁꀋꄐꌠꉬ。
11 ꉢꀋꎪꃅꄉꋍꈩꌒꀜꌒꅍ、ꋨꏦꃅꑍ、ꅂꁨꋩꑍ、
ꑬꆏꃅꑍꌋꆀꀉꁁꈮꈜꃅꋩꈽꏦꈿꑠꉢꏢꇋꇫꎭꌠꉬ。
12 ꋍꑌꃀꌧꊈꁦꁧꌋꆀꀋꃨꂶꂷꌦꁧꈧꌠꐯꇯꉢꀜꐆ
ꇫꎭꌐ，
ꌩꁧꋋꈨꃆꂮꆹ， ꋌ：“ꋍꑠꆹꊿꉢꍯꇫꐊꁧꈧꌠꄻꉢꁳꌠ，
ꉠꃄꁌꑽꁌꉬ”ꃅꉉꋺ。
ꉢꀋꎪꃅꌩꋚꇓꂷꏩꀕꁳꇁꌩꏪꇓꃴꐛꄉ，
ꑋꁮꉆꁮꋚꈁꐛꎻꌠꉬ。
13 ꉢꀋꎪꃅꄉꋋꇇꇩꍈ，
ꑞꃅꆏ，ꋋꆹꋨꏦꃅꑍꑞꄮꇬ，ꀠꆀꌦꌋꏭꅿꉗꌒꅍꐔꄀꁧ，
ꅻꊪꅻꃰ、ꅑꃚꅑꅺꑠꅑꄉꊿꋌꇫꉂꈧꌠꊂꈹꁧ，
ꉢꋋꂷꋌꇬꀋꎺꀐ。
ꋍꑠꆹꑳꀊꊆꉉꌠꉬ。
ꏃꃅꌋꋍꉹꁌꉂ
14 ꄚꑠꃅꑴꇬ，ꇬꉚꄉꅊꇈ！ ꉡꆹꋌꉢꅰꉢꑷꌊꉈꑴꇁ，
ꋌꏁꇈꈬꅔꈋꄉꑖꈈꀕꃅꋍꏭꅇꉉꌠꉬ。
15 ꉢꀊꄶꇬꄉꑌꃀꌧꊈꉻꈫꀱꉈꑴꋌꁳ，
ꑸꇰꇁꄿꁳꇁꉘꇉꐨꐥꌠꀃꈈꐬꐛꎻꌠꉬ。
ꋌꈎꄜꀊꏀꄮꇬꉞꏹꄉꅐꇁꌠꌟꃅ，
ꀋꎪꃅꀊꄶꇬꄉꉌꇿꑓꇿꃅꉙꑵꌠꉬ。
18 ꀊꋨꄹꉇꆏ，ꉡꆹꀋꎪꃅꉠꉹꁌꎁꃅꄉ，ꇈꈬꇬꑋꁮꉆꁮ、ꃅꈬꇬꉌꊭꉌꇓ、ꃄꅉꇬꑀꐺꌠꇘꇙꌋꆀꏤꐪꒃ；ꇩꏤꋋꂷꇬꉹꌋꆀꂗꍵꑱꃀꑠꉢꆸꐔꇫꎭꄉ，ꌉꀋꐥꆳꀋꐥꃅꋀꁳꀀꌒꑌꌒꃅꇫꋦꎻꌠꉬ。 19 ꉢꀋꎪꃅꐩꋊꐩꍂꃅꆏꁳꉠꑮꃀꄻꎻ，ꉡꑖꉬ、ꊒꆽꀕꌠ、ꀋꑍꀋꈤꌠꉂꐪꌋꆀꎭꃅꉈꐨꇬꈴꄉꆎꊝꇬꎷ； 20 ꉢꀋꎪꀋꎙꃅꆎꊝꄉ，ꆏꁳꉠꑮꃀꄻꎻ，ꑠꃅꑲꆏ，ꆎꆹꀋꎪꃅꑳꀊꊆꆏꌧꌠꉬ。
21 ꑳꀊꊆꄹꇬ： “ꀊꋨꄹꉇꆏ，ꉢꀋꎪꃅꋀꅇꀱꌠꉬ，
ꉢꂿꃅꏭꉉꄉ，ꂿꃅꁳꉐꐙꃄꅉꇬꊐꇁꎻ，
22 ꃄꅉꁳꀋꎪꃅꆿꍯ、ꎧꏀ、ꒀꒉꀊꏀꑠꅐꇁꎻ；
ꋋꈨꐯꇯꀋꎪꃅꑳꌦꆺꐦꀞꅐꇁꌐꌠꉬ。
23 ꉠꊨꏦꐛꅹꃅꋌꉢꄻꃄꅉꋌꈚꇬꊪꄉ。
ꉢꀋꎪꃅꇊ.ꇐꉳꂸꎭꃅꉈ；
ꉢꇊ.ꀊꂰꏭ：‘ꆎꆹꉠꉹꁌꉬ’ꄷ。
ꋋꑌꀋꎪꃅꉠꏯ：‘ꆏꉠꏃꃅꌋꉬ’ꄷ”ꄷ。