ꆀꀯꏧꆀꌒꀄꂼꂻ
2
1 ꆀꀯꏧꆀꌒꃰꃅꄻꑍꈓꐛꄹꈎꌠ，ꋌꀄꂼꀉꑌꃅꂻꄉꉌꂅꑓꑣꌊꀀꑌꇴꀋꉆ。 2 ꑠꃅꄉ，ꃰꃅꆹꊿꃔꌤꌬꌠ、ꅉꋊꅉꃅꌠ、ꈎꌋꆪꍆꌠꌋꆀꏦꇍꄂꊿꐯꇯꋌꇴꌊꇁꇈ，ꋀꁳꋍꀄꂼꂶꌠꉉꋋꇰꎻ。ꄚꄉ，ꋀꊇꇁꌊꃰꃅꂾꉆꀐ。 3 ꃰꃅꆏꋀꏭ：“ꉢꀄꂼꑠꂷꂻꄉꉌꂅꑓꑣꇧꁠꀐ，ꉢꀄꂼꋋꂷꑞꄜꌠꅉꐚꏾ”ꄷ。4 ꏦꇍꄂꊿꈧꌠꆹꑸꇂꉙꌊꃰꃅꏭ：“ꃰꃅꃪꀕꈎꊌꅊꇈ！ ꆏꈀꎭꀕꃅꅽꀄꂼꂶꌠꀧꅽꁏꐚꇰꑲꆀ，ꑞꄜꌠꉪꇠꆎꇰꂿ”ꄷ。
5 ꃰꃅꆏꏦꇍꄂꊿꈧꌠꏭ：“ꉢꉪꄉꏡꄉꀐ，ꀋꄸꄷꀄꂼꋋꂷꌋꆀꀄꂼꄜꐨꆍꋋꇠꉡꇰꀋꄐꑲꆏ，ꆍꊇꀋꎪꃅꉢꄵꉢꋖꐯꀋꉜ，ꆍꑳꇤꑌꉢꐆꉢꀘꀉꀜꀊꇁꐛꇫꎭꌠꉬ。 6 ꄚꀋꄸꄷꀄꂼꋋꂷꌋꆀꀄꂼꄜꐨꈧꌠꆍꇠꉡꇰꄎꑲꆏ，ꉢꀋꎪꃅꈁꁠꇨꐯꇨꃅꄻꆍꏽꇈ，ꆍꁳꀑꒉꑊꒉꊌꎻꌠꉬ。ꆍꊇꀋꃉꆏꀄꂼꂶꌠꇠꉡꇰꌶ”ꄷ。
7 ꋀꊇꉈꑴꋍꃢꃅꃰꃅꂶꌠꏭ:“ꃰꃅꅽꀄꂼꂶꌠꀧꉪꇰꑲꆏ，ꀄꂼꑞꄜꌠꉪꇠꆎꇰꂿ”ꄷ。
8 ꃰꃅꆏꋀꏭ：“ꆍꊇꉇꉈꃅꄮꈉꄉꈻꇔꈻꐺꌠꇯꍝꃅꉢꌧ，ꑞꃅꆏ，ꌤꋌꐘꈍꃅꀕꌠꉢꉪꏡꄉꀐꌠꆍꅉꐚ。 9 ꀋꄸꄷꀄꂼꋋꂷꆍꋋꇠꉡꇰꀋꄐꇬꆹ，ꆍꏭꄉꌠꏡꁈꆹꋍꏢꀉꄂꐥ。ꆍꊇꐮꇖꐮꄟꌊꅇꂷꃅꈋꄐꑠꌌꉠꏯꉉꄉ，ꃅꀐꃅꑊꐛꐈꌠꇁꉚ。ꆍꊇꀋꃅꀄꂼꂶꌠꄜꐨꉉꉡꇰꑲꆀ，ꉢꁳꆍꊇꇯꍝꃅꀄꂼꇠꉢꇰꄎꌠꅉꐚꎻ”ꄷ。
10 ꏦꇍꄂꊿꈧꌠꃰꃅꏭ：“ꋧꃅꇣꄧꃅꄉꃰꃅꅽꌤꆿꋌꉉꎼꇁꄎꂷꇬꀋꐥ；ꐥꅷꇁꇬꃰꃅ、ꇛꌺ、ꌅꈌꌬꊿꑠꆹꃔꌤꌬꌠ、ꅉꋊꅉꄜꌠꅀꏦꇍꄂꊿꏭꌤꆿꑠꃅꐙꐘꅲꀋꋻ。 11 ꃰꃅꆏꈀꅲꈧꌠꆹꊋꋠꇨ，ꐧꇁꃰꊿꈽꀋꐥꌠꌦꌺꌊꌺꑠꀋꉬꑲꆏ，ꊾꆹꃰꃅꅽꂾꄉꌤꋌꐘꋌꉉꎼꇁꄎꂷꀋꐥ”ꄷ。
12 ꃰꃅꆹꌤꋌꐘꒉꄸꃅꇨꇅꃃꐯꃃꄉ，ꀠꀘꇍꇩꏤꈐꏭꊿꌧꅍꂿꅍꐥꈧꌠꉬꇮꃅꈔꋏꇫꎭꌐꄷꅇꁵ。 13 ꊿꌧꅍꂿꅍꐥꈧꌠꈔꋏꇫꎭꄷꃰꃅꅇꁵꄯꒉꁬꌠꃑꎼꒉꀐ；ꑠꃅꄉ，ꊾꈨꄊꑱꆀꌋꆀꋍꐋꀨꈧꌠꒃꌊꌉꇫꎭꂿꄷ，ꋀꎷꇁꀐ。
ꏃꃅꌋꆹꂁꌤꋌꀖꁉꄊꑱꆀꀨ
14 ꀊꋨꄮꇬ，ꃰꃅꐏꁇꌟꒉꑸꑘꂶꌠꅐꌊꉈꏭꄉꀠꀘꇍꇩꏤꇬꊿꌧꅍꂿꅍꐥꈧꌠꌉꇁꇈ，ꄊꑱꆀꆏꀑꁮꅺꐳꉉꇮꁱꇮꃅꄉꇫꊝ； 15 ꋌꃰꃅꐏꁇꌟꒉꑸꑘꏭ：“ꃰꃅꁵꅇꑞꃅꑠꃅꃛꊸꌠꉬ？”ꄷꅲ。 ꄚꄉꌤꋌꐘꃆꂮꑸꑘꄜꄊꑱꆀꇰ。 16 ꑠꃅꄉ，ꄊꑱꆀꆹꌊꑷꂿꈐꏭꑟꇈ，ꄮꈉꍈꄡꋌꁳꄉꃰꃅꀄꂼꇠꎻꄷꃰꃅꏭꇖꂟ。
17 ꋍꈭꐨꆏ，ꄊꑱꆀꀱꋍꀀꅉꄉ，ꌤꋌꐘꋌꉉꋍꐋꀨꉳꇂꆀꑸ、ꂰꎮꆀꌋꆀꑸꌒꆀꑸꏤꇰꇈ， 18 ꋀꁳꉬꉎꏃꃅꌋꏭꋀꎭꃅꉈꄉ，ꌧꊋꂾꊋꌠꂁꌤꋌꐘꀖꁉꋀꇰꇁꄷꇖꂟꎻ，ꑠꀋꉬꑲꆏ，ꄊꑱꆀꌋꆀꋍꐋꀨꈧꌠꆹꀠꀘꇍꊿꀉꁁꌧꅍꂿꅍꐥꈧꌠꌋꆀꐯꇯꊿꌉꇫꎭꌠꉬ。 19 ꄚꄉ，ꌧꊋꂾꊋꌠꂁꌤꋌꐘꈊꄮꃀꆏꐛꒌꇣꋲꌠꇬꄉꏃꃅꌋꀖꁉꄊꑱꆀꀨꀐ。ꑠꅹ，ꄊꑱꆀꆹꉬꉎꏃꃅꌋꏭꍖꀴ。 20 ꄊꑱꆀꑠꃅꉉ：
“ꏃꃅꌋꂓꆹꌌꀮꄑꄡꑟ，
ꀃꌋꀊꆨꅑꅸꐩꋊꐩꍂꑟ！
ꑞꃅꆏ，ꌧꅍꂿꅍꌋꆀꊋꃤꐯꇯꋍꃤꉬꌐ！
21 ꋋꆹꃅꑍꄮꈉ、ꃅꍵꃅꑌꄺꀱ，
ꋋꆹꃰꃅꋌꆷꇫꎭ，ꃰꃅꋌꄖꇬꑋꄉ；
ꌧꅍꂿꅍꋌꄻꊿꉪꑌꌧꋬꌠꁵ，
ꌧꇐꂿꇐꋌꄻꊿꀑꁮꅺꐳꌠꁵ。
22 ꌧꊋꂾꊋꌠꂁꌤꋌꀖꁉꎼꇁ，
ꆈꋧꋪꅉꈀꐥꌠꃅꋌꅉꐚꈴ，
ꁨꑭꋌꈽꐥ。
23 ꉠꁍꁈꏃꃅꌋꀋ！ ꉢꅽꏭꈀꎭꀕ，ꆎꍖꀴ！
ꑞꃅꆏ，ꆎꆹꌧꅍꂿꅍꌋꆀꊋꃤꆏꄻꉢꁳ；
ꉪꊇꅽꏯꈀꇖꈧꌠꀋꃅꆏꄐꆏꌐꉢꀦ，
ꃰꃅꌤꆿꈧꌠꆏꄻꉪꁳꅉꐚꎻꀐ”ꄷ。
ꄊꑱꆀꀄꂼꇠ
24 ꋍꈭꐨꆏ，ꄊꑱꆀꆏꃰꃅꇱꁆꌌꀠꀘꇍꊿꌧꅍꂿꅍꐥꈧꌠꈔꋏꇁꌠꑸꑘꂿꆹꇈ，ꇬꏭ：“ꀠꀘꇍꊿꌧꅍꂿꅍꐥꈧꌠꈔꋏꇬꄡꎭ；ꆏꈀꎭꀕꃅꉢꏁꃰꃅꂿꆹꑲꆀ，ꉢꀄꂼꄜꐨꇠꃰꃅꇰꂿ”ꄷ。
25 ꑸꑘꆹꋋꇅꃅꄊꑱꆀꋌꏃꃰꃅꂿꆹꇈ，ꃰꃅꏭ：“ꉢꒀꄊꊿꉪꁮꌊꇁꈧꌠꈬꄔꇬꄉꀄꂼꇠꃰꃅꆎꇰꄎꑠꂷꉢꎹꊊꀐ”ꄷ。
26 ꃰꃅꆏꀨꄝꎭꌒꄷꑌꄹꌠꄊꑱꆀꏭ：“ꆏꉠꀄꂼꌋꆀꀄꂼꄜꐨꈧꌠꉉꉡꇰꄎꑴꅀ？”ꄷ。
27 ꄊꑱꆀꆏꃰꃅꏭ：“ꃰꃅꆏꈀꅲꌠꌧꊋꂾꊋꂁꌤꑠꆹꊿꌧꅍꂿꅍꐥꌠ、ꅉꋊꅉꃅꌠ、ꊿꃔꌤꌬꌠꌋꆀꈎꌋꆪꍆꌠꐯꇯꇬꉇꆎꇰꀋꄐꌠꉬ， 28 ꉬꉎꐥꌠꏃꃅꌋꂶꌠꀉꄂꌧꊋꂾꊋꌠꂁꌤꑠꋌꀖꁉꎼꇁꄎ； ꌤꆿꊁꇁꋍꑍꇫꅐꇁꈧꌠꀋꃅꂴꇯꆐꋌꄐꌐꆀꀯꏧꆀꌒꃰꃅꆏꀦꀐ。ꅽꀄꂼꌋꆀꆏꀀꈤꀀꄮꇬꐛꒌꇣꋲꆏꊌꂿꌠꆹꑠꃅꐙ： 29 ꃰꃅꀋ！ ꆏꐚꀀꈤꀀꄉ，ꌤꆿꊁꇁꋍꑍꇫꅐꇁꌠꃆꂮꉪꏡꐹꄮꇬꆏ，ꌧꊋꂾꊋꂁꌤꋌꀖꁉꎼꇁꌠꏃꃅꌋꆹꌤꆿꊁꇁꋍꑍꇫꅐꇁꂯꈧꌠꋌꄐꌐꆏꀦꀐ。 30 ꀋꃅꌧꊋꂾꊋꌠꂁꌤꋋꈨꏃꃅꌋꀖꁉꉢꀦꌠꆹ，ꉢꋋꂷꌞꊿꀉꁁꏭꀋꋌꃅꌧꅍꂿꅍꐥꌠꀋꉬꃅ，ꋋꆹꃰꃅꁳꀄꂼꄜꐨꌋꆀꌤꆿꅽꉌꂵꇫꅉꐚꏾꈧꌠꅉꐚꎻꂿꄷꌠ。
31 ꃰꃅꀋ！ ꆏꇬꉚꑌꃅꄉꄮꇬꆏ，ꀉꁣ！ ꊾꁱꀉꒉꇈꈍꂤꑠꂷꆏꊌꂿ；ꊾꁱꋋꂷꏁꇅꁨꇅꅍꅽꃀꉆꎍ，ꐛꄟꑠꊽꐩꆠꌦꄉꏽ。 32 ꊾꁱꋋꂷꀂꏾꆏꏂꌃꃅꐙ，ꉦꏪꌋꆀꆧꁨꆏꐎꃅꐙ，ꐧꊭꌋꆀꀃꃀꆏꐯꃅꐙ， 33 ꑭꆹꆏꎸꅍꃅꐙ，ꏸꑭꆹꈫꁁꆏꎸꅍ，ꈫꁁꆏꊗꑗꃅꐙꑠꂷꉬ。 34 ꆏꇬꉚꑌꃅꄉꇬꆏ，ꇓꂵꊿꁶꎼꇁꌠꀋꉬꑠꂷꇁꊾꁱꂶꌠꏸꑭꈫꁁꆏꎸꅍ、ꈫꁁꆏꊗꑗꃅꐙꑍꁆꌠꌸꄉ，ꏸꑭꋌꐷꋧꐛꃀꐛꇫꎭ。 35 ꑠꃅꄉ，ꎸꅍ、ꊗꑗ、ꐯ、ꐎ、ꏂꈧꌠꐯꇯꋌꐷꋧꐛꃀꐛꇫꎭꀐ，ꀋꇊꆏꃅꎸꄮꐰꋙꋩꄸꉺꇬꋙꁌꃅꆳꁏꌊꁧꇈꎹꅉꀋꊌꌠꌡ；ꇓꂵꊾꁱꋌꐷꋧꐛꃀꐛꂶꌠꆹꇁꁧꀉꒉꐯꀉꒉꑠꂷꐛꄉꋧꃅꇣꄧꃅꉱꈴꀐ。
36 ꅽꀄꂼꆹꑠꃅꐙꂷꉬ；ꉢꀋꃅꃰꃅꅽꂾꄉꀄꂼꋋꂷꄜꐨꇠꆎꇰꂿ。 37 ꃰꃅꀋ！ ꆎꆹꃰꃅꉎꃰꃅꉬ，ꉬꉎꏃꃅꌋꆹꇩꏤ、ꌅꈌꊋꃤꌋꆀꀑꒉꑊꒉꐯꇯꋌꄻꆎꇖꀐ； 38 ꐧꇁꃰꊿꇿꇬꀀꌠꉬꄿꂿ，ꃄꅉꇬꑋꁮꉆꁮ、ꃅꃴꇬꉌꊭꉌꇓꇿꇬꐥꌠꉬꄿꂿ，ꐯꇯꋌꏮꅽꇇꈐꊐꄉꆏꁳꏲꂠꎽ。ꏂꀂꏾꂶꌠꆹꆏꉬꀐ。
39 ꅽꊂꆏꇩꏤꀉꁁꆏꀋꏢꑠꂷꀋꎪꃅꄓꇁ。ꉈꑴꊁꇩꏤꌕꂷꂶꌠꄓꇁꇈ，ꀋꎪꃅꋧꃅꇣꄧꏲꂠꇁ，ꋋꆹꐯꂶꌠꉬ。 40 ꋍꈭꐨꆏ，ꇩꏤꇖꂷꂶꌠꄓꇁ，ꋋꆹꎸꅍꌟꃅꀉꇨꄉ，ꑞꑌꋌꐷꋧꐛꃀꐛꌐ；ꎸꅍꈍꃅꑞꀕꑌꋌꃴꋌꐷꋧꐛꃀꐛꆏ，ꇩꏤꋋꂷꑌꀉꁁꇩꏤꈧꌠꃅꋌꃴꋌꐷꋧꐛꃀꐛꌠꉬ。 41 ꊾꁱꀊꋨꂷꏸꑭꌋꆀꑬꏸꌺꈧꌠꈫꁁꆏꊗꑗ、ꈫꁁꆏꎸꅍꃅꐙꌠꆏꊌꂿ，ꇩꏤꀊꋨꂷꑌꊁꆏꀋꎪꃅꎏꐡꂱꑱꅉꁧꌠꉬ；ꎸꅍꌋꆀꊗꑗꐮꉔꄉꌠꆏꊌꂿꀐ，ꇩꏤꀊꋨꂷꑌꎸꅍꌟꃅꊋꃤꀉꇨꌠꉬ。 42 ꑬꏸꌺꈧꌠꆹꈫꁁꆏꎸꅍ、ꈫꁁꆏꊗꑗꃅꐮꉔꄉ，ꑠꅹ，ꇩꏤꀊꋨꂷꑌꈫꁁꆏꀉꇨꈫꁁꆏꊋꁧꃅꐙꌠꉬ。 43 ꎸꅍꌋꆀꊗꑗꐮꉔꄉꌠꆏꊌꂿꀐ，ꇩꏤꀊꋨꂷꇬꊾꑌꀉꁁꇩꏤꊾꌋꆀꐮꃝꐯꐉꑴꇬ，ꄚꎸꅍꌋꆀꊗꑗꐯꀋꏚꌠꌟꃅ，ꋀꊇꑌꐯꀋꏚ。
44 ꃰꃅꈧꌠꇬꊎꌅꈌꌬꐹꄮꇬꆏ，ꉬꉎꏃꃅꌋꆹꇩꏤꀉꁁꐩꋊꐩꍂꃅꀜꀋꐡꑠꂷꋌꄖꎼꇁ，ꇩꏤꋋꂷꌅꈌꈍꃅꑌꋌꄝꌞꊿꋅꀋꁵ。ꇩꏤꋋꂷꆹꀋꎪꃅꇩꏤꀉꁁꈧꌠꈀꐥꃅꋌꅥꋌꐷꋧꐛꃀꐛꇫꎭꇈ，ꐩꋊꐩꍂꃅꇫꋦꌠꉬ。 45 ꇓꂵꀉꒉꊿꁶꎼꇁꌠꀋꉬꑠꂷꁦꀑꇬꄉꂃꇁꇈ，ꎸꅍ、ꐯ、ꊗꑗ、ꐎ、ꏂꈧꌠꐯꇯꋌꐷꋧꐛꃀꐛꌐꌠꆏꊌꂿꀐ。ꋍꑠꆹꋍꉎꀋꐥꌠꏃꃅꌋꂶꌠꌤꆿꊁꇁꋍꑍꀋꎪꃅꇫꅐꇁꈧꌠꄐꌐꆏꀦꌠꉬ。ꀄꂼꋋꂷꆹꂻꐚꂷꉬ，ꀄꂼꄜꐨꑌꇯꍝꃅꑠꃅꐙꌠꉬ”ꄷ。
ꃰꃅꈁꁠꄻꄊꑱꆀꏿ