ꆀꀯꏧꆀꌒꏁꁱꄻꄉꉹꁌꁳꇫꀍꃈꄚꎻ
3
1 ꆀꀯꏧꆀꌒꃰꃅꆹꏁꁱꀊꂥꐨꃘꊰꇇꊃꆈꐛ，ꀊꐯꐨꃘꇇꊃꆈꐛꑠꂷꋌꄻꄉꇈ，ꋌꄖꀠꀘꇍꌜꄗꇁꐦꀞꇬꋉꄉꀐ。 2 ꆀꀯꏧꆀꌒꃰꃅꆏꊿꋌꁆꌌꇛꌺꈧꌠ、ꏲꂠꌟꒉꈧꌠ、ꌛꍈꈧꌠ、ꇖꊩꄟꃀꈧꌠ、ꎆꏲꌟꒉꈧꌠ、ꀞꇽꌟꒉꈧꌠ、ꃅꄷꌟꒉꈧꌠꌋꆀꌜꈧꌠꇬꀉꁁꌟꒉꌠꂾꑠꐯꇯꇴꌊꋍꏂꁱꂶꌠꄖꇫꋉꌠꋨꏦꇁꎻ。 3 ꑠꃅꄉ，ꇛꌺꈧꌠ、ꏲꂠꌟꒉꈧꌠ、ꌛꍈꈧꌠ、ꇖꊩꄟꃀꈧꌠ、ꎆꏲꌟꒉꈧꌠ、ꀞꇽꌟꒉꈧꌠ、ꃅꄷꌟꒉꈧꌠꌋꆀꌜꈧꌠꇬꀉꁁꌟꒉꌠꂾꈧꌠꈀꐥꃅꐯꏑꌊꆀꀯꏧꆀꌒꃰꃅꄖꇫꋉꄉꌠꏁꁱꂷꌠꂾꉆꄉ，ꃰꃅꏁꁱꄕꋉꋩꑍꋨꏦꇁꌐ。4 ꀊꋨꄮꇬ，ꃰꃅꁵꅇꄜꊿꂶꌠꆏꑠꃅꄛꇰ：“ꇩꏤꈀꐥꌠ、ꊿꋅꈀꐥꌠ、ꅇꉙꈀꐥꌠꐭꌠꀋ！ ꃰꃅꑠꃅꄉꆍꏭꅇꁵ： 5 ‘ꆍꊇꈀꄸꑌꉶꁱꄎꃚ、ꀱꌺꂢꃚ、ꈷꀻꈶꃚ、ꀌꀠꑺꐂꂢꃚ、ꇬꋒꅥꃚꌋꆀꀉꁁꂢꅍꈷꅍꋍꑞꋍꑵꃚꋒꆍꊌꈨꄷꌦꆏ，ꇇꑭꃃꇵꀕꃅꏁꁱꆀꀯꏧꆀꌒꃰꃅꄖꇫꋉꄉꂶꌠꏭꀍꃈꄚꌐ。 6 ꊿꇇꑭꃃꇴꀕꃅꀍꃈꀋꄚꈧꌠꆏ，ꋋꇅꃅꄉꇵꃆꄔꉙꀕꉘꃅꐞꌠꉄꇓꃙꅉꇬꊐꌠꉬ’ꄷ”ꄷ。
7 ꑠꃅꄉ，ꇩꏤꈀꐥꌠ、ꊿꋅꈀꐥꌠ、ꅇꉙꈀꐥꌠꐭꌠꉹꁌꃅꄉꉶꁱꄎꃚ、ꀱꌺꂢꃚ、ꈷꀻꈶꃚ、ꀌꀠꑺꐂꂢꃚ、ꇬꋒꅥꃚꌋꆀꀉꁁꂢꅍꈷꅍꋍꑞꋍꑵꃚꋒꋀꊌꈨꄷꌦꆏ，ꇇꑭꃃꇵꀕꃅꏁꁱꆀꀯꏧꆀꌒꃰꃅꄖꇫꋉꄉꂶꌠꏭꀍꃈꄚꌐꀐ。
ꏦꇍꄂꊾꈨꄊꑱꆀꐋꀨꌕꑻꌠꊂꅇꎹ
8 ꀊꋨꄮꇬ，ꏦꇍꄂꊿꈍꑋꑹꇁꌊꁨꄉꒀꄊꊿꊂꅇꎹꇁ。 9 ꋀꊇꆀꀯꏧꆀꌒꃰꃅꏭ：“ꃰꃅꃪꀕꈎꊌꅊꇈ！ 10 ꃰꃅꀋ! ꆏꅇꁵꄉ，‘ꈀꄸꑌꉶꁱꄎꃚ、ꀱꌺꂢꃚ、ꈷꀻꈶꃚ、ꀌꀠꑺꐂꂢꃚ、ꇬꋒꅥꃚꌋꆀꀉꁁꂢꅍꈷꅍꋍꑞꋍꑵꃚꋒꊌꈨꄷꌦꆏ，ꇇꑭꃃꇵꀕꃅꏁꁱꂶꌠꏭꀍꃈꄚꌐ。 11 ꊿꇇꑭꃃꇴꀕꃅꀍꃈꀋꄚꈧꌠꆏ，ꋋꇅꃅꄉꇵꃆꄔꉙꀕꉘꃅꐞꌠꉄꇓꃙꅉꇬꊐꌠꉬ’ꄷꉉꋺ。 12 ꄚ，ꃰꃅꀋ！ꒀꄊꊿꆏꇱꁆꌌꀠꀘꇍꌜꇬꌤꑘꏲꂠꎻꌠꎭꄓꇁ、ꂰꎮ、ꑸꀨꆀꇰꏤꆹꅽꁵꅇꋀꇬꀋꅲ，ꅽꌋꈧꌠꎁꃅꌤꃅꀋꅲ，ꏁꁱꆏꄖꇫꋉꄉꂶꌠꏭꑌꀍꃈꄚꀋꅲ”ꄷ。
13 ꄚꄉ，ꆀꀯꏧꆀꌒꇨꇅꃃꐯꃃ，ꋌꅇꁵꄉ，ꎭꄓꇁ、ꂰꎮ、ꑸꀨꆀꇰꏤꈧꌠꏃꇁꄷ。ꑠꃅꄉ，ꋀꊇꊿꇱꏃꃰꃅꂾꑟꇁꀐ。 14 ꆀꀯꏧꆀꌒꆏꋀꏭ：“ꎭꄓꇁ、ꂰꎮ、ꑸꀨꆀꇰꀋ！ꆍꊇꉠꌋꈧꌠꎁꃅꌤꀋꃅ，ꏁꁱꉢꄖꇫꋉꄉꂶꌠꏭꑌꀍꃈꀋꄚꄷꑠꇯꍝꃅꐮꀕ？ 15 ꆍꊇꀋꃅꄐꏤꄉꑲꆀ，ꉶꁱꄎꃚ、ꀱꌺꂢꃚ、ꈷꀻꈶꃚ、ꀌꀠꑺꐂꂢꃚ、ꇬꋒꅥꃚꌋꆀꀉꁁꂢꅍꈷꅍꋍꑞꋍꑵꃚꋒꆍꊌꈨꄷꌦꆏ，ꇇꑭꃃꇵꀕꃅꏁꁱꉢꄻꄉꂶꌠꏭꀍꃈꄚꌐ；ꑠꀋꉬꑲꆏ，ꋋꇅꃅꇵꉄꇓꃙꅉꃆꄔꉙꀕꉘꃅꐝꅉꇬꊐꌠꉬ。ꌋꑡꂷꉠꇇꈐꇬꄉꆍꈭꋏꇁꄎ？”ꄷ。
16 ꎭꄓꇁ、ꂰꎮ、ꑸꀨꆀꇰꏤꆏꃰꃅꏭ：“ꆀꀯꏧꆀꌒꀋ！ ꌤꋌꐘꆹꉪꅽꏯꅇꀱꄻꀋꅐ。 17 ꀋꄸꄷꉪꊇꇯꍝꃅꊿꇱꇵꉄꇓꃙꅉꃆꄔꉙꀕꉘꃅꐝꅉꇬꊐꄷꑲꑌ，ꃰꃅꀋ！ ꉪꇬꏭꇗꅉꃅꌠꏃꃅꌋꆹꀋꎪꃅꀊꄶꇬꄉꉪꋌꈭꋏꎼꇁꄎ，ꋌꀋꎪꃅꉪꋌꈭꋏꌊꅽꇇꈐꐞꇁꌠꉬ。 18 ꑠꀋꉬꄷꑲꑌ，ꃰꃅꀋ！ ꆏꅉꐚꀐ，ꉪꊇꈍꃅꑌꅽꌦꌋꈧꌠꏭꇗꅉꀋꃅ，ꏁꁱꆏꄖꇫꋉꄉꂶꌠꏭꑌꀍꃈꀋꄚꌠꉬ”ꄷ。
ꄊꑱꆀꐋꀨꌕꑻꌠꊿꇵꃆꄔꊐ
19 ꋋꇅꇬꆏ，ꆀꀯꏧꆀꌒꇨꇅꃃꌌꋰꀋꄐꃅ，ꎭꄓꇁ 、ꂰꎮꌋꆀꑸꀨꆀꇰꂾꄉꀑꑊꁏꇈ，ꅇꁵꄉꊿꁳꉄꇓꃙꅉꂶꌠꃚꌊꑍꃀꑍꊂꏭꀋꋌꃅꏃꁧꁦꎆꃅꊿꃪꃅꄉꎻ。 20 ꉈꑴꅇꁵꄉꂽꑼꈬꄔꇬꇷꄙꊋꒉꑠꈍꑋꑹꁳꎭꄓꇁ、ꂰꎮ、ꑸꀨꆀꇰꌕꑻꌠꐒꈄꄉꇵꃆꄔꉙꀕꉘꃅꐞꌠꉄꇓꃙꅉꇬꊐꎻ。 21 ꊿꋋꌕꑻꃢꈜꈐꏭꆏꌠ、ꉈꏭꄅꈚꌠ、ꀍꄟꌋꆀꀉꁁꑠꈚꄉ，ꊿꇱꐒꄉꇵꉄꇓꃙꅉꃆꄔꉙꀕꉘꃅꐝꅉꇬꊐꀐ。 22 ꃰꃅꁵꅇꃛꊸꐯꃛꊸ，ꉄꇓꃙꅉꑌꊿꃪꇨꐛꅹ，ꂽꑼꎭꄓꇁ、ꂰꎮ、ꑸꀨꆀꇰꏤꐔꇁꈧꌠꃆꄔꇱꐗꌦꇫꎭꀐ。 23 ꄚꎭꄓꇁ、ꂰꎮ、ꑸꀨꆀꇰꌕꑻꌠꆏꊿꇱꐒꄉꐛꅹ，ꊰꇁꃆꄔꉙꀕꉘꃅꐞꌠꉄꇓꃙꅉꇬꊐꀐ。
24 ꀊꋨꇅꇬꆏ，ꆀꀯꏧꆀꌒꃰꃅꆹꋌꇷꈌꉛꀕꌊꋋꇅꃅꋌꄓꇬꉆꄉ，ꇖꊩꄟꃀꈧꌠꏭ：“ꊿꉪꐒꄉꇵꃆꄔꇬꊐꌠꌕꑻꀋꉬꅀ？”ꄷ。
ꋀꊇꆏꃰꃅꏭ：“ꃰꃅꀋ！ ꉬꑴꇆ”ꄷꅇꀱ。
25 ꃰꃅꆏꋀꏭ：“ꇬꉚ！ ꊿꇖꑻꉢꊌꂿ，ꋀꊇꐒꈄꀋꄉ，ꃆꄔꇬꈴꐺꇬꑌꂷꊂꍈꀋꌸ；ꊿꇖꑻꂶꌠꐛꐪꆹꌦꌺꌊꌺꂷꌡ”ꄷ。
26 ꄚꄉ，ꆀꀯꏧꆀꌒꇁꌊꉄꇓꃙꅉꀃꈈꏢꁮꄉ：“ꋍꉎꀋꐥꌠꏃꃅꌋꁏꐚꎭꄓꇁ、ꂰꎮ、ꑸꀨꆀꇰꌕꑻꌠꀋ！ ꁖꉈꏭꇁ！”ꄷ。 27 ꇛꌺꈧꌠ、ꏲꂠꌟꒉꈧꌠ、ꌛꍈꈧꌠ、ꇖꊩꄟꃀꈧꌠꏓꋍꈜꄉꊿꋋꌕꑻꉜꇁꇬꆏ，ꃆꄔꋀꇭꀧꇬꀋꐗ，ꋀꀍꑐꑌꋌꐗꇬꀋꎭ，ꀂꄁꑌꐔꀋꄀ，ꇭꀧꃆꄔꐗꌠꌤꍈꑌꀋꅿꌠꋀꊌꂿꀐ。
28 ꄚꄉ，ꆀꀯꏧꆀꌒꑠꃅꉉ：“ꎭꄓꇁ、ꂰꎮ、ꑸꀨꆀꇰꏤꏃꃅꌋꂶꌠꆹꌌꀮꄑꄡꑟꌠꉬ！ ꋌꊩꌺꋌꁆꌌꋍꁏꐚꋋꉘꇉꌠꈭꋏꇁ；ꋀꊇꆹꃰꃅꁵꅇꀋꍬ，ꀑꇬꁭꑌꀋꑴ；ꋀꊇꀉꁁꌦꌋꑠꏭꇗꅉꃅꀋꅲ，ꋀꏃꃅꌋꏭꀉꄂꇗꅉꃅ。 29 ꉢꀋꃅꑠꃅꄉꅇꁵ： ꈍꏯꀀꌠꉬꄿꂿ、ꇩꏤꑞꂷꇬꀀꌠꉬꄿꂿ、ꊿꋅꑞꁯꉬꄿꂿ，ꊿꎭꄓꇁ、ꂰꎮ、ꑸꀨꆀꇰꏤꏃꃅꌋꂶꌠꏭꍍꋉꄸꄀꌠꆏ，ꀋꎪꃅꌌꄴꋖꐯꀋꉜꇫꎭ，ꋍꑳꇤꈧꌠꑌꐅꀘꀉꀜꀊꇁꐛꇫꎭꌐ。ꑞꃅꆏ，ꀉꁁꌦꌋꆹꑠꃅꄉꊾꈭꋏꄎꂷꀋꐥ”ꄷ。
30 ꋍꈭꐨꆏ，ꎭꄓꇁ、ꂰꎮꌋꆀꑸꀨꆀꇰꏤꆹꀠꀘꇍꌜꇬꄉꃰꃅꇱꐕꀊꂥꃅꄉꀐ。