ꆀꀯꏧꆀꌒꃰꃅꀄꂼꀉꁁꂷꂻ
3 ꋍꃅꐪꑽꑌꈍꃅꇰꀋꃀꉏ！
ꋍꂵꇖꀕꌠꌤꈍꃅꊽꃪꉬꉏ！
ꋍꇩꏤꆹꐩꋊꐩꍂꃅꇫꋦ；
ꋍꌅꈌꑌꄙꇁꃪꋊꃅꄉꌬ！
4 ꉢ-ꆀꀯꏧꆀꌒꀀꌒꑌꌒꃅꀁꇬꀀ，ꋠꌐꈚꌐꀋꉆꃅꃰꃅꑷꂿꇬꐥ。 5 ꄚ，ꉢꀄꂼꂷꂻꇈ，ꐬꆠꑓꆠꇧꁠ；ꉢꀀꈤꀀꄮꇬ，ꀄꂼꂻꐛꇁꈧꌠꌋꆀꒌꉪꑓꐛꇁꈧꌠ，ꉢꋋꇷꃨꆰꏸꈧꏽ。 6 ꑠꅹ，ꉡꆹꅇꁵꄉꀠꀙꇍꊿꌧꅍꂿꅍꈀꐥꌠꃅꉢꇴꌊꉠꂾꄉ，ꋀꁳꀄꂼꋋꈨꄜꐨꉉꉢꈨꇁꎻ， 7 ꑠꃅꄉ，ꃔꌤꌬꊿ、ꅉꋊꅉꃅꊿ、ꏦꇍꄂꊿ、ꈎꌋꆪꍆꊿꈧꌠꐯꇯꇁꌐꇈ，ꉠꀄꂼꂶꌠꉢꀧꋀꇰ，ꄚꋀꊇꆹꀄꂼꋋꂷꑞꄜꌠꋀꋌꉇꉡꇰꀋꄐ。 8 ꊁꄽꂫꆏ，ꉠꌋꂓꂶꌠꇬꈴꄉꉢꄻꀨꄝꎭꌒꂓꄉꌠꄊꑱꆀꂶꌠꇁꌊꉠꂾꑟ；ꋍꈐꏭꌃꎔꌠꌊꒌꑠꀀꄉ，ꉠꀄꂼꂶꌠꑠꃅꉢꉉꋋꇰ： 9 ‘ꃔꌤꌬꊿꌟꒉꀨꄝꎭꌒꀋ！ ꅽꈐꏭꌃꎔꌠꌋꒌꇬꀀꌠꉢꅉꐚ，ꌧꊋꂾꊋꌠꂁꌤꊋꋠꇨꄉꆏꇬꀋꌧꑠꑵꀋꐥ。ꆏꀋꃅꉠꀄꂼꂻꐛꇁꈧꌠꑞꄜꌠꉉꉡꇰ’ꄷ。
10 ꉢꀀꈤꀀꄮꇬ，ꉠꀄꂼꂻꐛꇁꌠꆹꑠꃅꐙ： ꀊꁣ！ꃄꅉꈬꄔꇬꌩꁧꀉꒉꐯꀉꒉꑠꁧꇫꋦꌠꉢꊌꂿ。 11 ꌩꁧꀊꋨꁧꐤꅉꐤꅉꀍꉀꒆꆹ，ꄷꀋꁧꀱꅑꁦꒆꂿꃅꇬꑟꄉ，ꃄꇖꄹꊂꇿꇬꄉꑌꊌꂿꉆ。 12 ꌩꏾꃴꇉꀕ，ꂷꅑꀮꇗꀕꄉ，ꇁꌦꑌꇙꀕꋠꅍꐛ；ꇈꈬꇬꑋꁮꉆꁮꋍꇂꃴꄉꌐꒉꏿꇁ，ꃅꃴꇬꉌꊭꉌꇓꑌꌩꇇꇬꄉꑬꆏꇁ，ꌦꑌꇙꀕꈀꐥꌠꃅꌩꁧꋋꁧꇬꄉꋠꅍꊌ。
13 ꉢꀀꈤꇬꀀꄮꇬꆏ，ꐛꒌꇣꋲꑠꂷꉠꑓꐛꇁ，ꀊꁣ！ꐏꁇꊿꌃꎔꑠꂷꂿꃅꇬꄉꀁꋌꇁꇈ， 14 ꃚꐕꉐꐓꄉ：‘ꌩꁧꋋꁧꇽꇫꎭ！ ꌩꇇꈧꌠꋐꇫꎭ！ ꌩꏾꈧꌠꑌꇖꇫꎭ！ ꂶꂷꈧꌠꑌꑣꇫꎭ！ ꌩꁧꇂꃴꑋꁮꉆꁮꈧꌠꁳꆶꁧꎻ，ꌩꇇꀂꏽꉌꊭꉌꇓꈧꌠꁳꈯꁧꎻ。 15 ꐴꉒꏡꌠꀉꄂꐯꈄꎷꈄꌊꃮꄉꇈ，ꇤꅔꈋꁬꏪꆰꏪꇬꋉꄉ，ꃅꃴꍑꐛꋌꌶꎽ；ꋌꁳꃄꅉꇬꑋꁮꉆꁮꈽꄉꏜꋠꎻ； 16 ꋍꉌꂵꁳꄺꀱꄉꃰꊿꉌꂵꀋꑌꃅ，ꎇꃀꉌꂵꑌꎻ，ꅑꅸꃅꈎꏃꈓꐛꄮꇬꑟ。 17 ꋍꑠꆹꐏꁇꊿꈧꌠꈁꉉꌠꁵꅇꉬ，ꌃꎔꈧꌠꉪꄉꏤꄉꃅꂿꄷꌠꉬ；ꑠꃅꄉ，ꐧꇁꃰꊿꁳꋍꉎꀋꐥꂶꌠꆹꋧꃅꇩꏤꋌꌅꋌꇤꌐ，ꇩꏤꌅꈌꋌꄻꈀꄸꁵꏾꈀꄸꁵ，ꄷꀋꁧꊿꐭꋍꐮꀋꐥꌠꁳꇩꏤꌅꈌꌬꎻꑠꅉꐚꎻ’ꄷ。
18 ꋍꑠꆹꉢ-ꆀꀯꏧꆀꌒꃰꃅꀄꂼꌠꉬ。 ꀨꄝꎭꌒꀋ！ ꆏꀄꂼꋋꂷꄜꐨꉉꉡꇁ；ꉠꇩꏤꈐꏭꊿꌧꅍꂿꅍꐥꈧꌠꃅꀄꂼꄜꐨꋀꋌꉇꉡꇰꀋꄐ，ꆏꀉꄂꉉꄎ，ꑞꃅꆏ，ꅽꈐꏭꆹꌃꎔꌠꌋꒌꇬꀀ”ꄷ。
ꄊꑱꆀꀄꂼꇠ
19 ꄚꄉ，ꀨꄝꎭꌒꄷꑌꄹꌠꄊꑱꆀꋌꇷꈌꉛꀕ、ꃨꆰꏸꈧꏽ。ꃰꃅꆏꇬꏭ：“ꀨꄝꎭꌒꀋ！ ꆏꀄꂼꌋꆀꀄꂼꄜꐨꈧꌠꐛꅹꃨꆰꌋꀋꌸ”ꄷ。
ꀨꄝꎭꌒꆏ：“ꉠꌌꁈꀋ！ ꀄꂼꋋꂷꇔꌊꊿꆏꇫꌂꈧꌠꎑꁧꅊꇈ，ꀄꂼꄜꐨꈧꌠꇁꅽꁮꐚꌸꁧꅊꇈ。 20 ꆏꈀꂿꌠꌩꁧꁦꌠꐤꅉꐤꅉꀍꉀꒆꆹ，ꄷꀋꁧꀱꅑꁦꒆꂿꃅꇬꑟꄉ，ꃄꇖꄹꊂꇿꇬꄉꑌꊌꂿꉆ。 21 ꌩꏾꃴꇉꀕ，ꂷꅑꀮꇗꀕꄉ，ꇁꌦꑌꇙꀕꋠꅍꐛ；ꇈꈬꇬꑋꁮꉆꁮꋍꇂꃴꄉꌐꒉꏿꇁ，ꃅꃴꇬꉌꊭꉌꇓꑌꌩꇇꇬꄉꑬꆏꇁ。
22 ꃰꃅꀋ！ ꌩꁧꀉꒉꇈꀱꅑꁦꒆꋋꁧꆹꆏꉬꀐ。 ꅽꊋꒉꌗꒉꂿꃅꊪ，ꅽꏲꄷꃯꉻꃅꋮꆸꈈꑟ。 23 ꃰꃅꆎꆹꌃꎔꌠꐏꁇꊾꂷꂿꃅꇬꄉꀁꋌꇁꌠꆏꊌꂿ，ꋌꑠꃅꉉ：‘ꌩꁧꋋꁧꇽꇫꎭ，ꐴꉒꏡꌠꀉꄂꐯꈄꎷꈄꃮꄉꇈ，ꇤꅔꈋꁬꏪꆰꏪꇬꋉꄉ，ꃅꃴꍑꐛꋌꌶꎽ；ꋌꁳꃄꅉꇬꑋꁮꉆꁮꈽꄉꏜꋠꎻ，ꅑꅸꃅꈎꏃꈓꐛꄮꇬꑟ’ꄷ。
24 ꃰꃅꀋ！ ꅽꀄꂼꆹꋍꑠꄜ： ꌤꆿꉠꌌꁈꃰꃅꅽꄹꑟꇁꌠꆹꋍꉎꀋꐥꂶꌠꁵꅇꉬ。 25 ꆏꀋꎪꃅꐧꇁꃰꊿꈬꄔꄉꊿꇱꈹꇫꎭꇈ，ꉈꏭꇈꈬꇬꑋꁮꉆꁮꌋꆀꐯꈽꐥ，ꇂꁮꌟꃅꏜꋠ，ꃅꃴꍑꐛꅽꄩꊭ，ꃅꈎꏃꈓꂷꑠꃅꐙ，ꅑꅸꋍꉎꀋꐥꂶꌠꋧꃅꇩꏤꋌꌅꋌꇤꌐ、ꇩꏤꌅꈌꋌꄻꈀꄸꁵꏾꆏꈀꄸꁵꌠꆏꅉꐚꄮꇬꑟ。 26 ꐴꉒꏡꌠꊏꇫꋉꄉꇈꄷꅇꁵꌠꆹ，ꌅꈌꂿꃅꄉꇁꌠꑠꆏꌧꄮꇬꑲꆀ，ꅽꇩꏤꀋꎪꃅꀱꅽꊨꏦꁵꄷꌠꄜ。
27 ꃰꃅꀋ！ ꆏꈀꎭꀕꃅꉠꅇꂷꋋꈨꊪ，ꌤꆿꑖꉬꌠꃅꄉꑽꃤꇔꇫꎭ，ꌢꎭꌟꁧꌠꎭꃅꉈꄉꑽꃤꌩꎳꇫꎭ，ꑠꃅꑲꆏ，ꆎꆹꀊꉗꏢꃅꋬꂻꇬꌬꀋꄿ”ꄷ。
ꆀꀯꏧꆀꌒꀄꂼꅇꅐꀐ
28 ꌤꋋꈨꇯꍝꃅꆀꀯꏧꆀꌒꃰꃅꇭꀧꇬꄉꇫꅐꇁꀐ。 29 ꊰꑋꁮꆪꐛꈭꐨꆏ，ꋍꑍꆀꀯꏧꆀꌒꈛꎼꀠꀙꇍꋍꃰꃅꑷꂿꑲꏾꏮꐺꇬꆏ。 30 ꋌꑠꃅꉉ：“ꀠꀙꇍꇓꈓꋋꂷꉠꊋꃤꈀꇨꀕꌠꌊꉢꋉꃰꃅꇓꈓꃅꄉ，ꉢꁳꀑꒉꑊꒉꋍꉎꀋꐥꌠꊌꎻꂿꄷꌠꀋꉬꅀ？”ꄷ。
31 ꅇꂷꋋꇬꉉꑌꃅꄉꇬꆏ，ꃚꋒꑵꂿꃅꇬꄉꑠꃅꇫꈌꐚꇁ：“ꆀꀯꏧꆀꌒꃰꃅꀋ！ ꅇꂷꋋꈨꆹꌌꅽꏯꉉꌠꉬ： ꅽꇩꏤꃰꃅꌅꈌꅽꇇꈐꀋꀀꀐ。 32 ꆏꀋꎪꃅꐧꇁꃰꊿꈬꄔꄉꊿꇱꈹꇫꎭꇈ，ꉈꏭꇈꈬꇬꑋꁮꉆꁮꌋꆀꐯꈽꐥ，ꇂꁮꌟꃅꏜꋠ，ꃅꈎꏃꈓꂷꑠꃅꐙ，ꅑꅸꋍꉎꀋꐥꂶꌠꋧꃅꇩꏤꋌꌅꋌꇤꌐ、ꇩꏤꌅꈌꋌꄻꈀꄸꁵꏾꆏꈀꄸꁵꌠꆏꅉꐚꄮꇬꑟ。”ꄷ。
33 ꀊꋨꄮꇬꆏ，ꅇꂷꋋꇬꆀꀯꏧꆀꌒꇭꀧꇬꄉꅇꅐꀐ，ꋌꐧꇁꃰꊿꈬꄔꄉꊿꈹꇫꎭꇈ，ꇂꁮꌟꃅꏜꋠ，ꃅꃴꍑꐛꋍꇭꀧꇬꊭ，ꋍꀍꑐꆹꏨꆉꑏꑐꎵ，ꇇꌋꆹꉌꊭꑬꌋꎵ。
ꆀꀯꏧꆀꌒꃰꃅꇁꏃꃅꌋꏭꍖꀴ
34 ꃅꈎꏃꈓꐛꈭꐨꆏ，ꉢ-ꆀꀯꏧꆀꌒꀑꐕꃅꃴꉜ，ꀱꉪꐚꏡꐚꇁꄉ，ꋍꉎꀋꐥꂶꌠꏭꀮꄑ，ꐩꋊꐩꍂꇫꐥꌠꏃꃅꌋꏭꍖꀴ、ꀑꒉꑊꒉꄀ。
ꋍꌅꈌꆹꄙꇁꃪꋊꃅꄉꌬ！
ꋍꇩꏤꑌꐩꋊꐩꍂꃅꇫꋦ；
35 ꃄꅉꇬꃰꊿꑠꆹꌗꅍꍈꀋꐥ；
ꋋꆹꉬꉎꂽꄙꂽꃪꌋꆀꃄꅉꇬꃰꊿꈬꄔꄉ，
ꋍꊨꏦꉪꐨꈴꄉꌤꃅꇬꎷ。
ꊾꂷꇬꋋꇬꇈꄎꌠꀋꐥ，
ꅀꇬꏭ‘ꆏꑞꃅꐺꌠꉬ？’ꃅꅱꂷꑌꀋꐥ。