ꀨꎭꌒꃰꃅꎧꀞꎸꀞꋍꏲꌋꂠꌋꈧꌠꍈ
5
1 ꀨꎭꌒꃰꃅꆹꎧꀞꎸꀞꋍꏲꌋꂠꌋꋍꄙꑹꍈꇈ，ꋀꈽꄉꎧꅝ。 2 ꀨꎭꌒꉌꇿꑓꇿꃅꎧꅝꐹꄮꇬꆏ，ꊿꋌꁆꌌꐎꏂꊐꅍꊐꀏꑳꇊꌒꇌꌃꎔꑷꂿꇬꄉꋍꀉꄉꆀꀯꏧꆀꌒꇑꌊꇁꈧꌠꒃꌊꄉ，ꃰꃅꌋꆀꋍꏲꌋꂠꌋꈧꌠ、ꃰꃅꑮꃀꃆꏀꃆꆹꈧꌠꁳꎧꈈꅝꇁꎻ。 3 ꄚꄉ，ꐎꏂꊐꅍꊐꀏꑳꇊꌒꇌꏃꃅꌋꌃꎔꑷꂿꇬꄉꇑꌊꇁꈧꌠꊿꒃꌊꇁꇈ，ꄻꃰꃅꌋꆀꋍꏲꌋꂠꌋꈧꌠ、ꃰꃅꑮꃀꃆꏀꃆꆹꈧꌠꁳꎧꈈꅝꎻ。 4 ꋀꊇꎧꏸꅝ，ꐎ、ꏂ、ꐯ、ꎸꅍ、ꌩꌋꆀꇓꂵꌌꄻꄉꌠꌦꁱꌊꁱꑠꏭꍖꀴꐺ。5 ꀊꋨꇅꇬꆏ，ꋋꇅꃅꊿꇇꏸꑠꈨꇫꅐꇁꇈ，ꂷꇭꄈꅉꅶꁉꃰꃅꑷꂿꊖꁋꉑꊖꌎꄉꏭꌠꇬꁱꂷꁱꐺ。ꃰꃅꂶꌠꆹꇇꏸꁱꂷꁱꐺꌠꋌꊌꂿꇬꆏ， 6 ꀑꑊꁏꇈ，ꋌꇷꄉꃨꆰꏸꈧꌊꑭꆹꊋꀋꑌ，ꁡꊭꑍꂷꌠꇁꐯꄚꇫꎍ。 7 ꃰꃅꃚꐓꄉꏅ，ꊿꁳꃔꌤꌬꊿ、ꏦꇍꄂꊿꌋꆀꈎꌋꆪꍆꊿꈧꌠꇴꌊꈐꏭꇁꎻ；ꃰꃅꆏꀠꀘꇍꊿꌧꅍꂿꅍꐥꈧꌠꏭ：“ ꈀꄸꂷꁱꂷꋋꈨꋌꀘꎼꇁꇈ，ꑞꄜꌠꋌꉉꉡꇰꄎꆏ，ꀋꎪꃅꏦꍠꃢꈜꊪꅪꌠꄻꋌꇢ，ꏁꃬꈯꄻꋌꄀ，ꋌꁳꉪꇩꏤꇬꌅꈌꀉꇨꃅꐥꌠꌕꑹꀕꌠꐛꎻꌠꉬ” ꄷ。
8 ꄚꄉ，ꃰꃅꇂꃴꊿꌧꅍꂿꅍꐥꈧꌠꃅꈐꏭꃹꇁꌐ，ꄚꋀꊇꈀꄸꑌꁱꂷꋋꈨꋀꇫꀘꀋꇮ，ꑞꄜꌠꑌꋀꋌꉇꃰꃅꇰꀋꄐ。 9 ꑠꅹ，ꀨꎭꌒꃰꃅꆹꀊꅰꀊꅰꃅꃨꆰꏸꈧꌊꀑꑊꁏꇧꁠ，ꋍꏲꌋꂠꌋꈧꌠꑌꈍꃅꇮꀋꐚꋀꇬꀋꌧꀐ。
10 ꃰꃅꀉꂿꂶꌠꆏꃰꃅꌋꆀꋍꏲꌋꂠꌋꈧꌠꈀꉉꌠꅇꂷꋌꈨꄉ，ꇁꌊꎧꅝꎸꋠꅉꈚꌠꇬꄉ：“ꃰꃅꃪꀕꈎꊌꅊꇈ！ ꆏꃨꆰꏸꈧꌋꀋꌸ，ꀑꑊꑌꄡꁏ。 11 ꅽꇩꏤꇬꊿꑠꂷꐥ，ꊿꋋꂷꈐꏭꆹꌃꎔꌠꌊꒌꇬꀀ，ꅽꀉꄉꆀꀯꏧꆀꌒꃰꃅꄻꇫꐥꄮꇬ，ꊿꉪꑌꌧꋬ、ꀑꁮꅺꐳ、ꌧꅍꂿꅍꐤꋋꂷꋌꎹꊊꄉ，ꊿꋋꂷꁳꃔꌤꌬꊿ、ꅉꋊꅉꄜꊿ、ꏦꇍꄂꊿꌋꆀꈎꌋꆪꍆꊿꄩꏲꂠꎽ。 12 ꊿꋋꂷꆹꉪꇐꏡꇐꀉꁁꏭꀋꋌꃅꄞꅐa，ꀑꁮꅺꐳ，ꌧꇐꂿꇐꐥ，ꉈꑴꀄꂼꇠꇮ，ꂵꌦꂵꌋꑠꇠꑲꌧ，ꌤꆿꌧꊋꂾꊋꌠꋌꉉꀽꎼꇁꄎ。ꊿꋋꂷꆹꄊꑱꆀꂓ，ꆀꀯꏧꆀꌒꃰꃅꆏꋍꏭꀨꄝꎭꌒꄷ，ꆏꀋꃅꊿꋋꂷꇴꌊꇁꑲꆏ，ꋌꀋꎪꃅꁱꂷꋋꈨꑞꄜꌠꋌꉉꆎꇰꌠꉬ ”ꄷ。
ꄊꑱꆀꁱꂷꄜꐨꋌꉉꃰꃅꇰ
13 ꄚꄉ ，ꄊꑱꆀꊿꏃꃰꃅꂾꑟꇈ，ꃰꃅꆏꄊꑱꆀꏭ：“ꆏꉠꀉꄉꃰꃅꄺꄮꇬꒀꄊꃄꄸꄉꋌꁮꌊꇁꌠꒀꄊꊿꄊꑱꆀꉫꀕ？ 14 ꉢꈨꇁꇬ，ꅽꈐꏭꌃꎔꌠꌋꒌꇬꀀ，ꆏꉪꑌꌧꋬ、ꀑꁮꅺꐳ、ꌧꅍꂿꅍꈀꇨꀕꃅꐥꄷ。 15 ꀋꃅꌧꅍꂿꅍꐥꈧꌠꌋꆀꅉꋊꅉꄜꈧꌠꐯꇯꊿꏃꉠꂾꄉꁱꂷꋋꈨꀘꉡꇰꇁ、ꁱꂷꋋꈨꑞꄜꌠꉉꉡꇰꇁꎻ，ꄚꋀꋌꉇꉡꇰꀋꄐ。 16 ꉢꈨꇁꇬ，ꆏꀄꂼꇠꇮ，ꌤꆿꌧꊋꂾꊋꑠꆏꉉꀽꎼꇁꄎꄷ；ꀋꃅꀋꄸꄷꁱꂷꋋꈨꆏꀘꎼꇁꄎ、ꑞꄜꌠꆏꉉꉡꇰꄎꑲꆏ，ꀋꎪꃅꏦꍠꃢꈜꊪꅪꌠꄻꆏꇢ，ꏁꃬꈯꄻꆏꄀ，ꆏꁳꉠꇩꏤꇬꌅꈌꀉꇨꃅꐥꌠꌕꑹꀕꌠꐛꎻꌠꉬ”ꄷ。
17 ꄊꑱꆀꆏꃰꃅꏭ：“ꅽꈁꁠꅽꊨꏦꊏꄉ，ꁵꑲꑌꄻꌞꊿꀉꁁꁵ，ꉢꅽꈁꁠꀋꈁ，ꄚꁱꂷꋋꈨꆹꉢꀘꃰꃅꆎꇰꂿ，ꄜꐨꑌꉢꉉꆎꇰꂿ。 18 ꃰꃅꀋ！ ꋍꉎꀋꐥꌠꏃꃅꌋꆹꇩꏤ、ꌅꈌ、ꀑꒉꑊꒉ、ꐤꒉꌠꑠꋌꄻꅽꀉꄉꆀꀯꏧꆀꌒꇖꋺ； 19 ꏃꃅꌋꌅꈌꀉꒉꃅꄻꋌꁳꐛꅹ，ꇩꏤꈀꐥꌠ、ꊿꋅꈀꐥꌠ、ꅇꉙꈀꐥꌠꐭꌠꊿꃅꋍꂾꄉꑑꃹꏾꌌꀕꌐ；ꋌꈀꄸꂷꌉꏾꆏꈀꄸꂷꌉ；ꈀꄸꂷꁳꇫꐥꎻꏾꆏ，ꈀꄸꂷꇫꐥꄎ；ꈀꄸꂷꁳꐕꀍꉀꆹꎻꏾꆏ，ꈀꄸꂷꋌꐕꀍꉀꄉ；ꈀꄸꂷꁳꀁꋌꊰꎻꏾꆏ，ꈀꄸꂷꋌꄻꀁꋌꊰꎻ。 20 ꄚꋌꆺꒉꄇꒉꌊꀀꁁꊿꀋꐥꃅꐹꄮꇬꆏ，ꋌꋍꃰꃅꑋꅉꇬꄉꊿꈹꇫꎭꇈ，ꀑꒉꑊꒉꑌꊿꇑꌊꁧ。 21 ꋌꃰꊿꈬꄔꄉꊿꈹꇫꎭꈭꐨꆏ，ꃰꊿꉌꂵꀋꑌꃅꎇꃀꉌꂵꂷꑌ，ꇈꈬꇬꑾꃅꏷꏸꈽꐥ，ꇂꁮꌟꃅꏜꋠ，ꃅꃴꍑꐛꋍꇭꀧꊭ，ꑠꃅꐙꅷꋍꉎꀋꐥꌠꏃꃅꌋꂶꌠꋧꃅꇩꏤꋌꌅꋌꇤꌐ，ꈀꄸꋍꄻꈴꆏ，ꇩꏤꌅꈌꋌꄻꈀꄸꁵꌠꑠꋌꌧꄮꇬꑟ。
22 ꀨꎭꌒꀋ！ ꆎꆹꋍꌺꉬ，ꋍꑠꈀꐥꃅꆏꅉꐚꌐꑴꇬ，ꄚꆎꆹꅽꈯꆏꉜꀋꐭꃅ， 23 ꀱꌊꆺꒉꄇꒉꃅꉬꉎꏃꃅꌋꊝ，ꊿꆏꁆꌌꑷꂿꇬꎍꌠꊐꅍꊐꀏꈧꌠꒃꌊꅽꂾꇁꇈ，ꆎꌋꆀꅽꏲꌋꂠꌋꈧꌠ、ꅽꑮꃀꃆꏀꃆꆹꈧꌠꁳꌌꎧꈈꅝꎻ。ꆏꉈꑴꂾꑌꂿꀋꉆ、ꈧꑌꈨꀋꉆ、ꑞꑌꋀꋌꀋꌧꌠꌦꁱꌊꁱꐎ、ꏂ、ꐯ、ꎸꅍ、ꌩꌋꆀꇓꂵꌊꄻꄉꌠꑠꏭꍖꀴ；ꆏꀑꒉꑊꒉꄻꅽꀑꇬꋍꇇꈐꀀꇈ，ꅽꃅꐨꑽꑌꋌꌅꌐꌠꏃꃅꌋꂶꌠꆏꀋꄀ。 24 ꑠꅹ，ꏃꃅꌋꄷꄉꇇꏸꁱꂷꁱꌠꑠꇫꅐꇁꌠꉬ。
25 ꁱꂷꈧꌠꆹ：‘ꂱꆺ，ꂱꆺ，ꄝꈍꇍ，ꃶꃔꇓꑟ’ꃅꀘꌠ。 26 ꄜꐨꆹꋍꑠ： ‘ꂱꆺ’ꆏ，ꏃꃅꌋꅽꇩꏤꃅꈎꃅꆪꋌꌗꏢꅷꄚꇬꀉꄂꑟꀐꄷꌠꄜ。 27 ‘ꄝꈍꇍ’ꆏ，ꆏꋌꄻꋂꏣꊐꄉꏣꇬ，ꑾꌙꇨꄉꋂꏣꄀꀋꇎꄷꌠꄜ。 28 ‘ꃶꃔꇓꑟ’ꆏ，ꅽꇩꏤꂶꌠꀜꐡꂱꑱꅉꁧꄉ，ꄻꂷꄆꊿꌋꆀꀧꌦꊿꁵꄷꌠꄜ。”ꄷ。
31 ꂷꄆꊿꄊꑘꌧꃘꊰꑋꈓꃅꄉ，ꏦꇍꄂꇩꏤꋌꇑꅜ。