ꄊꑱꆀꊿꍞꆿꅪꀀꈌꇬꊐ
6
1 ꄊꑘꌧꃰꃅꆹꋍꉌꂵꉪꐨꃅꄉꊿꋍꉐꑋꊏꑹꋌꌋꌊꇛꌺꃅꄉꇩꏤꏲꂠꎻ； 2 ꉈꑴꀑꋾꌕꑻꋌꄻꇛꌺꈧꌠꄩꇹꄣꎻ，ꄊꑱꆀꆏꀑꋾꋋꌕꑻꈬꄔꇬꋍꂷꉬ；ꃰꃅꆹꋍꈲꏣꁮꑋꏦꄉ，ꇛꌺꈧꌠꁳꌤꃆꆿꑘꄛꑣꌊꀑꋾꌕꑻꌠꇰꇁꎻꇬꎷ。 3 ꄊꑱꆀꆏꉪꇐꏡꇐꄞꅐꄉ，ꑞꑌꀉꁁꀑꋾꌋꆀꇛꌺꈧꌠꏭꀋꋌ，ꑠꅹ，ꃰꃅꆹꋌꁳꇩꏤꋋꂷꏲꂠꎻꏢꉨ。4 ꀊꋨꄮꇬ，ꀑꋾꌋꆀꇛꌺꈧꌠꇩꏤꏲꂠꌤꑘꃆꂮꇬꄉꊙꈉꎹꌊꄊꑱꆀꊂꅇꎹꏢꉨ，ꄚꊙꈉꌋꆀꃅꑽꏿꑽꅌꍈꋀꋌꎷꀋꊌ，ꑞꃅꆏ，ꄊꑱꆀꆹꌤꃅꇬꀋꎪꀋꑴ，ꃅꑽꏿꑽꅍꀋꐥ。 5 ꊿꀊꋨꈨꆏꐮꏯ：“ꉪꊇꄊꑱꆀꊂꊙꈉꎹꇬ，ꋍꏃꃅꌋꄹꏦꃆꂮꇬꈴꄉꎹꌠꀋꉬꑲꆏ，ꀉꁁꎹꅉꎷꀋꊌ”ꄷ。
6 ꑠꃅꄉ，ꀑꋾꈧꌠꌋꆀꇛꌺꈧꌠꐯꏑꌌꃰꃅꂿꇁꌐꇈ，ꃰꃅꏭ：“ꄊꑘꌧꃰꃅꃪꈎꊌꅊꇈ！ 7 ꇩꏤꈐꏭꀑꋾꈧꌠ、ꏲꂠꌟꒉꈧꌠ、ꇛꌺꈧꌠ、ꇖꊩꄟꃀꈧꌠꌋꆀꌛꍈꈧꌠꐮꇖꐯꄟꌊꃰꃅꏭꇖꂟꇁ，ꃰꃅꁳꅇꁵꄉ，ꏥꀕꑠꏢꄻꄉꎻ： ꃅꑍꌕꊰꑋꈍꈐꇬ，ꃰꃅꏭꀉꄂꇖꀋꂟꃅ，ꀉꁁꌦꌋꅀꊿꑠꏭꇖꂟꁧꌠꐥꑲꆏ，ꈀꄸꉬꄿꂿꉬ，ꀋꎪꃅꍞꆿꅪꀀꈌꃅꐬꇬꊐ。 8 ꃰꃅꀋ！ ꆏꀋꃅꈀꎭꀕꃅꏥꀕꋋꏢꄻꄉꑲꆀ，ꅽꇇꌒꄻꇫꍅꄉꄺꀱꀋꉆꎻa；ꂷꄆꊿꌋꆀꀧꌦꊿꏦꃤꇬꈴꄉꈍꃅꑌꄺꀱꀋꉆꃅꄉ”ꄷ。 9 ꄚꄉ，ꃰꃅꄊꑘꌧꆏꃰꃅꇇꌒꋌꄻꏥꏦꋋꏢꇬꍅꄉꀐ。
10 ꄊꑱꆀꆹꏥꀕꋋꏢꃰꃅꇇꌒꍅꄉꀐꌠꋌꅉꐚꑴꇬ，ꄚꋌꆹꌊꊨꏦꀁꇬꃹꇈ，ꆸꄜꇬꌍꑓꑳꇊꌒꇌꏭꊒꁬꌠꋌꁉꄉꀐ。ꋌꑍꃀꑍꊂꌟꃅꋍꑍꌕꃢꁡꊭꃄꇴꄂꄉꏃꃅꌋꏭꈼꂟ、ꏃꃅꌋꏭꈀꎭꀕ。 11 ꊿꀊꋨꈨꐯꏑꌊꋍꈜꇁꇈ，ꄊꑱꆀꋍꏃꃅꌋꏭꈼꂟ、ꇖꂟꐺꌠꋀꊌꂿꀐ。 12 ꄚꄉ，ꋀꐯꇯꇁꌊꃰꃅꂾꄉ，ꏥꀕꏡꌠꃆꂮꉉꐺ，ꋀꊇꃰꃅꏭ：“ꃅꑍꌕꊰꑋꈍꈐꇬꃰꃅꏭꀉꄂꇖꀋꂟꃅ，ꀉꁁꌦꌋꅀꊿꑠꏭꇖꂟꌠꐥꑲꆏ，ꈀꄸꂷꉬꄿꂿ，ꀋꎪꃅꍞꆿꅪꀀꈌꃅꐬꇬꊐꄷ，ꏥꀕꋋꏢꃰꃅꅽꇇꌒꄻꇫꍅꄉꀐꌠꀋꉬꅀ？”ꄷ。
ꃰꃅꆏꋀꏭ：“ꉬ！ ꑠꏢꐥ，ꏥꀕꋋꏢꆹꂷꄆꊿꌋꆀꀧꌦꊿꏦꃤꇬꈴꄉꄻꄺꀱꀋꉆꃅꄉꀐ”ꄷ。
13 ꋀꊇꆏꃰꃅꏭ：“ꃰꃅꀋ! ꊿꇱꁮꌊꇁꌠꒀꄊꊿꄊꑱꆀꆹꅽꁵꅇꋌꇬꀋꅲ，ꏥꀕꅽꇇꌒꍅꄉꏡꌠꑌꋌꇬꀋꍬꃅ，ꋍꑍꌠꌕꃢꋍꌋꂶꌠꏭꈼꂟꇬꎷꑴꌦ”ꄷ。
14 ꃰꃅꆹꅇꂷꋍꑠꋌꈨꇬꆏ，ꉌꃶꑗꋩꈍꃅꇮꀋꐚꇫꎍ；ꋍꉌꂵꈐꇬꄊꑱꆀꈭꋏꏢꉨ，ꉘꁮꈞꆈꃹꀐꇬꂯ，ꇬꊎꄉꈍꃅꋋꈭꋏꌠꉪꏡ、ꄐꏤꐺꇬꎷꑴꌦ。 15 ꊿꀊꋨꈨꐯꏑꌊꃰꃅꂿꇁꇈ，ꇬꏭ ：“ꃰꃅꀋ！ ꂷꄆꊿꌋꆀꀧꌦꊿꆹ‘ꃰꃅꁵꅇꌋꆀꏥꀕꈧꌠꈍꃅꑌꄺꀱꀋꉆ’ꄷꏦꃤꑠꐥꌠꆏꅉꐚꄡꑟ”ꄷꉉ。
16 ꄚꄉ，ꃰꃅꅇꁵꄉ，ꊿꁳꄊꑱꆀꈻꌊꍞꆿꅪꀀꈌꃅꐬꇬꊐꎻ。ꃰꃅꆏꄊꑱꆀꏭ：“ꅽꏃꃅꌋꆏꅉꀕꃅꇬꏭꇖꂟꂶꌠꀋꎪꃅꆎꈭꋏꇁꌠꉬ”ꄷ。 17 ꋍꈭꐨꆏ，ꇓꂵꂷꋀꆷꃅꐬꈌꇬꋍꄉꇈ，ꃰꃅꇇꌒꌋꆀꇛꌺꈧꌠꇇꌒꄻꇫꍅꄉ，ꄊꑱꆀꊝꌠꌤꋌꐘꁳꈍꃅꑌꄺꀱꀋꉆꎻ。 18 ꃰꃅꂶꌠꀱꋍꑷꂿꇬꁧꇈ，ꋋꄹꉖꃅꋚꀋꋠ，ꊿꁳꋍꂾꄉꉙꑵꀛꐂꋌꀦꀋꎽ，ꀀꑌꇴꒉꑌꀋꅲ。
ꄊꑱꆀꆿꅪꀀꈌꄉꈭꅐꇁ
19 ꊁꄹꉇꃅꍛꁱꄷꌦꆏ，ꃰꃅꄓꇁꇈ，ꇨꆰꇨꊸꃅꆿꅪꀀꈌꃅꐬꂶꌠꇬꉜꄉꒉ， 20 ꇁꌊꃅꐬꏢꁮꑟꇬꆏ，ꉌꐒꃅꄉꄊꑱꆀꇴꐺ，ꄊꑱꆀꏭ：“ꐩꋊꐩꍂꃅꇫꐥꌠꏃꃅꌋꁏꐚꄊꑱꆀꀋ！ ꏃꃅꌋꆏꅉꀕꃅꇬꏭꇖꂟꂶꌠꆿꅪꈌꇬꄉꆎꈭꋏꇀꀕ？”ꄷ。
23 ꄚꄉ，ꃰꃅꆹꉌꇿꑓꇿꃅꊿꋌꁆꌊꃅꐬꇬꄉꄊꑱꆀꈻꀍꉀꎼꇁꎻ。ꑠꃅꄉ，ꄊꑱꆀꆹꊿꈻꀍꉀꎼꇁꀐ，ꋍꇭꀧꇬꂷꊂꍈꑋꀋꌸ，ꑞꃅꆏ，ꋌꋍꏃꃅꌋꉘꇉ。 24 ꋍꈭꐨꆏ，ꃰꃅꅇꁵꄉꊿꄊꑱꆀꊂꅇꎹꈧꌠꌋꆀꋀꀋꃀꀉꑳꈧꌠꃅꊿꍞꆿꅪꀀꈌꃅꐬꇬꊐꌐꀐ。 ꋀꊇꃅꐬꁏꉱꇬꀋꑟꌦꇯꆐꆿꅪꇱꒃꅜꇈ，ꋀꃷꅍꈧꌠꃅꆿꅪꇱꑝꐷꀐ。
ꃰꃅꋍꉹꁌꏭꏃꃅꌋꏦꃪꄷꅇꁵ
ꑞꃅꆏ，ꋋꆹꍅꁍꀕꃅꇫꐥꌠꏃꃅꌋꉬ，
ꐩꋊꐩꍂꃅꇫꐥ，
ꋍꇩꏤꐩꋊꐩꍂꀜꀋꐡ，
ꋍꏲꂠꌅꈌꑍꇁꈤꀋꉆ！
27 ꋌꊾꀧꌋꃅ、ꊾꈭꋏꇬꎷ，
ꋌꉬꉎꉬꐮꄉꌋꃅꐪꑽꑌꌋꆀꌤꂵꇖꀕꌠꃅ，
ꄊꑱꆀꆿꅪꈌꇬꄉꋌꈭꋏꎼꇁ”ꄷ。
28 ꑠꃅꄉ，ꄊꑘꌧꃰꃅꄺꄮꇬꅑꅸꌏꇊꌧꀧꌦꃰꃅꄺꄮꇬꑟꌠꃅ，ꄊꑱꆀꆹꌤꆿꑞꑌꁣꀋꐥꌐ。