ꄊꑱꆀꀄꂼꇬꄉꑋꇠꉆꌋꇖꂷꋌꊌꂿ
7
1 ꀨꎭꌒꀠꀘꇍꃰꃅꄻꆹꄹꈎꌠ，ꄊꑱꆀꆹꀀꈤꇬꀀꇬꆏ，ꀄꂼꂻꄉꐛꒌꇣꋲꑠꋌꊌꂿꇈ，ꀄꂼꂶꌠꌋꆀꀄꂼꀑꐱꄜꐨꋌꁱꎼꇁ。 2 ꄊꑱꆀꑠꃅꉉ：“ꈊꃀꉢꀄꂼꇬꆏ，ꀊꁣ！ꋋꇅꃅꂿꃅꇬꄉꃅꆳꇖꄲꁏꇁꎾꃝꄩꌸ。 3 ꑋꇠꉆꌋꀉꒉꐯꀉꒉꑠꇖꂷꎿꇬꄉꅐꇁ，ꋀꊇꐛꐪꐯꀋꌡ：4 ꂴꇬꂾꂶꌠꆏꆿꅪꂷꌡ，ꏨꆉꅏꊭꅑ；ꉢꏮꇬꉚꇬꆏ，ꋍꅐꈧꌠꊿꇱꍠꇫꎭ；ꋌꃄꅉꇬꄉꊿꄖꎼꇁꇈ，ꊾꂷꌟꃅꏸꑭꑍꁆꌊꇬꉆ，ꉈꑴꋌꁳꊿꉌꂵꂷꑌꎻ。 5 ꀊꁣ！ꑋꇠꉆꌋꑍꂷꂶꌠꆏ，ꊇꂷꌡ，ꏢꋒꀕꃅꄉꇬꉆ，ꈂꀸꎐꂷꇬꆏꏦꎭꌘꏢꌃꌌꐺ。ꊿꑠꂷꇬꏭ：‘ꄓꇁ！ ꎸꀉꑌꐯꀉꑌꃅꋠ’ꄷ。
6 ꋍꈭꐨꉢꏮꇬꉚꇬꆏ，ꀊꁣ！ ꑋꇠꉆꌋꍀꌡꑠꂷꉢꊌꂿ，ꇱꄓꇬꉌꊭꅐꇖꁆꅑ，ꀂꏾꇖꂷꅑ，ꉈꑴꌅꈌꑌꄻꋌꁳꀐ。 7 ꊁꈊꃀꐛꒌꇣꋲꌠꇬꄉꉜꇬꆏ，ꀊꁣ！ ꑋꇠꉆꌋꇖꂷꂶꌠꆏꊽꐬꆠꑓꆠꇧꁠꑠꂷ，ꊋꒉꊋꇨ，ꎐꂷꀉꒉꎸꅍꌡꌠꅑ，ꑞꑌꋌꌃꋌꈾꋧꐛꃀꐛ，ꇫꋒꇈꈧꌠꑌꏸꑭꌊꋌꌌꄔꈻ。ꑋꇠꉆꌋꋋꂷꆹꂴꈧꌠꌋꆀꐯꀋꌡ，ꋋꆹꀑꃚꊰꏢꅑ。 8 ꉢꀑꃚꋋꈨꃆꂮꉪꏡꐺꇬꆏ，ꀊꁣ！ ꀉꁁꀑꃚꀄꊭꑠꏢꅿꇁꌦꀐ；ꀑꃚꋋꏢꂾꀑꃚꂴꇫꋦꑠꌘꏢꐴꋧꄷꋌꇱꍠꇫꎭ。ꇬꉚ！ꀑꃚꋋꏢꑓꋪꅑ，ꃰꊿꑓꋪꌡ，ꈂꀸꆏꆺꒉꄇꒉꅇꂷꉉ。
ꀃꌋꀊꆨꇯꆐꇫꐥꂶꌠꃆꂮꐛꒌꇣꋲꌠ
9 ꉢꇬꉚꑌꃅꄉꇬꆏ，
ꃰꃅꑋꅉꂷꄻꇫꄉꌠꉢꊌꂿ，
ꋍꄩꆏꀃꌋꀊꆨꇯꆐꇫꐥꅷꇁꂶꌠꇫꑌ。
ꋍꃢꈜꆹꃰꐎꌟꃅꐍꊭꀕ，
ꋍꀍꑐꆹꑾꎭꌟꃅꐍꎭꀕ。
ꃰꃅꑋꅉꂶꌠꃆꄔꉐꆂꌡ，
ꑋꅉꏮꇉꃆꄔꉙꀕꉘꃅꐞ。
10 ꃆꄔꆹꒊꃀꌟꃅꍻꇁ，
ꋍꂾꄉꇫꅐꇁ；
ꋍꎁꃅꌤꃅꌠꄙꃅꐥ，
ꋍꂾꉆꌠꑌꃪꃅꐥ；
ꋌꇫꑌꄉꀞꇽꇁ，
ꐥꐨꄯꒉꈧꌠꁉꄉꀐ。
13 ꉢꈊꃀꐛꒌꇣꋲꌠꇬꄉꉜꇬꆏ，
ꀊꁣ！ꊾꌺꌡꑠꂷꃅꃴꃅꄂꋩꄉꇁ，
ꏃꇁꀃꌋꀊꆨꇯꆐꇫꐥꅷꇁꂶꌠꂾꑟ。
14 ꋋꆹꌅꈌ、ꀑꒉꑊꒉ、ꇩꏤꐯꇯꋌꊌꌐ，
ꇩꏤꈀꐥꌠ、ꊿꋅꈀꐥꌠ、ꅇꉙꈀꐥꌠꐭꌠꊿꁳꋍꎁꃅꌤꃅꎻ。
ꋍꌅꈌꆹꐩꋊꐩꍂꃅꇔꇬꀋꎭ，
ꋍꏲꄸꃯꉻꆹꈍꄮꑌꀜꀋꐡ。
ꐛꒌꇣꋲꌠꄜꐨꉉ
15 ꉢ-ꄊꑱꆀꆹ，ꉠꒌꂶꌠꉠꄸꈐꄉꐒꊀ，ꐛꒌꇣꋲꌠꉠꑓꐛꇁꐛꅹ，ꉠꐬꆠꑓꆠꇧꁠ。 16 ꉢꆹꌊꁨꄉꌤꆿꈧꌠꈀꐥꃅꉢꌌꀊꄶꉆꑠꂷꏭꅲꇬꆏ，ꋌꉉꉡꇰꄉ，ꌤꆿꈧꌠꋍꑠꄜꌠꉢꊨꄅꀐ： 17 ꑋꇠꉆꌋꋋꇖꂷꆹꋧꃅꄉꄓꇫꋦꇁꂯꌠꇩꏤꇖꂷꉬ。 18 ꄚꋍꉎꀋꐥꂶꌠꌃꎔꌺꈧꌠꆹꀋꎪꃅꇩꏤꏲꂠꌅꈌꋀꊌ，ꋀꃤꐛꅷꐩꋊꐩꍂꑟ！
19 ꀊꋨꄮꇬ，ꉡꆏꑋꇠꉆꌋꇖꂷꂶꌠꃆꂮꄈꀊꅰꃅꉢꇫꅉꐚꏾ，ꋋꆹꑋꇠꉆꌋꀉꁁꈧꌠꌋꆀꐯꀋꌡ，ꊽꐬꆠꑓꆠ，ꎸꅍꎐꂷꅑ，ꐯꑬꌋꇇꌋꅑ，ꑞꑌꋌꌃꋌꈾꋧꐛꃀꐛ，ꇫꋒꇈꈧꌠꑌꑭꁆꌊꋌꌌꄔꈻ； 20 ꀂꏾꇬꀑꃚꊰꏢꌋꆀꉈꑴꀉꁁꀄꊭꑠꏢꅑ，ꀄꊭꋋꏢꂾꋦꌠꀑꃚꌘꏢꆏꆜꁧ；ꀑꃚꀄꊭꋋꏢꆹꑓꋪꅑ，ꈂꀸꆺꒉꄇꒉꅇꂷꉉ，ꐛꄟꑌꀑꃚꀉꁁꈧꌠꏭꀋꋌꃅꀉꇨ。 21 ꉢꏮꇬꉚꑌꃅꄉꇬꆏ，ꀑꃚꋋꏢꌋꆀꌃꎔꌺꈧꌠꇁꐯꌉ，ꌃꎔꌺꈧꌠꌉꇬꀋꄿ， 22 ꅑꅸꀃꌋꀊꆨꇯꆐꇫꐥꅷꇁꂶꌠꇀꄮꇬꑟ；ꋌꇁꌊꋍꉎꀋꐥꂶꌠꃤꌃꎔꌺꈧꌠꎁꃅꑗꊨꈨꇽ，ꀊꋨꇅꇬꆏ，ꌃꎔꌺꈧꌠꇩꏤꏲꂠꌅꈌꌫꄮꑟꀐ。
23 ꇬꉆꂶꌠꑠꃅꉉ：‘ꑋꇠꉆꌋꇖꂷꂶꌠꆹꋧꃅꄉꄓꇫꋦꇁꌠꇩꏤꇖꂷꂶꌠꉬ，ꋋꆹꇩꏤꀉꁁꈧꌠꌋꆀꐯꀋꌡ，ꃄꇖꄹꊂꃅꄉꋌꑍꈌꊎ，ꄷꀋꁧꋌꌌꄔꈻ、ꋌꈾꋧꐛꃀꐛꌐ。 24 ꀑꃚꀊꋨꊰꏢꆏ，ꇩꏤꋋꂷꇬꄉꄓꇁꌠꃰꃅꊯꑻꉬ；ꊁꆏ，ꃰꃅꀉꁁꂴꈧꌠꌋꆀꐯꀋꌡꑠꂷꄓꇁꇈ，ꃰꃅꌕꑻꋌꆼꍅꇂꃴꅞ。 25 ꋌꋍꉎꀋꐥꂶꌠꏭꄘꑣꅇꉉ，ꋍꉎꀋꐥꂶꌠꃤꌃꎔꌺꈧꌠꆼꍅꆹꆋ，ꉈꑴꋨꏦꃅꑍꌋꆀꄹꏦꋌꄻꀱꇫꎭ。ꌃꎔꌺꈧꌠꋍꇇꈐꇬꋍꈓ、ꑍꈓ、ꉈꑴꈎꁂꂷꀀ。
26 ꄚꑠꃅꑴꇬ，ꀞꇽꂶꌠꇫꑌꄉꀞꇽꇀꄮꇬꆏ，ꋍꌅꈌꀞꇽꂶꌠꇱꇔꇫꎭꇈ，ꋋꆹꀜꐡꆿꐢꄉꐩꋊꐩꍂꃅꈔꑍꌠꉬ。 27 ꇩꏤ、ꌅꈌꌋꆀꇩꏤꈀꐥꌠꄩꏲꂠꌠꌅꈌꑠꀋꎪꃅꄻꋍꉎꀋꐥꂶꌠꃤꉹꁌꈧꌠꁵ。ꋍꇩꏤꆹꐩꋊꐩꍂꃅꇫꋦ，ꊿꌅꈌꈀꐥꌠꃅꐯꇯꋍꎁꃅꌤꃅ、ꋍꅇꃅꉐꃅꌐꌠꉬ ’ꄷ。
28 ꌤꋌꐘꄚꄉꌐꀐ。ꉢ-ꄊꑱꆀꆹꌤꋋꈨꐛꅹꃅꐬꆠꑓꆠꇧꁠ，ꑊꑍꑌꁏꀐ，ꄚꌤꋋꈨꆹꉢꎺꉠꉌꂵꊐꄉꌐ”ꄷ。