ꏃꃅꌋꇨꇅꃃꄉꑱꌝꆀꊿꇇꇩꍈꇁ
13
1 ꀋꉊꂴꏭꑱꃔꆃꅇꇬꉉꑲꆏ，ꊿꃅꑑꃹꌐ，ꑱꌝꆀꈬꄔꇬꋌꐤꒉꃅꐥ；
ꄚꋌꀠꆀꏭꀍꃈꄚꁧꒉꄸꃅ，ꑽꃤꐆꄉꌦꀐ。
2 ꀃꑍꋋꄮꆏ，ꋀꊇꑽꃤꐤꅉꀉꑌꅉꃅꐆꇬꎷꀐ，
ꊨꏦꎁꃅꌦꁱꌊꁱꄻ，
ꊨꏦꇮꇐꇬꈴꄉꐎꂷꌊꌦꁱꌊꁱꏷꄻ，
ꑠꆹꐯꇯꇔꇷꄻꄉꌐꌠꉬ。
ꌦꁱꌊꁱꋋꈨꃆꂮꆏ，
ꋀꊇꐮꏯ：
‘ꊿꌦꁱꌊꁱꏭꆦꑝꇁꈧꌠꇂꇤꌺꁱꈧꌠꁬꉆ’ꄷ。
3 ꑠꅹ，ꋀꊇꀋꎪꃅꃅꄜꇬꃅꉒꌡ，
ꋋꇅꃅꐘꀋꈨꁧꌠꍑꒉꌡ，
ꄸꉺꇬꄉꆲꏂꁏꌊꁧꌠꋙꁌꑌꌡ，
ꃅꇴꈳꅉꇬꅐꇁꌠꃅꇴꌡ。
4 ꆏꉞꏹꄉꅐꇁꈭꐨꆏ，
ꉡꆹꑳꀊꊆ-ꅽꏃꃅꌋꉬ；
ꉢꀉꄂꑲꆏ，ꆏꀉꁁꏃꃅꌋꑠꂷꐥꄷꉉꀋꉆ，
ꉢꀉꄂꑲꆏ，ꀉꁁꈭꋏꌊꂷꀋꐥ。
5 ꉢꇈꈬꅔꈋꃅꃶꃅꌘꅉꇬꄉꆎꀨꎹꆽꃴꋺa。
6 ꉢꋀꉗꄻꄉ，ꋀꊇꋠꂊꀐ；
ꋠꂊꈬꐨꆏ，ꉌꂵꆺꒉꄇꒉꌊꉢꋀꋌꀋꎺꀐ。
7 ꑠꅹ，ꉡꆹꆿꅪꌟꃅꇁꋀꊝ，
ꍀꆉꌟꃅꈛꄵꈵꃀꏢꁮꀀ。
8 ꉡꆹꊉꃀꊇꌺꊿꑣꌊꁧꂷꌟꃅ，ꋀꑝꋀꋠꇁ，
ꋀꉦꏪꉢꍻꉢꇽꐯꀋꉜ。
ꉡꆹꆿꅪꀋꃀꌟꃅꋀꋠꋀꅝꇁ，
ꑋꁮꉆꁮꌟꃅꋀꍻꋀꇽꇁ。
9 ꑱꌝꆀꀋ！ ꆏꉢꇱꈔꋏꇫꎭꌠꉬ！
ꑞꃅꆏ，ꆏꉡꄙꉡꑣ，ꆎꇇꀤꂶꌠꏭꄘꑣ。
10 ꀋꃅꅽꃰꃅꂶꌠꇿꇬꐥꀋ？
ꋌꁳꅽꇓꈓꈧꌠꇬꄉꆎꈭꋏꇁꎻꇆ！
ꆎꆹ“ꃰꃅꌋꆀꇛꌺꄻꉪꄩꏲꇁꎻ”ꃅꉉꋺ，
ꅽꄩꏲꂠꈧꌠꇿꇬꐥꀋ？
11 ꉢꇨꇅꃃꋩꀕꃅꃰꃅꂷꉢꄻꆏꁳ，
ꇨꇅꃃꌊꄉꅽꃰꃅꉢꆷꇫꎭ。
12 ꑱꃔꆃꑽꃤꆹꇙꇬꐓꄉꀐ，
ꋍꄸꃤꑌꏓꏡꇬꊎꄉꀐ。
13 ꆄꈻꐨꌺꒆꀋꃀꈀꊝꌠꌡꑠꇁꋌꌶ，
ꋋꆹꌧꅍꀋꐥꌠꌳꃈꅮꉬ，
ꀉꑳꒆꄮꑟꇈ，ꒆꉈꏭꎼꀋꇁꑠꂷꌡ。
14 ꉢꌦꊿꐤꅉꇬꄉꋀꊇꈭꋏꒉꑴꅀ？
ꉢꌥꅉꈔꅉꇬꄉꋀꊇꉢꈭꋏꎼꇁꑴꅀ？
ꌦꃤꈔꃤꀋ！ ꅽꉮꃤꇿꇬꐥꀋ？
ꌦꊿꐤꅉꀋ！ ꅽꈔꋏꐨꇿꇬꐥꀋ？
ꉡꆹꋀꎭꃅꀋꉈꀐ。
15 ꋌꄘꑐꀕꃅꀟꄖꈬꄔꋦꑴꇬb，
ꄚꁭꅐꏭꄉꃅꆳꄲꁏꇁ，
ꋋꆹꑳꀊꊆꄻꅔꈋꂤꏂꀠꇬꄉꁏꇁꎻꌠꉬ；
ꋍꒉꐬꇁꀦꀋꎪꃅꀊꃶꁧ，
ꋍꒈꊧꒈꃚꀋꎪꃅꒉꌤꁧ。
ꃅꆳꋋꄲꆹꋍꁨꇐꄉꇐꈁꏓꈀꊭꄉꌠꃅꋌꁏꌊꁧꌐꌠꉬ。
16 ꌒꂷꆀꑸꊨꏦꑽꃤꀵꄜ，
ꑞꃅꆏ，ꋋꆹꋍꏃꃅꌋꆼꁏ。
ꋀꊇꀋꎪꃅꇁꂗꍵꑱꃀꈌꇬꃹ，
ꀉꑳꀿꏂꌺꀋꎪꃅꊿꍞꇬꄚꌦ，
ꀋꂿꃴꑌꌠꀃꃀꑌꊿꀺꇫꎭ。