4
1 ꌒꂷꆀꑸꉘꁌꇬꀠꎭꑍꃀꈧꌠꀋ!ꆍꊇꅇꂷꋋꈨꅲꄡꑟ！
ꆍꊇꌢꎭꌟꁧꌠꇴꐔꆽꍀ，ꁨꅍꀋꐥꌠꆼꍅꆹꅷꐺ，
ꊨꏦꃥꌋꀋꁧꏭ：“ꎧꀖꌌꉪꄎꇁ”ꃅꉉ。
2 ꌋꑳꀊꊆꆹꋍꌃꎔꐨꇬꈴꄉꑠꃅꅇꏤꒃ：
“ꇬꉚ！ ꃅꑍꑟꇁꂯꄉꀐ，ꊿꀋꎪꃅꇥꉧꌊꆍꋌꃬꌊꁧ，
ꉛꑎꅍꌊꆍꋌꑎꌌꁧ，ꋍꂷꂯꇫꋒꀋꇊꌠꉬ。
3 ꆍꊇꀋꎪꃅꇓꈓꇓꉻꐠꈌꇬꄉꁖꁧ，
ꈀꄸꑌꊒꆽꃅꄉꁨꏭꉜꄉꁧꇈ，ꊿꍞꉳꂱꎭꌠꉬ”ꄷ。
ꋍꑠꆹꑳꀊꊆꉉꌠꉬ。
ꑱꌝꆀꊿꑗꉘꊝꇬꑌꄺꀱꀋꅲ
4 ꑱꌝꆀꊿꀋ！ ꆍꊇꉌꂵꈁꏾꃅꀨꄯꆀꄉꑽꃤꐆꁧ，
ꏣꏧꇓꈓꄉꑽꃤꁦꎆꃅꐆꇬꇯ，
ꃅꄜꋍꑍꋑꀋꋒꃅꆍꆦꑝꅍꌞꆹ，
ꌕꑍꋍꃢꃅꆍꊯꁧꋊꋍꁧꌞꌌꆹꇬꎷ；
5 ꆍꊇꉌꂵꈁꏾꃅꎬꁱꃔꋌꇱꄉꌠꌌꈀꎭꀕꆦꑝꅍꃅ，
ꆍꊇꌞꏾꃅꌞꅍꈧꌠꍒꆜꊾꇰꄉ，ꊿꁳꅉꐚꎻ，
ꑞꃅꆏ，ꆍꊇꑱꌝꆀꊿꆹꋍꑠꆍꉌꃹ”ꄷ。
ꋍꑠꆹꌋꑳꀊꊆꉉꌠꉬ。
6 “ꉡꆹꆍꇓꈓꂷꈁꐛꅉꃅꉢꄻꃱꉩꄸꌋꊝꎻ，
ꆍꃅꄷꇿꀕꑌꋙꈘꒈꈘꇧꁠ；
ꄚꑠꃅꐙꀐꇬꑌ，ꆍꊇꄡꇗꀱꉠꄹꀋꇁ”ꄷ。
ꋍꑠꆹꑳꀊꊆꉉꌠꉬ。
7 “ꋙꎴꒈꏢꇁꂾꌘꁮꆪꇬꆏ，
ꉢꆍꃅꄷꁳꂷꉐꀋꐛꎻꀐ，
ꉢꇓꈓꋋꂷꇬꆏꄻꂷꉐꐛꎻ，
ꇓꈓꀊꋨꂷꇬꆏꄻꂷꉐꀋꐛꎻꀐ。
ꃄꅉꋌꏬꄩꆏꂷꉐꐛꎻ，
ꃄꅉꀊꋩꏬꄩꆏꄻꂷꉐꐛꀋꎽꃅꀊꃶꎻꀐ。
8 ꊿꇓꈓꑍꂷꌕꂷꇬꀀꌠꃅꐮꆼꑐꄉꇓꈓꋍꂷꇬ
ꀆꐒꎹꅝꇁ，
ꄚꅝꇎꅍꀋꊌ；
ꑠꃅꐙꀐꇬꑌ，ꆍꊇꄡꇗꀱꉠꄹꀋꇁ”。
ꋍꑠꆹꑳꀊꊆꉉꌠꉬ。
9 “ꉢꊷꆳꌋꆀꍹꐛꃴꐛꑠꁳꆍꉻꈫꇬꃱꁧꉐꀖ、
ꑌꃀꌧꊈꀉꑌꃅꉮꇁꎻ，
ꍈꀮꁳꆍꀋꃨꂷꅑꌩꁧꌋꆀꏝꃴꀋꍰꌩꁧꋠꇁꎻ。
ꄚꑠꃅꐙꀐꇬꑌ，ꆍꊇꄡꇗꀱꉢꄹꀋꇁ”ꄷ。
ꋍꑠꆹꑳꀊꊆꉉꌠꉬ。
10 “ꉢꆄꁮꈺꁘꁳꇁꉞꏹꃹꌠꌟꃅ， ꇁꆍꈬꄔꃹꎻꀐ；
ꆍꌠꆗꈧꌠꂗꍵꌊꉢꌉꇫꎭ，
ꆍꃆꀞꊿꇑꌊꁧꈧꌠꑌꉢꌉꇫꎭ，
ꆍꍆꅉꇬꍹꅿꏢꅿꅳꁖꌉꇧꁠꀐ，
ꄚꑠꃅꐙꀐꇬꑌ，ꆍꊇꄡꇗꀱꉠꄹꀋꇁ”ꄷ。
ꋍꑠꆹꑳꀊꊆꉉꌠꉬ。
11 “ꉢꀋꉊꂴꏭꌙꄏꂷꌋꆀꀒꃀꇁꇓꈓꈔꋏꌠꌟꃅ
ꆍꈔꋏꇁ；
ꆍꊇꆹꃆꄔꇬꄉꋌꎼꇁꌠꌩꋴꏢꌡ，
ꄚꑠꃅꐙꀐꇬꑌ，ꆍꊇꄡꇗꀱꉠꄹꀋꇁ”ꄷ。
ꋍꑠꆹꑳꀊꊆꉉꌠꉬ。
12 ꑳꀊꊆꑠꃅꉉ：
“ꑠꅹ，ꑱꌝꆀꀋ！ ꉢꑠꃅꄉꆎꊝꇁ。
ꑱꌝꆀꀋ！ ꉢꑠꃅꄉꆎꊝꇁꑲꆏ，
ꆏꄐꏤꄉꅽꏃꃅꌋꂿꇁꄡꑟ”ꄷ。
13 ꇬꉚ！ ꋋꆹꁧꇂꇈꌺꋌꄻꄉ，
ꃅꆳꋌꄻꄉ，
ꋍꉪꐨꋌꉉꊾꇰ；
ꎹꄓꁨꑭꁳꐈꇁꆈꋧꋪꎻ，
ꋌꈛꎼꃄꅉꀊꂥꅉꇬꐺ，
ꑳꀊꊆ-ꄙꀕꃪꀕꂽꑼꌊꁈꏃꃅꌋꆹꋍꂓꉬ。