ꑱꌝꆀꎁꃅꌦꏷꉙꇐꉙ
5
1 ꑱꌝꆀꄰꀋ！ ꅲꄉ! ꉢꆍꎁꃅꌦꏷꉙꇐꉙꂿ：2 ꑮꆜꌺꑱꌝꆀꃪꐛꇬꄚꄉ，ꄓꇁꀋꄐꀐ；
ꋌꐚꃄꅉꅞꇬ，ꊾꂷꇫꄖꌠꀋꊌꀐ”ꄷ。
3 ꌋꑳꀊꊆꑠꃅꉉ：
“ꑱꌝꆀꄰꇓꈓꂷꂽꋍꄙꑹꁆꎼꁧꇬ，ꋍꉐꑹꀉꄂꋒꇈ；
ꋍꉐꑹꁆꎼꁧꇬ，ꊯꑻꀉꄂꋒꇈꌠꉬ”ꄷ。
ꏃꃅꌋꑱꌝꆀꊿꏭꉪꁏꄺꀱꄷꇳꍝ
4 ꑳꀊꊆꑱꌝꆀꄰꏯꑠꃅꉉ：
“ꆍꊇꉢꎷꇁꑲꆀ，ꀋꎪꃅꇫꐥꄎꌠꉬ。
5 ꀨꄯꆀꇓꈓꏭꎹꄡꁧ，
ꏣꏧꇓꈓꃹꄡꆹ，
ꀙꏂꀠꇓꈓꑌꈴꄡꆹ；
ꑞꃅꆏ，ꏣꏧꇓꈓꉹꁌꀋꎪꃅꌞꊿꇱꁮꌊꁧ，
ꀨꄯꆀꇓꈓꀋꎪꃅꄉꐘꀋꈨꁧꌠꉬ。
6 ꆍꊇꆹꑳꀊꊆꎹꈹꑲꆀꇫꐥꄎꌠꉬ。
ꑠꀋꉬꑲꆏ，ꋌꃆꄔꌟꃅꒀꌝꄰꅍꄉꐞꇁꇈ，
ꀨꄯꆀꇓꈓꋌꐗꇫꎭꄉ，ꊾꂷꇬꌉꄎꌠꀋꐥꇁꂵ。
7 ꆍꊇꋋꈨꆹ，ꊒꆽꀕꌠꆍꄺꀱꌊꈨꑗꉇꈌꌡ，
ꑖꉬꆍꍞꃄꅉꇬꎭ。
8 ꋋꆹꍶꈐꎮꑑꋌꄻꄉ，
ꈊꃀꆈꋧꋪꌠꋌꄻꃅꄜꁨꇉꀕꇁꎻ，
ꂵꆪꈨꌬꀕꌠꋌꄻꃅꒉꆈꏸꀕꇁꎻ，
ꎿꒉꋌꇴꋌꏓꐯꇯꄉꋌꉷꃄꅉꎭ，
ꑳꀊꊆꆹꋍꂓꉬ。
9 ꋋꆹꃅꊭꆗꌠꌟꃅꁾꇓꋌꅥꁖ，
ꈫꈈꌠꇓꈓꋌꐅꀘꐯꀋꉜ。
10 ꆍꊇꆹꊿꇓꈓꄇꂿꏢꁮꄉꌤꆿꀞꇽꀊꋨꈨꌁꑷ，
ꊿꅇꂷꊒꆽꃅꉉꈧꌠꌁꑣ。
11 ꆍꊇꌢꎭꌟꁧꌠꆼꍅꆹꅷ，
ꄀꇗꇱꄉꋀꄷꋚꂷꇗꏸꎴ；
ꑠꅹ，ꆍꊇꇓꂵꁶꋖꌊꑷꂿꆍꋉꄉꑴꇬ，
ꑷꂿꈐꏭꀀꆹꀋꉆ；
ꆍꊇꑌꃀꌧꊈꏩꏪꎔꃨꌠꆍꊪꄉꑴꇬ，
ꑌꃀꌧꊈꎧꆍꇫꅝꀋꄐ。
12 ꆍꑽꐪꃷꂿꑖꀋꉬ，
ꆍꑽꃤꆈꒉꀕ；
ꆍꊇꑖꊿꆼꍅ，ꃴꎆꃴꇁꋠ，
ꇓꈓꄇꂿꏢꁮꄉꀋꎃꀋꊒꃅꌢꎭꌟꁧꌠꊝ。
13 ꑠꅹ，ꃅꋊꄷꅠꋋꋏꇬ，
ꊿꀑꁮꌠꆹꌙꈈꃅꁱꀋꐭ。
14 ꆍꊇꂄꎔꌠꎹꈹ，ꄷꅠꑠꊂꀋꈹꑲꆏ，
ꀋꎪꃅꇫꐥꄎꌠꉬ。
ꑠꃅꑲꆏ，ꑳꀊꊆ-ꄙꀕꃪꀕꂽꑼꌊꁈꏃꃅꌋꆹ
ꀋꎪꃅꆍꉉꅇꇬꈴꄉꆍꈽꐥꌠꉬ。
15 ꄸꌠꅠꌠꌁꑷ，ꂄꌠꎔꌠꉁꅉ，
ꇓꈓꄇꂿꏢꁮꄉꑖꉬꈴꄉꊒꆽꀕꃅꌤꀞꑲꆏ，
ꑳꀊꊆ-ꄙꀕꃪꀕꂽꑼꌊꁈꏃꃅꌋꆹꂄꃅꒀꌝꄰꑭꊂ
ꊿꇫꋒꇈꈧꌠꊝꇬꌬꀋꄿ。
16 ꑠꅹ，ꌋꑳꀊꊆ-ꄙꀕꃪꀕꂽꑼꌊꁈꏃꃅꌋꑠꃅꉉ：
“ꈩꅉꐦꀞꂷꈁꐛꅉꃅꄉꀋꎪꃅꉨꃚꇫꅐꇁꌠꉬ；
ꏦꈜꋍꏢꈁꐛꅉꃅꊿ‘ꀊꇷ！ ꀊꇷ ！’ꃅꏅꌠꐥ。
ꑘꃅꊿꋀꇴꌊꈨꃅꉩꇁ，
ꊾꉩꉔꌠꋀꇴꌊꉩꇁꎻ。
17 ꑌꃀꌧꊈꉻꈫꂷꈁꐛꅉꃅꉨꃚꇫꈌꐚ，
ꑞꃅꆏ，ꉢꀋꎪꃅꆍꈬꄔꈴꄉꆍꇇꇩꍈꌠꉬ”。
ꋍꑠꆹꑳꀊꊆꉉꌠꉬ。
18 ꊿꑳꀊꊆꃅꑍꇁꉚꌠꆹꉮꃤꐥꀐ！
ꆍꊇꑞꃅꑳꀊꊆꃅꑍꇁꉚꌠꉬ？
ꃅꑍꀊꋨꄮꇬꆹꆈꋧꋪ，ꁨꑭꍈꀋꐥꌠꉬ。
19 ꀋꇊꆏꊾꂷꆿꅪꂾꁈꂿꄷꇈ，ꀱꌊꊇꂷꊝ；
ꈴꀁꇬꄉꇇꄻꊖꁋꉈꄉꑬꆏꂿꄷꇈ，ꀱꌊꁮꏂꄵꌠꌡ。
20 ꑳꀊꊆꃅꑍꆹꆈꃅꆈꋧꋪ，ꁨꑭꍈꐘꀋꈨ，
ꆈꃅꆈꏸꀕ，ꁨꇉꀕꃅꀋꐛꌠꀋꉬꅀ？
21 ꆍꋨꏦꃅꑍꑠꊽꉌꁕꌦꄉꏽ，
ꆍꇤꏸꃅꐯꏑꑠꑌꉠꄻꀋꈴ。
22 ꆍꊇꐗꌐꆦꑝꅍꌋꆀꋚꂷꒉꂷꆦꑝꅍꌞꌌꉢꁳꇁꑴꇬ，
ꉢꇬꀋꊪ；
ꆍꊇꎇꃀꍅꑓꈀꋆꀕꌠꌌꄮꇱꆦꑝꅍꃅꌞꇁꄷꑲꑌ，
ꉢꑓꏮꇬꀋꉜ。
23 ꆍꑵꉙꌌꀉꁁꄉꑵꒉ，ꉠꏢꁮꄉꄡꑵ，
ꉡꆹꆍꂢꃚꈶꃚꑠꅲꀋꏾ。
24 ꊒꆽꀕꌠꁳꆈꒉꌟꃅꈴꀥꏿꎻꅊꇈ，
ꑖꉬꁳꄇꒉꌟꃅꂃꄑꏿꎻꅊꇈ。