ꂮꒊꂮꄉꃅꐥꌠꑱꌝꆀꏲꌋꂠꌋꈧꌠꈔꑍꇁꀐ
6
1 ꆍꊇꐥꌒꄻꌒꃅꑳꇊꌒꇌꐥa，ꀀꌒꑌꌒꃅꌒꂷꆀꑸꁧꇬꀀ，
ꆍꊇꇩꏤꈀꐥꌠꈬꄔꇩꏤꀨꇊꀨꂶꌠꇬꂓꒉꌗꒉꃅꐥꄉ，
ꑱꌝꆀꉹꁌꆍꏭꇖꂟꇁꋋꈨꆹ，ꉮꃤꐥꀐ！
2 ꆍꊇꏧꆀꇓꈓꊼꇅꉜꒉ，
ꀊꄶꇬꈴꄉꉳꂸꇓꈓꀉꒉꂶꌠꉜꒉꇈ，
ꉈꑴꃏꆺꌧꊿꏦꄯꇓꈓꑌꉜꒉ；
ꆍꊇꌞꇩꏤꋋꈨꏭꀋꋌꃅꀉꇨꀕꉏ?
ꆍꏲꄸꂠꉻꌞꃤꐰꀋꋌꃅꐙꀕꉏ？
3 ꆍꊇꉪꇬꀊꉗꏢꐛꑲꆀꉮꃤꇫꅐꇁꎻꈁ，
ꄚꆍꃄꄟꑽꄟꒉꄸꃅ，
ꁴꍂꅿꃅꀞꇽꌠꇫꑟꇁꂯꄉꀐ。
4 ꆍꊇꀀꌒꃅꎇꆺꊈꎐꌊꄻꄉꌠꀀꈤꇬꀀ，
ꎍꌒꃅꈈꇉꀨꆐꅍꑠꄩꎍ；
ꑌꑿꈬꇬꑿꏀꀞꈀꋆꀕꌠꆍꅥꄉꋠ，
ꇌꉻꇬꇌꉘꌺꈁꎔꀕꌠꆍꈻꌊꌉꋠ。
5 ꆍꊇꂮꒊꂮꄉꃅꁀꁻꈷ、ꑵꉙꑵ，
ꄊꃥꌟꃅꄉꆍꊨꏦꎁꃅꉙꇐꑵꇐꁰꄻ；
6 ꍔꌺꀉꒉꌠꌊꎧꈈꄉꅝ，
ꒀꒉꋍꉎꀋꐥꌠꌊꇭꀧꌎ，
ꄚꒀꌝꄰꑭꊂꎭꌶꅧꌸꇬ，ꆍꊇꋀꎭꃅꀋꉈ。
7 ꑠꅹ，ꆍꋋꈨꀋꎪꃅꂴꉘꃀꇬꌞꊿꇱꁮꌊꁧ，
ꆍꋠꌒꅝꌒ、ꈩꌒꀜꌒꌠꐥꐨꄚꄉꑍꌠꉬ！
8 ꌋꑳꀊꊆꋍꊨꏦꏭꄐꄉꑠꃅꅇꏤꒃ：
“ꑸꇱꄰꊂꋊꆺꒉꄇꒉꄉꉢꇫꌂ，
ꋀꑷꂿꈫꈈꈧꌠꉠꉌꁕ；
ꉢꀋꎪꃅꇓꈓꌋꆀꇓꈓꇬꈀꐥꌠꃅꏮꁮꐚꇇꈐ
ꊐꌐꌠꉬ”ꄷ。
ꋍꑠꆹꑳꀊꊆ-ꄙꀕꃪꀕꂽꑼꌊꁈꏃꃅꌋꉉꌠꉬ。
ꊿꀊꋨꂷꆏ：“ꀋꐥꀐ。ꄡꁵꍂꃅꄉ! ꑳꀊꊆꂓꋋꂷꄡꉉꀐ”ꄷ。
11 ꇬꉚ! ꑳꀊꊆꅇꁵꎼꇁꀐ，
ꑴꃀꈧꌠꋌꐆꌦꏭꇓꂵꐛꇫꎭ，
ꑲꌺꈧꌠꋌꆷꐯꀋꉜꇫꎭꌐ。
12 ꃆꀞꈍꃅꃪꏦꇬꀥꐺꉆꂯ？
ꇂꁮꈍꃅꃪꊭꇬꄉꃄꂿꉆꂯ？
ꆍꊇꆹꊒꆽꀕꌠꆍꄺꀱꌊꅋꒉꑱꒉꐛꇫꎭ，
ꑖꉬꌠꂶꂷꆍꄺꀱꌊꈌꏷꑐꀕꌠꐛꇫꎭ。
13 ꆍꊇꆹꇊꄂꀠꇓꈓꆍꅥꁖꄉꇿꌦꄉꏽb，
ꈌꍓꑓꍓꄉ:
“ꉪꊇꊨꏦꊋꃤꌊꏦꆀꇓꈓꉪꍆꅞꌠꀋꉬꅀ？c”ꃅꉉ。
14 ꑳꀊꊆ-ꄙꀕꃪꀕꂽꑼꌊꁈꏃꃅꌋꑠꃅꉉ：
“ꑱꌝꆀꄰꀋ！ ꇬꉚꄉ！ ꉡꆹꀋꎪꃅꇩꏤꂷꉢꄖꄑꌊ
ꆍꌉꇁꎻꌠꉬ；
ꆍꊇꉳꂸꈜꏑꅉꄉꅑꅸꑸꇁꀠꒈꌺꒉꋮꈁꀀꌠꃅ，
ꋀꌌꆼꍅꆹꅷꇨꁠꌠꉬ”ꄷ。