ꏃꃅꌋꇁꇩꏤꈀꐥꌠꀞꇽ
3
1 ꑳꀊꊆꉈꑴꑠꃅꉉ：“ꇬꉚ！ꃅꑍꀊꋨꑍ、ꃅꄡꀊꋨꄡꑟꇀꄮꇬꆏ，ꉡꆹꒀꄊꊿꌋꆀꑳꇊꌒꇌꊿꌞꊿꁮꌊꁧꈧꌠꁳꀱꇁꎻ， 2 ꉡꆹꇩꏤꈀꐥꅉꃅꉢꏣꏑꌌꒀꎭꃔꐦꀞꇬꒉꇈ，ꀊꄶꇬꄉꑱꌝꆀꊿꉠꉹꁌ、ꉠꁨꇐꄉꇐꉬꈧꌠꐛꅹꃅꋀꀞꇽ；ꑞꃅꆏ，ꉠꉹꁌꈧꌠꋀꁋꀘꌞꊿꋅꈬꄔꎭꇈ，ꉠꃄꅉꈧꌠꋀꁸꌊꁧ， 3 ꉠꉹꁌꋀꌌꌐꈻꄉꁸ，ꀉꑳꌺꃰꈧꌠꋀꌌꎲꃷꃆꅿꈿꀀꁌꃅ，ꀉꑳꅩꃰꈧꌠꆏꋀꌌꎧꀠꄉꅝ。4 ꄫꇊ、ꑭꄓꌋꆀꃏꆺꌧꃅꄷꈁꀀꌠꊿꀋ！ ꆍꊇꉠꄹꑞꎹꇁꌠꉬ？ ꆍꊇꉠꄹꋪꒃꇁꌠꅀ？ ꋪꒃꇁꌠꆹꉬꑲꆏ，ꉢꀋꎪꃅꑗꉘꁳꋋꇅꃅꇁꆍꀂꏽꌸꎻꌠꉬ。 5 ꉠꐎꏂꆍꇑꌊꁧ，ꉠꎊꈬꁌꇐꈤꌠꆍꎞꌊꆍꁱꑳꇓꑳꇬꄉꁧꌐ， 6 ꉈꑴꒀꄊꊿꌋꆀꑳꇊꌒꇌꊿꆍꃷꑫꇂꊿꁵꄉ，ꋀꁳꊨꏦꃄꄸꐞꄉꈜꎴꅉꇬꁧꎻ。 7 ꇬꉚꄉꅊꇈ！ ꉢꀋꎪꃅꋀꍞꊟꄉ，ꋀꁳꃅꄷꋀꊇꆍꃷꀊꄶꎬꅉꈚꌠꇬꐞꇁꎻꇈ，ꆍꊇꈀꃅꌠꒉꄸꃅꑗꉘꉢꄻꆍꀂꏽꌸꎻꌠꉬ。 8 ꆍꌳꃈꅮꉢꃷꒀꄊꊿꇇꈐꊐꇈ，ꋀꇱꃷꀱꈜꎴꃅꄷꐛꌠꇩꏤꇬꏂꀠꊿꁵꇫꎭꌠꉬ。ꑠꆹꑳꀊꊆꉉꌠꉬ”ꄷ。
9 ꆍꊇꇩꏤꈀꐥꌠꈬꄔꄉꑠꃅꄛꇰ：
“ꄐꏤꄉꌉꈿ，ꌳꈄꀬꅑꌠꍞꊟ，
ꂽꑼꈀꐥꌠꁳꁨꏭꉜꄉꌉꎻ。
10 ꆹꈈꋩꌊꂗꍵꃅꄉ，
ꉊꈯꋩꌊꐳꂷꃅꄉ；
ꄐꅍꀋꐥꌠꁳ‘ꉡꆹꌳꈈꀋꃀꉬ’ꃅꉉꎻ。
11 ꀊꈫꀊꇋꇩꏤꈧꌠꀋ！ ꉆꐥꃅꁨꇁ，
ꀊꄶꇬꄉꐯꏑꇁꌐ。
ꑳꀊꊆꀋ！ ꆏꈀꎭꀕꃅꅽꂽꑼꌳꈈꈧꌠꁆꎼꇁ。
12 ꇩꏤꈀꐥꌠꃅꐮꇴꐮꍝꌊꆹꄡꑟ，
ꒀꎭꃔꐦꀞꇬꉜꄉꆹ，
ꑞꃅꆏ，ꉢꀋꎪꃅꀊꄶꇬꑌꄉꀊꈫꀊꇋꇩꏤꈀꐥꌠꀞꇽ。
13 ꉊꈯꉈꄉꒇꇁꌶ！ ꑞꃅꆏ，ꋚꁧꒉꁧꂔꈴꀐ,
ꁨꄔꈻꇁꌶ！ ꑞꃅꆏ，ꎧꋎꅉꐛꂨꀕꀐ。
ꎧꊐꅍꂋꇁꀐ，ꑞꃅꆏ，ꋀꑽꃤꆈꒉꀕ。
14 ꊿꀉꑌꐯꀉꑌꃅꀞꇽꇁꄿꇬꏓꇁꌐ，
ꑞꃅꆏ，ꑳꀊꊆꃅꑍꀞꇽꇁꄿꇬꑟꇁꂯꄉꀐ。
15 ꉘꁮꆧꁨꐯꇯꆈꋧꋪ，
ꃅꃴꃅꏸꏷꌬꃅꀋꐛꀐ。
ꏃꃅꌋꋬꂻꄻꋍꉹꁌꁵ
16 ꑳꀊꊆꀋꎪꃅꑭꉢꄉꂆꏅꎼꇁ，
ꑳꇊꌒꇌꄉꈌꋊꄉꅇꉉꅐꇁ，
ꃅꃴꃄꅉꐯꇯꇙꈧꐺ。
ꄚꑳꀊꊆꆹꇁꋍꉹꁌꁾꅉꐛ，
ꇁꑱꌝꆀꊿꁾꇓꐛ。
17 ꑠꃅꄉ，ꆍꊇꆹꉢꋋꂷꑳꀊꊆ-ꆍꏃꃅꌋꉬ，
ꉢꉠꌃꎔꁧ-ꑭꉢꂶꌠꇬꐥꌠꆍꅉꐚꌠꉬ。
ꀊꋨꄮꇬꆏ，ꑳꇊꌒꇌꀋꎪꃅꇁꌃꎔꅉꐛ，
ꀉꁁꊿꋅꈍꃅꑌꂽꄓꀊꄶꇬꈴꀋꇁꀐ。
18 ꀊꋨꄹꉇꆏ，ꁦꀑꇬꎧꒉꐔꌠꊰꇁ，
ꁦꀮꇬꑍꐎꁖꇁ，
ꒀꄊꃅꄷꒉꈫꒈꇤꃅꄉꒉꀕꀋꈘꏡ；
ꒉꐬꑠꐬꀋꎪꃅꑳꀊꊆꑷꂿꇬꄉꁖꇁ，
ꏃꄝꐦꀞꃅꒉꊌꒉꇎꌐ。
19 ꉞꏹꃅꄷꀋꎪꃅꈥꅐꀜꅐ，
ꑱꄏꃅꄷꑌꇁꇈꈬꅔꈋꊿꀋꋦꃮꀋꀆꅉꐛꌠꉬ，
ꑞꃅꆏ，ꋀꊇꊾꇨꁴꍂꅿꃅꒀꄊꊿꊝ，
ꉈꑴꒀꄊꃅꄷꄉꊿꅑꑘꀋꐥꌠꋀꌉꇫꎭ。
20 ꄚ，ꒀꄊꃅꄷꆹꐩꋊꐩꍂꃅꊿꀀꊿꋦꇬꎷ，
ꑳꇊꌒꇌꑌꄙꇁꃪꋊꃅꊿꐥꊿꋦꇬꎷ。
21 ꉢꀋꎪꃅꊿꌉꊾꆳꈧꌠꄷꐆꎹ，
ꂴꏭꋀꄷꐆꎹꀋꋻꑴꌦ。
ꑳꀊꊆꆹꑭꉢꀀ。