ꉼꑭꀊꄯꒉ 5

ꑱꌝꆀꄰꌋꆀꒀꄊꄰꀞꇽꌠꊝꇁ

1 ꆦꑝꊿꈧꌠꀋ！ ꆍꊇꅇꂷꋋꈨꅲꄡꑟ！

ꑱꌝꆀꄰꀋ！ ꆍꊇꋓꉪꁨꄉꅲꌶ！

ꃰꃅꄰꑱꈐꑱꑭꀋ！ ꆍꊇꅳꀧꍔꄉꅲ！

ꀞꇽꌠꀋꎪꃅꇁꆍꌶꌠꉬ，

ꑞꃅꆏ，ꆍꊇꂰꌦꁁꐤꄮꇬꇓꄃꇷꌡ，

ꄣꀨꉘꁌꐤꄮꇬꐱꂦꍔꄉꇷꌡ。

2 ꊿꆼꁏꆼꑣꐺꋋꈨꊿꌉꊾꆳꆈꒉꀕ，

ꄚꊿꋋꈨꈀꐥꃅꉢꋀꇇꇩꍈꌠꉬ。

3 ꑱꃔꆃꄰꃆꂮꉢꅉꐚ，

ꑱꌝꆀꄰꑌꉠꂾꂁꀋꄐ，

ꑱꃔꆃꀋ！ꆏꀋꃅꎼꃅꃏꑽꐺ，

ꑱꌝꆀꄰꑌꍍꆀꀐ。

4 ꋀꊇꆹꋀꃅꐨꑽꑌꈧꌠꒉꄸꃅꀱꋀꏃꃅꌋꄷꇁꀋꉆ，

ꑞꃅꆏ，ꋀꊇꎼꃅꃏꑽꉌꂵꑌ； ꋀꊇꑳꀊꊆꀋꌧ。

5 ꑱꌝꆀꆺꒉꄇꒉꐨꆹꇁꋀꀋꉾꀋꃪꌠꊫꄲꌐꂷꐛꀐ，

ꑱꌝꆀꌋꆀꑱꃔꆃꆹꊨꏦꑽꃤꐛꅹꃅꄉꃪꐛ，

ꒀꄊꑌꋀꈽꃪꐛꇬꄚꇁꌠꉬ。

6 ꋀꊇꍶꑿꇂꁮꈻꌊꆦꑝꄉꑳꀊꊆꎹꈹꐺꑴꇬ，

ꋀꋌꎷꀋꊌꌠꉬ， ꑞꃅꆏ，ꑳꀊꊆꆹꋀꐞꁧꀐ。

7 ꋀꊇꀋꎪꀋꑴꃅꑳꀊꊆꀋꊝꃅꄉ，

ꃀꎹꌺꇺꀐ。

ꀋꃅꅂꀨꋩꑍꆏ，ꋀꊇꌋꆀꋀꁍꑗꄉꈁꀋꎪꃅꊿꑍ

ꈌꊎꌠꉬ。

8 ꆍꊇꏸꀘꑸꇓꈓꄉꉶꁱꄏꄡꑟ，

ꇁꂸꇓꈓꄉꉶꁱꄏ，

ꀨ.ꑸꊉꇓꈓꄉꇳꉔ；

ꀝꑷꂱꀋ！ ꅽꇱꄓꊂꆈꁆꏯꋓꉪꁨꄉ！

9 ꑗꉘꊝꄹꉇꌠꑞꄮꇬꆏ，

ꑱꃔꆃꃅꄷꀋꎪꃅꈥꅐꀜꅐꌠꉬ；

ꉢꀋꃅꑱꌝꆀꃣꉻꈧꌠꈬꄔꄉ，

ꌤꆿꊁꏭꀋꎪꃅꇫꅐꇁꈧꌠꄜꉺ。

10 ꒀꄊꌟꒉꌠꂿꈧꌠꆹꃄꅉꄹꌐꊈꐺꈨꌡ，

ꉢꀋꎪꃅꉠꇨꇅꃃꐨꒈꀮꄌꉷꏽꃅꉷꋀꇭꀧꎭꌠꉬ。

11 ꑱꃔꆃꆹꌦꁱꇓꁱꂿꄐꀋꐥꑠꊂꈹꁧꐛꅹ，

ꆼꍅꆹꅷꌠꊝ，

ꀞꇽꄮꇬꆏ，ꆽꃴꋧꐛꃀꐛꇫꎭꌠꉬ。

12 ꉡꆹꑱꃔꆃꄰꁳꁯꑌꋠꌠꌡꎻ，

ꒀꄊꄰꁵꌩꀯꐛꍹꐛꌠꌡꎻ。

13 ꑱꃔꆃꄰꋀꊨꏦꆅꊌꌠꋀꅉꐚ，

ꒀꄊꄰꋀꊨꏦꂷꊂꌸꌠꋀꊌꂿꄉ，

ꑱꃔꆃꆹꑸꎽꏭꉜꄉꁧ，

ꊿꁆꌌꑸꎽꃰꃅꀉꇨꂶꌠꂿꁧꎻ；

ꄚꑸꎽꃰꃅꆹꆍꆅꃤꉃꀋꄐ，

ꆍꂷꊂꑌꋌꄻꌒꀋꄐ。

14 ꉡꆹꀋꎪꃅꆿꅪꀋꀮꌟꃅꑱꃔꆃꊝ，

ꆿꅪꌇꄧꌠꌟꃅꒀꄊꄰꊝ，

ꋀꉢꍻꉢꇽꇫꎭꇈ，ꉢꎼꇫꈴꁧ；

ꋀꉢꈻꌊꁧꇬ，ꊾꂷꇫꁌꇁꀋꄐ。

15 ꉢꁧꀐ，ꉢꀱꉈꑴꉠꊨꏦꐤꅉꁧ，

ꅑꅸꋀꊇꊨꏦꑽꃤꐥꌠꋀꌧꄉꉢꎷꉢꈹꇁ，

ꎭꇂꅦꈠꊝꄉꈧꊰꀕꃅꉢꏯꇖꂟꇀꄮꇬꑟ。