ꑱꌝꆀꊿꇯꍝꃅꉪꁏꄺꀱꉈꀋꑌ
6
1 ꁨꇁ！ ꉪꊇꏮꑳꀊꊆꄷꁧꂿ！ꉪꊇꋌꍻꋌꇽꐯꀋꉜꑴꇬ，
ꋌꀋꎪꃅꉪꆅꉁꆄꄻꌠꉬ；
ꉪꊇꋌꅥꂷꊂꌸꑴꇬ，
ꋌꀋꎪꃅꉪꂷꊂꄞꇙꌠꉬ。
2 ꑍꀕꐛꈭꐨꆏ，ꋌꀋꎪꃅꉪꁳꌒꐛꅉꐙꎻ，
ꌕꑍꄹꉇꌠꆏ，ꉪꊇꀋꎪꃅꋌꇱꄖꎼꇁꇈ，
ꉪꁳꋍꂾꐥꉆꎻꌠꉬ。
3 ꉪꊇꐯꇯꑳꀊꊆꌧꇁ，
ꈐꇤꊋꇤꄉꑳꀊꊆꌧꇁ！
ꋋꆹꃅꄜꁨꑭꌟꃅꀋꎪꃅꄉꇫꅐꇁ，
ꋋꆹꃅꃴꉐꌦꌟꃅꀋꎪꃅꄉꐛꉪꌶ，
ꑋꈌꄮꐰꂷꉐꌟꃅꃄꅉꋌꊭꁁꆓꀕ。
4 ꑱꃔꆃꀋ！ ꉢꈍꃅꄉꆎꊝꄡꑟ？
ꒀꄊꀋ！ ꉢꈍꃅꄉꆎꊝꂯ？
ꑞꃅꆏ，ꆍꉂꐪꆹꃅꄜꇬꃅꉒꌡ，
ꋋꇅꃅꐘꀋꈨꁧꌠꍑꒉꌡ。
5 ꑠꅹ，ꌋꅇꄜꊿꉢꇱꁆꌌꋀꇽꋀꐡꇁ，
ꉠꈌꇬꅐꇁꌠꅇꂷꌊꋀꌉꋀꆳꇁ；
ꉢꋀꀞꇽꌠꆹꃅꊭꆗꌠꌟꃅꇫꅐꇁ。
6 ꉡꆹꀋꎪꀋꎙꌠꉂꐪꉌꃹ，ꆦꑝꅍꉌꀋꃹ；
ꉡꆹꊿꏃꃅꌋꌧꌠꉠꄻꈴ，ꐗꌐꆦꑝꅍꏭꀋꋌ。
7 ꄚꋀꊇꆹꑸꄉꇓꈓꊿꌟꃅꏤꐪꐆa，
ꀊꄶꇬꄉꐈꋓꌊꉡꊝ。
8 ꏸꆺꆹꄸꃅꅠꑽꊿꇓꈓꂷꉬ，
ꇓꈓꋋꂷꃅꑭꐨꉗꌦꅩꐥꀕꌠꐛ。
9 ꆦꑝꊿꐯꏑꌌꏄꍿꌟꃅꈛꄵꄉꇁꉚ，
ꋍꁥꃅꏂꏧꇓꈓꈝꃀꈛꁧꇬꄉꊿꌉꊿꆳ，
ꃅꐨꑽꑌꈀꄸꈀꅠꀕ。
10 ꑱꌝꆀꄰꅍꄉꌤꆿꊽꐬꆠꑠꉢꊌꂿ；
ꑱꃔꆃꃅꄷꎼꃅꃏꑽꌠꐥꄉ，
ꑱꌝꆀꋌꍍꋌꆀꇧꁠꀐ。
11 ꒀꄊꀋ！ ꉢꉠꉹꁌꌞꊿꁮꌊꁧꈧꌠꁳꀱꉈꑴꇁꎻ
ꄮꇬꆏ，
ꀋꎪꃅꒇꋩꌠꌟꃅꀞꇽꑠꊭꄐꏤꆎꄉꌠꉬ。