ꉼꑭꀊꄯꒉ 4

ꑳꀊꊆꑱꆀꊿꊂꅇꎹ

1 ꑱꌝꆀꊿꀋ！ ꆍꊇꑳꀊꊆꅇꂷꅲ。

ꑳꀊꊆꆹꃅꄷꋌꈚꀀꌠꉹꁌꈧꌠꊂꅇꎹ，

ꑞꃅꆏ，ꋀꊇꃅꄷꋌꈚꀀꇬ，ꏤꐪꀋꁨ，

ꉂꏣꀋꑌ，ꏃꃅꌋꌧꂷꀋꐥ；

2 ꋀꊇꊿꍁꊿꏽ、ꈰꏅ、ꊿꌉꊾꆳ、ꈏꈱ、

ꌞꃆꍯꒆꍯ、ꀋꂄꁴꍂꅿ，

ꌦꅐꐶꑷꌠꌤꑠꐮꊂꊛꄉꇫꅐꇁꇬꎷ。

3 ꑠꅹ，ꃄꅉꋋꄹꀊꃶꃵꌣꀕ，

ꃄꅉꇬꀀꌠꉹꁌ、ꇈꈬꇬꑋꁮꉆꁮ、

ꃅꈬꇬꉌꊭꉌꇓꐯꇯꐤꅉꊯꅉꑟ，

ꎾꃝꇬꉜꊪꉜꍽꂯꀋꎪꃅꈔꑍꁧꌠꉬ。

ꑳꀊꊆꆦꑝꊿꈧꌠꏭꊨꀖ

4 ꄚꑠꃅꑴꇬ，ꈀꄸꑌꐯꄡꀥꄡꑣ，ꐯꄡꊨꄡꀖ。

ꆦꑝꊿꈧꌠꀋ！ ꆍꊂꅇꎹꂶꌠꆹꉢꉬ。

5 ꆏꂵꆪꄮꇬꃪꐛꇫꐷ，

ꈊꃀꑌꀋꎪꃅꌋꅇꄜꊿꃶꀋꐚꌠꈽꄉꃪꐛꇬꄚ；

ꅽꀉꂿꆹꉢꇱꈔꋏꇫꎭꌠꉬ。

6 ꉠꉹꁌꆹꉢꀋꌧꐛꅹꃅꄉꈔꑍ。

ꆏꉢꌥꉡꂿꌠꌧꇐꑠꈁꀋꅲ，

ꉡꑌꀋꎪꃅꆏꋋꂷꍞꇫꎭꇈ，

ꆏꁳꉠꆦꑝꊿꄻꀋꎽꀐ。

ꅽꏃꃅꌋꄹꏦꆏꇬꀋꎺꑲꆏ，

ꉡꑌꀋꎪꃅꅽꌳꃈꅮꉢꇬꀋꎺꌠꉬ。

7 ꆦꑝꊿꀊꅰꃅꀉꑌꇀ，ꀊꅰꃅꑽꃤꐆꄉꉡꊝ；

ꉢꀋꎪꃅꋀꁳꀑꒉꑊꒉꀋꊌꃅꑊꏦꎲꄏꎻꌠꉬ。

8 ꋀꊇꆹꉠꉹꁌꌌꑽꃤꋊꇁꌠꆦꑝꅍꈧꌠꋀꑍꈌꊎ，

ꉠꉹꁌꑽꃤꐆꇬꋀꉌꂵꇿ。

9 ꊁꇁꋍꑍꉠꉹꁌꈧꌠꑞꊝꆏ，

ꆦꑝꊿꈧꌠꑌꀋꎪꃅꑞꋀꊝꇁꌠꉬ。

ꉢꀋꎪꃅꋀꈀꃅꈁꑽꌠꇬꈴꄉꋀꇇꇩꍈ，

ꋀꃅꐨꑽꑌꈧꌠꉜꄉꄻꋀꀱꌠꉬ。

10 ꋀꊇꋠꑴꇬ，ꈍꃅꑌꋠꂊꇁꀋꉆꌠꉬ；

ꎼꃅꃏꑽꑴꇬ，ꈍꃅꑌꌺꊌꇖꊌꀋꇁꌠꉬ；

ꑞꃅꆏ，ꋀꊇꑳꀊꊆꐞꁧꇈ，

ꅉꀕꃅꎼꃅꃏꑽꁧ，

11 ꎧꅝꎧꑱꄉ，ꉌꂵꆹꎧꏀꎦꆹꇱꇑꌊꁧꀐ。

ꌩꁱꇓꁱꏭꀍꃈꄚꌠꊨꀖ

12 ꉠꉹꁌꆹꌩꁱꏭꅲꇫꐺ，

ꋀꉂꆏꄯꁯꏢꊵꑵꅉꄜꋀꇰꇮꎻꈁ。

ꑞꃅꆏ，ꋀꊇꎼꉪꃏꉨꄉꈜꑽ，

ꎼꃅꃏꑽꄉꋀꏃꃅꌋꐞꁧ。

13 ꋀꊇꁦꀑꁧꄩꄉꆦꑝ，

ꁦꀮꇬꌩꁧꀉꒉꌠ、ꉔꇢ、ꎺꁧꑠꇂꃴꄉꅿꉗꌒꅍꐔꄀ，

ꑞꃅꆏ，ꀊꄶꇬꆹꌩꁧꌐꒉꏿꈶꍠꅍ。

ꑠꅹ，ꆍꀋꃋꎼꃅꃏꑽ，

ꆍꌺꑮꃀꌞꁦꋠꍯ。

14 ꄚꆍꀋꃋꎼꃅꃏꑽ，

ꅀꋀꌺꑮꃀꌞꁦꋠꍯꑴꇬ，

ꉡꆹꋀꇇꇩꀋꍈ，

ꑞꃅꆏ，ꁦꋠꈧꌠꊨꏦꑴꅉꎲꃷꃆꅿꈿꀀꁧ，

ꁱꑳꇬꎲꃷꃆꅿꐊꄉꆦꑝꁧꌠꉬ。

ꉹꁌꌧꅍꀋꐥꋋꈨꆹꀋꎪꃅꀍꃈꀱꆽꐯꀋꉜꌠꉬ。

15 ꑱꌝꆀꀋ！ ꆏꎼꃅꃏꑽꑴꇬ，

ꄚꒀꄊꄰꁳꑽꃤꐆꄡꎽ，

ꏣꏧꇓꈓꁧꀋꉆ，

ꀨ.ꑸꊉꇓꈓꆹꀋꉆ，

ꐩꋊꐩꍂꃅꇫꐥꌠꑳꀊꊆꏭꄐꄉꅇꏤꑌꒃꀋꉆ。

16 ꑱꌝꆀꊿꆸꉈꆽꁁꇨ，

ꑍꃀꆸꉈꑠꏢꌡ；

ꀃꑍꋋꄮꑳꀊꊆꅔꈋꀊꐯꅉꇬꄉꑾꌺꆫꌠꌟꃅꋀꆫ

ꉆꑴꅀ？

17 ꑱꃔꆃꆹꌩꁱꇓꁱꌋꆀꐯꅑꐮꁠꎍ，

ꋌꁳꈁꏾꃅꄉꐥꎻ！

18 ꋀꊇꎧꅝꇎꈭꐨꆏ，

ꃄꈌꄐꃅꎼꃅꃏꑽꁧ；

ꋀꏲꌋꂠꌋꈧꌠꆹꌤꎲꄏꋍꑠꉌꃹꐯꉌꃹ。

19 ꋀꊇꆲꏂꇱꑄꌌꅏꊭꑐꌊꁧ，

ꋀꊇꌦꌋꑠꏭꆦꑝꐛꅹꀋꎪꃅꎲꅐꁁꅐꌠꉬ。